Iets beters as om iets verniet te kry

FEITLIK alle dobbelaars is op die ou end armer as wat hulle was voor hulle begin dobbel het. Selfs die paar wat wel groot bedrae geld wen, vind dikwels dat hulle prysgeld nie ’n paspoort tot geluk is nie.

’n Vrygesel van 36 in Japan het R124000 in ’n lotery gewen. Hy was van plan om ’n huis met sy prysgeld te koop, maar hy was die voorwerp van soveel jaloesie en skinderpraatjies dat hy besluit het dat dit net nie die moeite werd is nie. Tot die verstomming van sy werkmaats het hy sy wenkaartjie voor hulle oë verbrand.

Die polisie in Florida het ’n vrou gearresteer wat, ondanks die feit dat sy R14 miljoen in ’n lotery gewen het, beplan het om haar skoondogter te vermoor. Haar seun het gesê dat sy desperaat was, aangesien sy besig was om haar fortuin te verloor omdat sy verkeerd belê en buitensporig gespandeer het.

’n Verloorder wat ’n wenner geword het

Domingo was ’n kompulsiewe dobbelaar en ’n vader van vyf kinders. Hy verduidelik: “Dit was erger wanneer ek gewen het. Ek het gedink ek was die een of ander genie, en ek kon nie wag om weer by die dobbeltafels uit te kom om te bewys dat dit nie ’n gelukskoot was nie.

“Toe hierdie obsessie by my posgevat het, was dit asof ek bedwelmd was. Ek was bereid om my vrou en kinders te verlaat net sodat ek kon aanhou dobbel. Hoewel ek my vrou herhaaldelik belowe het dat ek nooit weer sou dobbel nie, het ek in my hart geweet dat dit ydele beloftes was. Ek onthou nog hoe ek my vrou eenkeer verseker het dat ek vir altyd klaar was met dobbelary, terwyl ek op daardie selfde oomblik planne beraam het om dobbelgeld in die hande te kry.

“Ek het al my geld, my vrou se geld en my sakeonderneming verloor, en ek was diep in die skuld. Daar het nie ’n dag verbygegaan dat ek nie die een of ander weddenskap aangegaan het nie, totdat iets gebeur het wat my gedwing het om myself krities in oënskou te neem. Ek het die Bybel saam met Jehovah se Getuies begin studeer. Ek was beïndruk deur wat ek geleer het, maar ek het nie dadelik opgehou dobbel nie. Ek is dankbaar dat die Getuie wat met my gestudeer het so geduldig was.

“Maar die Bybel se boodskap het my spoedig begin beïnvloed. Dit het my gehelp om my droomwêreld agter te laat en myself te sien soos God my sien. Dit was ’n skok. Ek het diep beskaamd gevoel, soos diegene aan wie die apostel Paulus in die eerste eeu geskryf het: “Watter vrug dan het julle toe gehad van die dinge waaroor julle jul nou skaam? Want die uiteinde daarvan is die dood.”—Romeine 6:21.

“Om God, sy naam en sy persoonlikheid te leer ken en veral van sy genade te leer, het my beweeg om my lewenswyse te wil verander, om eerder aan ander as aan myself te dink. Ek het uiteindelik heeltemal met die dobbelgewoonte gebreek, en ek en my vrou is gedoop.

“Jesus het gesê dat die waarheid ons sal vrymaak (Johannes 8:32). Dit was beslis in my geval waar. Dit was die waarheid van God se Woord wat my iets lonends gegee het om voor te lewe en my weer my selfrespek, asook groot voldoening gegee het. Ek kon selfs een van my vorige dobbelvriende help om sy lewe te verander net soos ek gedoen het. Toe hy en sy vrou gedoop is, was ek meer opgewonde daaroor as oor enige wenslag wat ek ooit tydens my dobbelary gehad het.

“Ek het die afgelope 20 jaar niks verwed nie, nie eens ’n klein bedraggie nie. Ek kan nie sê dat dit maklik was nie, maar dit was ook nie só moeilik nie. En dit wat God my gegee het, het oorvloedig in daardie behoeftes voorsien wat ek deur dobbelary probeer bevredig het.”a

Die skriftuurlike beskouing is van die grootste belang vir diegene wat graag die wil van God wil doen. En diegene wat God se raad volg, vermy nie alleen die smart wat dobbelary kan meebring nie, maar vind ook dat hy hulle iets bied wat enige wenslag in dobbelary ver oortref.

’n Rykdom wat veel groter waarde het

Toe Paulus in die eerste eeu aan Timotheüs geskryf het, het hy gesê: ‘Waarsku hulle om nie hulle hoop op die onsekerheid van rykdom te vestig nie, maar op God wat alles ryklik aan ons gee om te geniet. Spoor hulle aan om goed te doen, vrygewig en mededeelsaam te wees. So vergader hulle vir hulle ’n skat as ’n goeie belegging vir die toekoms, sodat hulle die ware lewe sal verkry.’—1 Timotheüs 6:17-19, NAV.

Een skat wat ’n mens wil verkry, is ’n goeie naam by God. Dit lei tot “die ware lewe”—die ewige lewe, die grootste prys wat nóg aangebied is. Jesus het in gebed tot God gesê: “Dit is die ewige lewe, dat hulle U ken, die enige waaragtige God, en Jesus Christus wat U gestuur het.”—Johannes 17:3.

Anders as geldpryse waarop ons nie kan vertrou nie, kan die prys wat God aanbied deur enigiemand gewen word wat God se wil doen. As ’n mens God se wil doen, bied dit boonop al die opwinding wat ’n mens kan begeer, en dit gee die persoon selfrespek en ’n sinvolle lewe. Intussen moet ’n mens, met die oog op die hoë prys van dobbelary, die raad van ’n ou Engelse spreuk in gedagte hou: “Die beste gooi van die dobbelstene is om hulle weg te gooi.”

[Voetnoot]

[Prent op bladsy 10]

Die ewige lewe op ’n paradysaarde is ’n baie groter prys as enige prys wat ’n mens deur dobbelary kan wen