Die produksie van Bybellektuur om God te loof

Jehovah se Getuies is welbekend vir hulle verkondiging van God se Koninkryk deur middel van die gedrukte woord. Sedert 1920 gebruik die Wagtoringgenootskap vrywilligers uit die geledere van die Getuies om tydskrifte en boeke vir verspreiding te druk. Dit verseker die betroubare vervaardiging van lektuur teen die laagste koste moontlik.

Ongeveer 60 jaar lank het die Genootskap sy vervaardiging van Bybellektuur ontwikkel en uitgebrei, eers in Brooklyn en daarna in ander lande. Al hierdie werk is deur ’n groeiende personeel vrywilligers gedoen.

Teen die einde van die sewentigerjare is die tradisionele metodes van set- en drukwerk in toenemende mate vervang deur rekenaarverwerking, fotosetwerk en vlakdruk. Die probleem was nou dat toerusting wat in die handel beskikbaar was slegs ’n beperkte aantal tale kon verwerk. Die Genootskap het egter reeds lektuur in ongeveer 160 tale gepubliseer, en nog tale moes bygevoeg word.

Gevolglik is vrywilligers ingeroep om ’n veeltalige elektroniese fotosetstelsel te ontwikkel. Die resultate was verblydend. Die nodige tegniese deurbrake is gemaak, en ’n stelsel vir tekstoevoer, opmaak en fotosetwerk, bekend as MEPS, is ontwikkel. Dit kan bykans 200 tale verwerk. Nog tale kan bygevoeg word.

Vandag word MEPS-tekstoevoer- en grafikaterminale, wat deur Jehovah se Getuies gebou is, in 25 lande gebruik, en verdere uitbreiding word in die vooruitsig gestel. Vrywilligers uit hierdie lande is opgelei om hierdie toerusting te bedien en in stand te hou. Die Genootskap druk nou tydskrifte in meer as 100 tale in 36 lande, en in 5 van hierdie lande word hardebandboeke en Bybels ook vervaardig.

Vir al hierdie werk is mense nodig—skrywers, vertalers, proeflesers, drukkers, boekbinders en versendingsklerke. Ander moet korrespondensie met die gemeentes behartig. Sommige produseer voedsel, berei maaltye voor, doen skoonmaakwerk, was wasgoed, ensovoorts. Dit word alles gedoen deur vrywillers wat hulleself in die verskillende lande beskikbaar stel. In 1985 het daar rondom die wêreld 8 438 vrywilligers by die verskillende kantore, drukkerye, huise en plase gewerk.

Wie is hierdie mense? Hulle is manne en vroue, getroud en ongetroud, jonk en oud, almal toegewyde getuies van Jehovah. Sommige doen hierdie werk al 40, 50 en selfs 60 jaar. Hulle bestee ’n gemiddelde van minstens 44 uur per week aan hulle werk, en werk oortyd wanneer nodig. Aande en naweke word gewy aan die verkondiging van die goeie nuus van huis tot huis en aan ander gemeentelike bedrywighede.

Rondom die wêreld word hierdie werkers voorsien van beskeie huisvesting en maaltye by een van die Genootskap se wooninrigtings, bekend as Bethelhuise. Daarbenewens ontvang hulle ’n klein toelae om hulle reiskoste in die bediening te dek, asook ’n klein bedraggie vir persoonlike behoeftes.

Sedert 1920 het hierdie vrywilligers meer as negemiljard Bybels, boeke, tydskrifte en pamflette in ongeveer 200 tale geproduseer vir wêreldwye verspreiding. Hulle doen hulle deel sodat die ewige evangelie aan alle nasies en stamme en tale en volke verkondig kan word.—Openbaring 14:6, 7.

• Watter drukwerk doen die Wagtoringgenootskap, en waarom?

• Wie doen al hierdie werk, en hoe lewe hulle?

[Prente op bladsy 24]

Vrywilligers verrig take in verband met vervaardiging van Bybellektuur in drukkery, huis, kantoor en op plaas, in Brooklyn en Wallkill, New York, V.S.A.

[Prente op bladsy 25]

Vrywilligers verrig allerlei take wat regstreeks of onregstreeks verband hou met vervaardiging van Bybels en Bybellektuur

Spanje

Duitsland

Finland

Kanada

Denemarke

Swede

Suid-Afrika

Brasilië

Nederland

Australië