Gee hulle die nodige leiding
WAAR kan jou kinders leer hoe om hulself teen die wêreld se toenemende onsedelikheid te beskerm? Nie op televisie nie, wat deur een groep jongmense as hulle vierde belangrikste inligtingsbron oor seksualiteit bestempel is. Nie by die skool nie, waar dít wat onderwysers leer die veranderende waardes en standaarde van hierdie onsedelike wêreld weerspieël. En beslis nie uit die stories wat jou kinders se skoolmaats vertel nie.
As jy sukses wil behaal wat sedelike opvoeding en jou gesinslewe betref, moet dit tuis begin. Dit is soos een besorgde hoërskoolonderwyseres gesê het: “Iemand moet die moed hê om te sê: ‘Luister hier, julle sal niks oorkom as julle wag totdat julle getroud is nie!’”
Het jy jou kinders dit geleer? Wonder jy soms, met die oorvloed van seksuele stof waardeur ons omring word, of jy selfs weet hoe om hulle te leer?
Die uitwerking wat jou voorbeeld het
Net soos jou ouers jou lewe beïnvloed het deur die wyse waarop hulle geleef het, net so kan jou voorbeeld ’n kragtige uitwerking op jou kinders se lewe hê. Dit onthul hoe lief jy hulle het en watter soort mense jy wil hê hulle moet wees.
As jy voor jou troue ’n maagd was, kan jy vir jou kinders vertel hoe gelukkig dit jou gemaak het. ’n Oupa onthou nog die dag, byna 60 jaar gelede, toe sy eie pa vir hom vertel het watter vreugde dit was om te trou met die wete dat hy hom nie skuldig gemaak het aan enige onsedelike gedrag wat later opgehaal kon word om sy huwelik te skaad nie. Daardie gesprek het ’n groot invloed gehad op die manier waarop hierdie oupa geleef het, en hy glo dat sy eie voorbeeld ’n kragtige invloed op sy kinders se lewe gehad het.
Maar as jou kinders weet dat jy vroeër nie ’n voorbeeldige lewe gelei het nie, moet jy seker maak dat hulle weet waarom jy verander het. Dit is nie net omdat jy ouer is nie, maar omdat jy hoër standaarde gevind het waarvolgens jy leef.
’n Kwaliteitluisteraar
Ouers wat sukses behaal het, sê dikwels hoe baie tyd hulle daaraan bestee om na hulle kinders te luister. Hulle weet wat in hulle kinders se lewe gebeur. Karen het haar dit ten doel gestel om smiddae in die kombuis te werk. Sodoende kon haar dogters, wanneer hulle tuiskom, met haar oor die dag se gebeure by die skool praat.
Erline het gewoonlik vir haar dogters gewag wanneer hulle saans tuiskom en dan het sy geluister terwyl hulle vertel wat hulle daardie dag gedoen het. “As ek hulle moes reghelp”, het sy gesê, “kon ek dit later doen. Maar ek sou nooit geweet het dat dit nodig was as ek nie geluister het nie.” Sy het hierdie kommunikasie behou terwyl haar dogters op skool was en gedurende hulle hofmakery. As jy sulke tyd saam met jou kinders deurbring, kan dit later baie hartseer voorkom.
Maar sê nou jou kinders is nie baie spraaksaam nie? In daardie geval kan jy jou afvra: ‘Is hulle maar net van nature stil of is hulle bang om iets te sê as gevolg van my optrede in die verlede? Kan ek weer hulle vertroue win deur nou spesiale pogings aan te wend om my belangstelling in hulle te toon? Kan ek dit vir hulle makliker maak om nou oor kleiner dinge en miskien later oor ernstiger sake te praat?’
Belangrike waarskuwings
Jou kinders moet gewaarsku word oor die gevolge van onsedelikheid. Hulle moet byvoorbeeld weet dat, ten spyte van alles wat hulle hoor, geen voorbehoedmiddel onfeilbaar is nie. Ongewenste swangerskappe en seksueel oordraagbare siektes kom dikwels voor, selfs wanneer voorbehoedmiddels gebruik word. Volgens die organisasie Beplande Ouerskap faal kondome in 12 persent van die gevalle waarin hulle gebruik word om swangerskap te voorkom en is hulle waarskynlik nog minder geslaagd om te voorkom dat die vigs-virus oorgedra word.
Dit lyk asof baie jongmense daarvan oortuig is dat rampe hulle nooit sal tref nie. Maar seksueel oordraagbare siektes, waaronder vigs, kan oorgedra word deur mense wat nog geen simptome daarvan toon nie en wat nie weet dat hulle dit aan ander oordra nie. Baie van hierdie siektes wat jongmense vandag teister, kan onvrugbaarheid, geboortegebreke, kanker en selfs die dood veroorsaak.
Neem as voorbeeld die 40 miljoen Amerikaners wat nou na bewering net een van hierdie siektes, genitale herpes, het waarvoor daar geen geneesmiddel bestaan nie. Besmette moeders kan dit aan hulle babas oordra. Hierdie onskuldige kinders kan dan verstandelik vertraag word, blywende skade aan hulle sentrale senuweestelsel opdoen of aan ernstige infeksies van hulle inwendige organe sterf. Wat ’n duur prys om te betaal vir ’n paar oomblikke se plesier!
Die geslagsonsedelikheid waardeur hierdie siekte oorgedra is, was dalk nie eers pret nie. ’n Navorser wat baie jongmense ondervra het, het gesê dat “meisies twee keer meer negatiewe as positiewe [seksuele] ervaringe gedurende hulle tienderjare het”. Ouers moet dit by hulle kinders inskerp dat geslagsomgang—die wonderlike manier waarop ons Skepper bedoel het dat ons pragtige aarde bevolk moes word—nie in die geheim buite die huwelik moet plaasvind nie.
Leiding wat hulle veral nodig het
Jou kinders moet besef dat die handhawing van die beginsels wat God vasgestel het en wat deur die tyd beproef is die enigste betroubare manier is waarop die probleme wat voorhuwelikse geslagsomgang meebring, voorkom kan word. Watter beginsels is dit? Geen geslagsomgang voor die huwelik nie, en dan blywende en lewenslange getrouheid aan daardie een geliefde mens wat verkieslik ook geen ander seksmaat gehad het nie.
Maar die hoofrede waarom ons vir onsedelikheid moet vlug, is nie omdat dit probleme veroorsaak nie, maar omdat ons Skepper sê dat dit verkeerd is. Die Bybel vermaan ons: ‘Onthou julle van die hoerery.’ “Vlug vir die hoerery.” Waarom? Omdat diegene wat aanhou om hierdie dinge te beoefen “die koninkryk van God nie sal beërwe nie”.—1 Thessalonicense 4:3; 1 Korinthiërs 6:9, 10, 18.
Wanneer jy goddelike beginsels handhaaf, lei dit tot ’n gelukkiger, bevredigender lewe. Dit beskerm ons teen seksueel oordraagbare siektes, ongewenste swangerskappe, die probleme van eenouergesinne en die hartseer wanneer jy deur mense in die steek gelaat word wat jou vir hulle eie selfsugtige doel misbruik het.
Die woorde wat deur ’n eertydse profeet van God opgeteken is en al meer as 2500 jaar lank waar bewys is, lui soos volg: “Ek is die HERE jou God, wat jou leer wat heilsaam is, wat jou lei op die weg wat jy moet gaan. Ag, as jy maar na my gebooie geluister het, dan sou jou vrede gewees het soos ’n rivier en jou geregtigheid soos die golwe van die see.”—Jesaja 48:17, 18.
Maar hoe kan hierdie sedelike beginsels van toepassing wees op die hedendaagse gebruik om afsprake te maak? Ons sal daardie vraag vervolgens bespreek.