Ons beskou die wêreld
Meer verslaafdes in Asië
In baie lande in Asië het heroïenverslawing drasties toegeneem. Sri Lanka het byvoorbeeld in 1980 minder as 50 bekende gevalle van heroïenverslawing gehad. Nou is daar ongeveer 40 000. Oor dieselfde tydperk het die getal verslaafdes in Pakistan van slegs ’n paar duisend tot 1,8 miljoen gestyg. Die tydskrif Asiaweek sê dat “swaarder strawwe nie daarin geslaag het om die toenemende dwelmhandel te laat afneem nie. Sri Lanka het een van die wêreld se swaarste vonnisse vir die besit van dwelms: twee gram heroïen of kokaïen beteken die doodsvonnis of lewenslange tronkstraf.” Die wins wat by die dwelmhandel betrokke is, is ’n groot dryfveer vir boere om van ander gesaaides na heroïenproduserende papawers oor te skakel. Dr. Ravi Pereira van Colombo se National Dangerous Drugs Control Board het gesê: “Wat daarvan as daar môre nie suiker is nie? Maar as daar nie heroïen is nie, sal mense rasend word. Hulle sal enigiets betaal om dit te kry.”
Cholera in Suid-Amerika
Volgens ’n skatting van die gesondheidsowerhede in Peru word gemiddeld tweeduisend mense elke dag in daardie land met cholera besmet. In Maart 1991 het Visión, ’n Latyns-Amerikaanse tydskrif, berig dat ’n cholera-epidemie in Peru binne slegs twee maande die lewens van sowat 200 mense geëis het en oor die 40 000 mense besmet het. Volgens die Ministerie van Gesondheid in Peru kan die aantal sterfgevalle tot sowat tienduisend styg. Carlos Ferreira, president van die Epidemiologiese Vereniging van Argentinië, het gesê dat die gevalle in Peru meer is as al die gevalle wat gedurende 1990 oor die hele wêreld aangemeld is. In die aangrensende lande Bolivia, Brasilië, Chili, Colombia, Ecuador en selfs tot in Mexiko in die noorde, tref die regering voorsorgmaatreëls teen die siekte. Mnr. Ferreira het bygevoeg: “Cholera is in Suid-Amerika en dit gaan baie lank hier bly.”
Ballonbedryf krimp
Dit is dalk vir baie mense opwindend om duisende helderkleurige ballonne stadig in die lug te sien opstyg tot hulle nie meer gesien kan word nie, maar dit is iets wat nie meer algemeen in die Verenigde State voorkom nie. Sedert daar in 1985 ’n ballon gevind is in die maag van ’n dooie walvis wat in New Jersey uitgespoel het en nog een in ’n dooie leerskilpad het kinders oor die hele land aangedring op ’n verbod op ballonne omdat hulle glo dat duisende diere dood is nadat hulle verlore ballonne geëet het. Wetgewers het ag geslaan op die kinders se versoek en heelparty state en stede het reeds ballonvrylatings verbied of beperk. Hoewel die bewerings oor dieresterftes deur die ballonbedryf betwis word, verloor ballonverkopers jaarliks glo R16,5 miljoen aan verkope.
Dood van die dolfyn
’n Onlangse studie toon dat “’n toenemende aantal van die wêreld se 65 spesies van walvisagtiges (seesoogdiere) op die randjie van uitsterwing is”, sê Perspectives, ’n tydskrif wat deur die International Institute for Environment and Development uitgegee word. Navorsers beweer dat meer as 500 000 dolfyne elke jaar doodgemaak word. Volgens die Environmental Investigation Agency wat die studie gemaak het, is die ergste oortreders Japan, Mexiko, Peru, Suid-Korea, Sri Lanka en Taiwan, “met Japan, wat meer as 100 000 walvisagtiges per jaar doodmaak, bo-aan die lys”. Die hoofoorsaak van hulle dood is dryfnette. Maar dolfyne word ook “geskiet, gesteek, met spiese deurboor, met hake en hoeke gevang, verdrink, op die strand gesleep, doodgeskok, met harpoene geskiet, gebombardeer en vermink”.
Sigaretadvertensies verbied
Tabakmaatskappye in Frankryk het ’n wet teen sigaretadvertensies ontduik deur hulle handelsname en slagspreuke te gebruik om tabakvrye produkte te adverteer. Sulke advertensies assosieer rook sonder uitsondering met tonele wat avontuur, sport en plesier uitbeeld. Die Franse regering het ’n nuwe wet aangeneem wat alle sigaretadvertensies vanaf 1 Januarie 1993 sal verbied. Die nuwe wet sal al sulke vorme van indirekte publisiteit, sowel as die borg van sportgeleenthede deur sigaretmaatskappye, verbied. Regeringsamptenare haal statistieke aan wat toon dat rook in Frankryk elke jaar oor die 60 000 vroeë sterfgevalle veroorsaak. Ongeveer driemiljoen mense sterf elke jaar wêreldwyd aan rookverwante siektes.
Vigs in Argentinië
Volgens die Argentynse koerant Clarín is een uit elke 500 mense in Buenos Aires met vigs besmet. Dr. Emilio Hass, president van die First Argentine Immunogenetics Center, het gesê dat “hierdie verhouding [teen] volgende jaar tot 4 besmette individue vir elke 1 000 burgers kan styg”. Een mediese bron het gesê dat baie hulle bloed skenk sodat hulle ’n gratis toets kan kry om uit te vind of hulle met vigs besmet is of nie. Dr. Hass het bygevoeg dat 36 000 sakkies bloed in een vooraanstaande hospitaal in Buenos Aires getoets is, en dit het aan die lig gebring dat 2 uit elke 1000 sakkies met die vigs-virus besmet was. Dr. Hass het gesê dat die aantal vigs-slagoffers in Buenos Aires “elke 13 maande verdubbel”.
Alkohol en werk
’n Vooraanstaande vakbond in Duitsland skat dat “een uit sewe werknemers in die Bondsrepubliek probleme met alkohol het”, berig die Süddeutsche Zeitung. Dit kos die Duitse gemeenskap elke jaar tussen 80 miljard en 190 miljard rand. Duitsers het in 1990 gemiddeld vier keer soveel alkohol as in 1950 gedrink. ’n Raadslid van die vakbond het gesê dat alkohol soos ’n dwelm geword het “waarmee mense hulle verdoof sodat hulle hulle werk en werksomgewing kan verdra”.
Wat is Genesis?
’n Godsdienstydskrif het ’n opname onder tienderjarige Italiaanse studente gedoen. Die uitslae was “ontstellend”, het die Italiaanse dagblad La Repubblica gesê. Die opname het aan die lig gebring dat 56 uit 100 studente nie eers een vers uit die Skrif gelees het sedert hulle eerste Nagmaal nie. Verder kon 83,4 persent van die studente nie “die verskil tussen die ou en die nuwe testament verduidelik nie”, en 75 persent het erken dat hulle nie eers ’n Bybel in hulle huis het nie. Volgens La Repubblica het 36 uit 100 studente die woord “Genesis” herken as die naam van ’n Engelse rockgroep maar nie as die eerste boek van die Bybel nie.
Nuttelose vuurwapens
As gevolg van die voortdurende misdaadbedreiging wend baie in Rome hulle tot meer as een manier van selfverdediging. Volgens La Repubblica gebruik mense honde wat opgelei is om aan te val, die Oosterse gevegskuns, chemiese spuitmiddels, dolke, kruisboë en degenstokke om aanvallers buite geveg te stel. Meer as 15 000 mense, mans sowel as vroue, het toestemming van die polisie verkry om vuurwapens te dra. La Repubblica het gesê dat dit, volgens Gianfranco Rodolico, Rome se afgevaardigde na die Italiaanse Vereniging van Skerpskutters, nutteloos is vir die gewone man om ’n wapen te dra. Hy het gesê: “Jy kan nie die hele tyd met ’n pistool in jou hand rondloop nie. As iemand my sou aanval, sal ek beslis nie tyd hê om dit uit te pluk nie.”
Mense wat haaie eet
Haaie word bedreig, veral aan die kus van Australië, Japan, Suid-Afrika en die Verenigde State. Die haaibevolking in hierdie gebiede verminder as gevolg van die toenemende gewildheid van haaivleis op die etenstafel. Volgens die tydskrif Time “het kommersiële haaivangste in die Verenigde State van minder as 500 ton in 1980 tot 7 144 ton in 1989 gestyg”. Haaivinne word in ’n sop gebruik wat in Asië as ’n lekkerny beskou word. Sommige restaurante vra tot R137 vir ’n bakkie van die gelatienagtige sop. Time sê dat die vissers, in ’n poging om die vinne in die hande te kry, “wreedaardig te werk gaan deur die haaie te vang, hulle vinne af te sny en die verminkte diere dan in die oseaan terug te gooi waar hulle doodgaan”.
“Die long van die mensdom”
’n Nuwe internasionale organisasie bekend as Parlamento Amazónico (Parlement van die Amasone) is onlangs in Suid-Amerika gestig. Die lede is regeringsamptenare en wetenskaplikes uit Bolivia, Brasilië, Colombia, Ecuador, Guyana, Peru, Suriname en Venezuela. Die doelwit van hierdie organisasie is om ’n verstandiger ontwikkeling aan te moedig van die Amasone-gebied, wat sowat 7 miljoen vierkante kilometer beslaan en die tuiste van meer as 150 miljoen mense in agt lande is. Die Argentynse koerant La Nación het gesê dat die Parlement van die Amasone die Amasone-gebied “die long van die mensdom” genoem het. Aangaande die 400 000 vierkante kilometer oerwoud wat in die laaste jare vernietig is, het woordvoerders vir die organisasie gesê dat “hoewel daar dalk groot geld daarby betrokke kan wees, die geld nutteloos sal wees as die planeet onbewoonbaar word, wat binnekort gaan gebeur indien hierdie vernietiging nie beëindig word nie”.