Noodsaaklik om vroeg te begin

JONG kinders het die reg op ’n redelik deeglike verduideliking van hoe hulle liggame werk en hoe om hulleself teen onsedelike mense te beskerm. Maar wanneer moet die onderrig begin? Vroeër as wat baie mense besef.

Adolessensie begin by puberteit, die ouderdom waartydens tekens van seksuele rypheid te voorskyn tree. ’n Meisie menstrueer dalk vir die eerste keer op die ouderdom van 10 of selfs vroeër of eers op 16 of later. ’n Seun het dalk reeds op 11 of 12 sy eerste nagtelike saaduitstorting. Sal jou kinders voor daardie tyd, dalk op die ouderdom van nege, daarop voorbereid wees?a Sal hulle ook op daardie jong ouderdom weet hoe belangrik dit is dat hulle hul maagdelikheid behou?

Vertel hulle van liggaamlike veranderinge

Jou dogter het die reg om te weet van die godgegewe veranderinge wat in haar liggaam sal plaasvind. ’n Ma kan haar maandstonde meld en vir haar dogter wys watter soort beskerming sy gebruik. Sy moet verduidelik dat hierdie veranderinge normale liggaamsprosesse is. Op ’n baie positiewe manier kan ’n ma verduidelik dat haar dogter se liggaam hom sal voorberei vir die tyd, jare van nou af, wanneer sy dalk sal trou en self ’n ma sal word. ’n Ma kan aan haar dogter verduidelik dat die liggaam ’n spesiale, sagte, sponsagtige voering wat ryk aan bloedvate is in die baarmoeder vir die baba voorberei. As ’n baba nie verwek word nie, sal die voering deur die vagina uitgewerp word, en hierdie proses word menstruasie genoem.

Jou seun moet eweneens vooraf weet van nagtelike saaduitstortings, of nat drome (Deuteronomium 23:10, 11). Hy moet verstaan dat die uitstorting van ’n vloeistof wanneer hy partykeer droom maar net die liggaam se manier is om van opgehoopte sperma ontslae te raak. Jou seuns sowel as jou dogters moet weet dat daar niks verkeerd is met hierdie veranderinge in hulle liggaam nie. Hulle liggame word maar net voorberei vir ’n moontlike toekomstige huwelik en ouerskap.b

As ouers moet julle hierdie sake ernstig opneem, want dit is heilige sake. En julle is die onderrigters wat God aangestel het.

Wat is veilige seks?

Namate die jare verbysnel en jou kinders hulle tienderjare bereik, moet jy seker maak dat hulle weet dat seks tussen ongetroude mense gevaarlik is, ongeag watter besware hulle hierteen hoor. Seksueel oordraagbare siektes, waaronder vigs, het ’n wêreldplaag geword. Sulke siektes kan onvrugbaarheid, gebreke by geboorte, kanker en selfs die dood tot gevolg hê. Daarbenewens kan hulle oorgedra word deur mense wat nie eers daarvan bewus is dat hulle besmet is nie.

Jou kinders moet besef dat geen metode van geboortebeperking al volkome daarin geslaag het om swangerskap te voorkom of te keer dat siektes oorgedra word nie. Trouens, ’n verbasende groot getal jongmense wat verskeie vorme van geboortebeperking gebruik, raak swanger. En hoewel kondome aanbeveel word as ’n voorsorgmaatreël om jou teen vigs van ’n besmette seksmaat te beskerm, het The New England Journal of Medicine berig dat kondome tot 17 persent van die tyd nie keer dat die vigs-virus oorgedra word nie.

Daarom het die New York Post se rubriekskrywer Ray Kerrison die bewering weerspreek dat kondome ‘die gevaar om vigs op te doen tot ’n minimum verlaag’ deur te skryf: “Wat ’n minimum. As jy ’n patroon in ’n rewolwer sit, die kamer spin en Russiese roulette speel, het jy ’n kans van een uit ses om jouself dood te skiet. Met ’n kondoom het jy ’n kans van feitlik een uit vyf om vigs te kry. Dit is nou vir ons moontlik om die kondoom-vigs-klug sy regte naam te gee. Dit is seksuele roulette.”

Jou kinders moet weet dat die oplossing vir die probleem van seksueel oordraagbare siektes eenvoudig is. Die oplossing is om God se reëling te aanvaar vir die gebruik van die goddelike gawe van voortplanting. Ja, jy kan alleenlik in die huwelik op ’n veilige manier uiting gee aan jou seksualiteit, ideaal gesien in ’n lewenslange verbintenis met een beminde persoon wat ook geen ander seksmaat gehad het nie.

God se voorskrifte is ’n beskerming

Die Bybel sê: “Die man [moet] . . . sy vrou aankleef.” “Jy mag nie egbreek nie.” “Hoerery . . . moet onder julle selfs nie genoem word nie.” “Geen hoereerder [het] . . . ’n erfdeel . . . in die koninkryk van Christus en van God nie.”—Genesis 2:24; Mattheüs 5:27; Efesiërs 5:3, 5.

Hierdie voorskrifte is nie onderdrukkend nie. Inteendeel, as jy hulle nakom, sal dit tot ’n gelukkige, hegte gesin lei. Die ongebore kind sal voorsien word van iets waarop hy geregtig is—twee ouers, ’n ma en ’n pa. Elkeen het verskillende eienskappe, en elkeen kan dinge tot die kind se lewe bydra wat die ander een nie het nie.

As ouers moet julle Bybelbeginsels stewig in julle kind se hart en verstand inprent deur julle onderrigting sowel as deur julle voorbeeld. Jy moet met stewige materiale bou—vuurvaste materiale. Soos die Bybel sê: “Elkeen se werk sal aan die lig kom, want die dag sal dit aanwys, omdat dit deur vuur openbaar gemaak word; en die vuur sal elkeen se werk op die proef stel, hoedanig dit is.” As jy stewig bou en jou werk vasstaan, sal jy ryklik beloon word.—1 Korinthiërs 3:13.

Maar die belangrike vraag is steeds: Hoe kan jy hierdie opleiding versterk wanneer jou kinders hulle tienderjare deurmaak en tot volwassenheid groei?

[Voetnote]

[Prent op bladsy 8]

Dit is belangrik om jou kind op liggaamlike veranderinge voor te berei