Van ons lesers
Kinders van geskeide ouers Ek en my vrou is al drie jaar lank uitmekaar, en ek verlang baie na my kind. Maar dit is die kinders wat ly, en ons as ouers moet meer hieroor nadink. Ek is seker daarvan dat ek twee maal sou gedink het voor ek my vrou verlaat het as ek die reeks “Hulp vir kinders van geskeide ouers” (22 April 1991) gelees het terwyl ons nog bymekaar was.
S. C. M. F., Brasilië
Barrièrerif Ek het by die skool die taak gehad om navorsing oor korale te doen. Maar ek het nie geweet waar om na breedvoerige en saaklike informasie te soek nie. Dit was ’n groot verrassing vir my om die artikel “’n Besoek aan die Groot Barrièrerif” (8 Junie 1991) te sien. Dit was net wat ek nodig gehad het! Ek het daardie informasie gebruik en die hoogste punte behaal. Baie dankie vir julle waardevolle hulp.
M. M. T., Argentinië
Kinderopvoeding Die artikel “Kinderopvoeding in alle wêrelddele—ouersorg deur liefde, dissipline, voorbeeld en geestelike waardes” (22 September 1991) was ’n groot aanmoediging vir my as ’n nuwe student van die Bybel. Toe ons Christelike vergaderinge begin bywoon het, het my seun hom ongemanierd gedra en soos ’n waansinnige gehuil. Maar met die hulp van die Christin wat met ons studeer en die aanmoediging van die tydskrifte wat julle druk, behaal ek goeie resultate. My seun van twee en ’n half sit nou stil gedurende die vergaderinge en hy gee selfs kort antwoorde.
M. T., Japan
Skinderpraatjies Ek het baie geskinder. Maar ek het eendag van die skool af tuisgekom en die reeks “Skinderpraatjies—Hoe om te vermy dat jy seerkry” gelees (8 Junie 1991). Met julle hulp kon ek daardie slegte gewoonte aflê. Ek het glad nie geweet dat skinderpraatjies so ernstig is en dat dit iemand se reputasie kan verwoes nie. Ek is so dankbaar vir hierdie informasie.
F. B., Verenigde State
Die artikels het my letterlik my werk laat behou. ’n Gerug het die rondte gedoen dat hulle die fabriek waar ek werk, gaan sluit en ek het dit oorvertel. Voor die dag verby was, is ek na my opsiener se kantoor ontbied. Hy het vir my gesê dat ek skinder en dat die verspreiding van sulke gerugte mense net sou laat skrik omdat werkgeleenthede skaars is. Daar is al mense by my werk ontslaan, en ek het tot die gevolgtrekking gekom dat dit hulle verskoning is om van my ontslae te raak. Toe ek die Ontwaak! oor skinderpraatjies ontvang, het ek dit as raad van bo beskou. Ek het dit vir my opsiener gewys en vir hom gesê wat ek geleer het en dat ek alles in my vermoë sal doen om nie by skinderpraatjies betrokke te raak nie. Hy het my bedank—en ek het nog my werk.
L. G., Verenigde State
Estrogeenvervanging Ek is dankbaar vir die artikel “Estrogeenvervangingsterapie—Is dit vir jou?” (22 September 1991). Ek was verbaas oor die duidelikheid daarvan. Ek word nou vir osteoporose behandel en ontvang al vier jaar lank estrogeenvervangingsterapie. Maar dit is nou vir my makliker om met my dokter oor dinge te praat en my probleme met meer optimisme onder die oë te sien. Baie dankie.
R. C. S. M., Brasilië
Leer om musiekinstrumente te speel Ek wil julle graag bedank vir die artikel “As ek maar so kon speel!” in die nommer van 8 September 1991. Ek is nou in standerd vyf en ek leer om die elektriese orrel te speel. Twee jaar is reeds verby, en hoewel ek al ’n bietjie vordering moet toon, is dit nie die geval nie. By hierdie jaar se musiekuitvoering was my spel vol foute. Dit was verskriklik. Hierdie artikel was vir my liefdevolle en tydige raad.
M. O., Japan