Die vis vir wie niemand lief is nie
IS DIE haai jou geliefkoosde vis? Waarskynlik nie. Vir die meeste mense is die haai geen gunsteling nie, hoewel hy party mense voorsien van hulle geliefkoosde ete, hulle geliefkoosde soort leer of miskien die geliefkoosde vis om voor te hengel. Al hoe meer haaie word om sulke redes doodgemaak. U.S.News & World Report merk op dat die jaarlikse haaivangste in net die Golf van Mexiko, die Karibiese See en aan die ooskus van die Verenigde State in die laaste tien jaar met 1 000 persent gestyg het!
As jy geen uitroep vir die beskerming van die haai gehoor het nie, behoort dit jou nie te verbaas nie. Trouens, baie mense beskou die haai as ’n bedreiging, ’n onverbiddelike vreetmasjien met min op die brein behalwe ’n drang om sy kake in mense in te sink. Maar hoewel haai-aanvalle wel voorkom, is hulle nie so volop soos die verskaffers van bangmaakrolprente jou wil laat dink nie.
Volgens die U.S.News & World Report “word minder as 100 [haai-aanvalle] elke jaar wêreldwyd gerapporteer, en nie baie is noodlottig nie”. Boonop is nie alle haaie die soort wat mense sal aanval nie. Spesies wissel in lengte van 10 sentimeter tot 18 meter, en in gewig van minder as 28 gram tot 14 000 kilogram! Ongeveer 90 persent van die 300 spesies (die heel grootste ingesluit) hou geen gevaar vir mense in nie.
En haaie is waardevol. Soos stofsuiers onder die see speel hulle ’n belangrike rol om die oseane skoon te hou deur siek seediere en afval te vreet. Wetenskaplikes bestudeer hulle immuunstelsel ywerig, omdat dit lyk asof haaie nie kanker of ernstige infeksies kry nie. Tog is dit nie asof niks ’n gevaar vir haaie inhou nie. Hulle teel stadig aan (hulle kry maar twee kleintjies per jaar), en daarom vermeerder hulle dalk nie vinnig wanneer hulle uitgedun word nie.
Gelukkig vind die haai uiteindelik ’n paar vriende. Die Amerikaanse Nasionale Seevissery het ’n plan van 100 bladsye opgestel om die vis te beskerm waarin gevra word dat ’n perk gestel word op die hoeveelheid haaie wat deur mense gevang mag word. Natuurlik het niemand nog ’n perk voorgestel op die hoeveelheid mense wat deur haaie gevang mag word nie; maar die Skepper van die mens sowel as die haai belowe ’n tyd wanneer sy mensekinders niks op hierdie aarde sal hoef te vrees nie.—Jesaja 11:6-9.
[Foto-erkenning op bladsy 31]
N. Orabona/H. Armstrong Roberts