Van ons lesers
Skinderpraatjies Dankie vir julle tydige artikels oor skinderpraatjies (8 Junie 1991). Ek was onlangs die slagoffer van kwaadwillige skinderpraatjies, en ek kon sake in die reine bring met die persoon wat oor my geskinder het deur die skriftuurlike beginsel in Mattheüs 18:15-17 toe te pas.
B. C., Australië
Ek het gedink dat die artikels baie leersaam was en goed geskryf is. Maar ek was verbaas oor die foto’s wat julle gebruik het. Vier van hulle beeld vroue uit wat skinder. Die onuitgesproke boodskap is dat skinder ’n kenmerk van vroue is.
H. W., Verenigde State
Ons het nie bedoel om vroue of mans op ’n negatiewe manier voor te stel nie. Twee van die foto’s was van mans wat skinder. ’n Ander foto was van twee vroue wat in ’n opbouende gesprek betrokke is. ’n Vrou is ook uitgebeeld wat weier om selfs na skinderpraatjies te luister.—RED.
Bendes Ek het nou net my nommer van 8 Junie 1991 ontvang met die artikel “Jongmense vra . . . Moet ek by ’n bende aansluit?” Daar was tye toe ek en my man werklik bekommerd was oor ons jongste kind, vir wie die bendes aantrekkingskrag gehad het. Sy het soos hulle begin aantrek en hulle grimering en haardrag nageboots. Ons het nie besef wat aangaan tot dit amper te laat was nie. Gelukkig kon ons haar van die slegte invloed af wegkry. Ek hoop julle artikel sal van hulp wees. Is julle van plan om meer oor hierdie onderwerp te publiseer?
D. N., Verenigde State
Sien ons nommer van 22 Julie 1991.—RED.
Longe Ek moet julle net bedank vir die artikel “Die longe—wonderlik ontwerp” (8 Junie 1991). Dit het my met verwondering vir Jehovah God se wonderlike werk vervul. Die artikel is meesterlik geskryf en het my op ’n besonder eenvoudige wyse gehelp om dinge wat uiters ingewikkeld is, te verstaan.
B. T. A., Brasilië
Loterykoors Julle artikels oor ‘Loterykoors’ (8 Mei 1991) het my laat dink aan die tyd voor ek ’n Christen geword het, toe ek vriende gehad het wat gedobbel het. Een is tronk toe gestuur vir vervalsing weens dobbelary. ’n Ander een is deur woekeraars geslaan en daardeur verlam omdat hy nie ’n lening terugbetaal het nie. Dobbelary ruïneer werklik mense se lewe.
R. B., Verenigde State
Kameras Ek het onlangs ’n kamera gekoop met ’n verstelbare lensopening en sluiterspoed, maar ek kon die handleiding nie mooi verstaan nie. Julle artikel “Herinneringe—Deur net ’n knoppie te druk!” (8 Julie 1991) het my vrae beantwoord. Dankie dat julle tegniese sake op ’n maklik verstaanbare manier verduidelik.
S. H., Japan
Japannese gasvryheid Ek het die artikel “’n Aand saam met ’n Japannese gesin” (22 April 1991) geniet. Ek is verskriklik bang om te vlieg en daarom reis ek nie. Maar julle artikel was so lewensgetrou en genotvol dat ek in my geestesoog kon reis—sonder om te vlieg.
K. R., Verenigde State
Rockgroepe Hierdie brief handel oor julle artikel “Obseniteit in musiek” (8 Maart 1991). Die eerste sin van die artikel praat van ‘die heilige roeping van rockgroepe—om ouers te skok’. Ek kan aan baie populêre rockgroepe dink wat goeie, positiewe musiek maak. Miskien moes julle van “sommige” rockgroepe gepraat het.
L. H., Verenigde State
Ons het nie alle moderne musiek veroordeel nie. Die sin waarna jy verwys, was ’n direkte aanhaling uit die tydskrif “U.S.News & World Report”. Later het die artikel gesê dat die spesifieke groepe onder bespreking “ver van die hoofstroom af” is. Ons het ook gesê dat “sommige” hedendaagse musiek—nie alles nie—aanstootlik is.—RED.