Die verkondiging van die goeie nuus in baie tale

TOE Jesus die teken gegee het wat die laaste dae sou kenmerk, was een van die kenmerke daarvan die wêreldwye verkondiging van die goeie nuus van die Koninkryk (Mattheüs 24:14). Om te verstaan waarom hierdie wêreldwye verkondiging in alle nasies en in baie tale nie voor hierdie geslag plaasgevind het nie, en waarom dit nóú kan en besig is om te gebeur, is dit nodig om die geskiedenis na te gaan. Soos die woordeboek Webster’s toon, was dit eers in die 15de eeu, net meer as 500 jaar gelede, dat Gutenberg die kuns uitgevind het om los letters in die drukproses te gebruik. Ná hierdie begin het die mens metodes ontwikkel om die gedrukte woord in groot hoeveelhede vir massaverspreiding beskikbaar te stel.

Dit is goed om in gedagte te hou dat die Bybel, voor die uitvinding van die drukpers, ’n skaars artikel was aangesien dit met die hand oorgeskryf moes word. Oorskrywing met die hand was ’n moeisame en duur proses. Die uitvinding van los letters en die drukpers was ’n reusestap vorentoe wat dit moontlik gemaak het om die Bybel en Bybelse lektuur in alle tale te druk.

Geweldige vooruitgang is sedert 1914 in die druk- en uitgewerskuns gemaak, met die gevolg dat die rubberdrukpers mettertyd die meeste werk oorgeneem het wat voorheen op hoogdrukperse gedoen is.

In die laaste jare het die koms van die rekenaar hierdie proses verder versnel. Karakters, aksenttekens en ander beelde kon geteken word, in ’n rekenaar ingevoer word en vinnig beskikbaar wees deur ’n toets op ’n rekenaartoetsbord te druk. Nou was dit baie makliker om lektuur vir mense van alle tale wêreldwyd te druk.

In 1979 het die Wagtoringgenootskap ’n projek onderneem wat bekend staan as MEPS. MEPS is ’n letternaam vir “Multilanguage Electronic Phototypesetting System”. Handelsmaatskappye het rekenaars ontwikkel net vir gekose tale wat wins op hulle belegging sou lewer. Die Genootskap se opdrag is anders. Die Bybel sê dat die goeie nuus aan “alle nasies en stamme en volke en tale” verkondig moet word.—Openbaring 14:6.

Navorsing na taaleienskappe is deur baie van die Genootskap se 93 takkantore in alle wêrelddele onderneem. ’n Lys van al die karakters en aksenttekens wat nodig is om die lektuur in die tale onder elke tak te druk, moes voorberei word. Die reëls vir die skeiding van woorddele in elke taal moes ook voorsien word. Elke karakter en aksentteken moes geteken, in die rekenaar ingevoer en geredigeer word. Dit het jare se toegewyde werk vereis. Die gevolg is dat die Koninkryksboodskap nou in meer tale as ooit tevore gedruk kan word, en die getal tale neem voortdurend toe.

Aanvanklik het die Genootskap hulle eie rekenaarapparatuur en programmatuur ontwikkel en gebou. Jehovah se Getuies van oor die hele wêreld het hulle hulp met die projek kom aanbied. Daar was ’n uitwisseling van vaardighede sowel as van bemoediging (Romeine 1:12, NW). Dit was amper soos ’n ommekeer van die gebeure by die Toring van Babel. Na afloop van gespesialiseerde opleiding is die toerusting, sowel as bekwame werkers, na takkantore oor die hele wêreld gestuur. Die resultaat is ’n veelsydige uitgewerstelsel wat in meer as honderd lande en eilande van die see gebruik word en wat die Genootskap se publikasies tot dusver in omtrent 200 tale kan produseer.

In hierdie voorspelde laaste dae word die goeie nuus van God se Koninkryk inderdaad in alle nasies en in baie tale verkondig.