Jongmense vra . . .

Waarom moet ek anders wees?

“DIS moeilik om anders te wees.” Dit is wat een jong Christen gesê het. As jy ook ’n Christen is, weet jy ongetwyfeld presies hoe hy voel. Soos die meeste jongmense wil jy graag hê dat ander van jou moet hou en jou moet aanvaar. Die probleem is dat jy gewoonlik soos hulle moet wees om aanvaar te word—jy moet soos jou portuurs praat, aantrek en optree. ’n Jongmens wat dit waag om anders te wees, stel hom aan sosiale uitsluiting en bespotting bloot.

Jongmense wat Getuies van Jehovah is, kom gevolglik voor ’n netelige situasie te staan. As Christene is hulle eenvoudig anders as ander jongmense. Dit is nie omdat hulle ’n meerderwaardigheidsgevoel het of dink dat hulle beter as ander mense is nie. Maar as gevolg van hulle Bybelopleiding stem hulle dikwels nie met hul portuurs saam oor sedes nie. Hulle sienswyse van patriotiese seremonies, die viering van feesdae asook afsprake kan hulle eweneens by hul portuurs laat afsteek.a

Een jong Getuiemeisie sê “die moeilikste deel van ’n Christen se lewe” is om anders te wees. ’n Ander jong man sê: “Die kinders sien op jou neer. Ek is dikwels ’n melkdermpie en ’n sissy genoem.” Jou Christenouers kan boonop daarop aandring dat nie net jou sedelike gedrag anders moet wees nie, maar ook jou kleredrag, persoonsversorging en musieksmaak.

God se volk is anders!

Jy wonder dalk: ‘Waarom is dit dan so verkeerd om soos ander kinders te wees?’ Wel, God se volk was heel van die begin af kenmerkend anders. God het vroeër eertydse Israel gekies om sy “spesiale eiendom” te word (Exodus 19:5, NW). Dit het beteken dat hulle anders as al die ander volke moes wees. In Levitikus 18:3 het God beveel: “Volgens die werke van die land van Egipte waar julle in gewoon het, mag julle nie doen nie; en volgens die werke van die land Kanaän waarheen Ek julle bring, mag julle nie doen nie, en julle mag in hulle insettinge nie wandel nie.”

Die eertydse Egiptenare was diep betrokke by skandelike diere-aanbidding. Geloof in die onsterflikheid van die siel het hulle lewe oorheers. Bloedskande was ’n alledaagse verskynsel. Die land Kanaän was ook deurdrenk van afgodediens, verdorwe geslagsgebruike, bloedvergieting, kinderofferandes en prostitusie. “Verontreinig julle nie deur al hierdie dinge nie”, het God gevolglik gewaarsku. “[Júlle moet] niks van al hierdie gruwels doen nie.”—Levitikus 18:24-26.

Jehovah het hierdie vermaning met ’n Wet bevestig wat as riglyn gedien het in feitlik elke aspek van hulle lewe: hulle voedsel (Levitikus 11), hulle higiëne (Deuteronomium 23:12, 13) en hulle seksuele gebruike (Levitikus 18:6-23). Die Wet het selfs hulle kleredrag en persoonsversorging bepaal! “Hulle moet vir hulle klossies maak aan die hoeke van hul klere, in hulle geslagte”, het Jehovah gesê, “en aan die hoekklossies ’n draad van pers stof vasbind” (Numeri 15:38). Mans moes ’n baard dra en was verbied om hulle “wangbaarde” af te sny (Levitikus 19:27, NW; 21:5). Hulle moes hierdie wet gehoorsaam selfs as ’n Jood nie van klossies gehou het nie of die gladgeskeerde voorkoms verkies het.

Stel jou net voor as daar aan jou gesê word dat jy ’n baard en sekere klere moet dra. Sal jy nie gegrief voel en dink dat daar op jou persoonlike regte inbreuk gemaak word nie? Maar God se wette was vir hulle belangrik en nuttig. Jehovah het verduidelik: “Sodat julle aan al my gebooie mag dink en dit doen, en aan julle God heilig mag wees. Ek is die HERE julle God” (Numeri 15:38-41). Die Jode se kleredrag was ’n kragtige, sigbare herinnering aan die feit dat hulle anders was—’n volk wat deur Jehovah as heilig uitverkies was. Die beperkings op sekere kos het nie net hulle gesondheid bevoordeel nie, maar het gehelp dat hulle nie sosiaal of godsdienstig by nie-Jode betrokke geraak het nie. Ja, dit was feitlik onmoontlik om met ’n heiden om te gaan sonder om die een of ander aspek van God se Wet te verbreek. Die Mosaïese Wet het dus as ’n “muur” gedien om Sy volk afgeskeie van ander nasies te hou.—Vergelyk Efesiërs 2:14.

Christene moet anders wees

Hedendaagse Christene “is ontslae van die wet” van Moses en geniet aansienlike vryheid wat hulle persoonlike voorkeure betref (Romeine 7:6). Jesus Christus het nietemin vir sy volgelinge gesê: “Omdat julle nie van die wêreld is nie, maar Ek julle uit die wêreld uitverkies het, daarom haat die wêreld julle” (Johannes 15:19). Jesus het nie gesê dat Christene die planeet Aarde moes verlaat nie. (Vergelyk 1 Korinthiërs 5:10.) Hy het eenvoudig bedoel dat hulle afgeskeie moes wees van “die wêreld”—die deel van die mensdom wat van God vervreemd is. Waarom? Omdat “die hele wêreld in die mag van die Bose lê”, soos die apostel Johannes later gesê het.—1 Johannes 5:19.

Kyk nou na party van die jongmense op skool wat jy ken. Wat kan jy sê oor hulle sienswyse, hulle gedrag, hulle taal asook hulle musiek- of kleresmaak? Lyk dit vir jou asof sulke jongmense deur goddelike standaarde gelei word—of word hulle deur die reëls gelei wat deur “die god van hierdie wêreld”, Satan die Duiwel, vasgestel is? (2 Korinthiërs 4:4). As laasgenoemde die geval is, dink net in watter verknorsing plaas jy jou tog as jy soos hulle optree, praat of selfs so slordig soos hulle lyk! Die allerminste wat ondermyn word, is die feit dat jy sê jy ’n Getuie vir Jehovah is. Of selfs erger, jy kan vind dat jy onder slegte invloede swig.

“Jou vriende beïnvloed werklik jou gedrag”, erken Kim, ’n jong vrou. “Toe ek op skool was, was ek nie te sterk in die [Christelike] waarheid nie, en gevolglik het ek baie wêreldse vriende gehad. Maar dit was nie ’n goeie ding nie, want ek het by ’n klomp verkeerde dinge betrokke geraak.” Jy hoef egter nie noodwendig by ernstige oortredings betrokke te raak om jou verhouding met God in gevaar te stel nie. Let noukeurig op wat die Bybel in Jakobus 4:4 sê: “Weet julle nie dat die vriendskap van die wêreld vyandskap teen God is nie? Wie dan ’n vriend van die wêreld wil wees, word ’n vyand van God.”

Wil jy regtig gevaar loop om ’n vyand van God te word? Natuurlik nie! Wys dan duidelik dat jy nie deel van die wêreld is nie. Dit behels egter meer as om net dwelmmiddels en geslagsonsedelikheid te vermy.

Hoe om anders te wees

Neem byvoorbeeld jou kleresmaak. Jou kleredrag verraai wie jy is, wat jy voorstaan en waarin jy glo. Die Christelike godsdiens verskil egter van die Joodse reëling, omdat dit jou heelwat individualiteit en persoonlike voorkeur toelaat. Maar beteken dit dat elke nuwe mode slaafs nagevolg moet word?

Een Christenmeisie wou die eens gewilde gier volg om geskeurde klinknaelbroeke skool toe te dra. Niemand wil natuurlik oudmodies lyk nie. Jou ouers is egter verstandig om jou te belet om modes te volg wat slordig, suggestief, vreemd of aanstootlik is. Wat sal ander van jou dink as jy so sou aantrek? Dit is wat Jeffie, ’n jong meisie, uitgevind het toe sy haar hare volgens ’n modegier laat sny het. “Ek het gedink dat dit net ‘anders’ lyk”, vertel sy. “Maar mense het my begin vra: ‘Is jy regtig een van Jehovah se Getuies?’, en dit het my in die verleentheid gebring.”

Gebalanseerde raad word in 1 Timotheüs 2:9 gegee, waar Christene aangespoor word om “met beskeidenheid en ingetoënheid” aan te trek. Jy kan gewoonlik beskeie wees sonder om opvallend oudmodies te lyk. Jy sal nou wel moontlik nie baie gewild wees as jy beskeie aantrek nie, maar dit sal jou help om te wys dat jy anders is—en dit is iets wat jou God se guns kan laat verkry!

Wat van jou musieksmaak? Baie jongmense luister feitlik elke oomblik van die dag na musiek. Wanneer musiek op sy plek gehou word, kan dit aangenaam en opbouend wees. Exodus 32:17-22 wys egter daarop dat musiek ook slegte emosies en begeertes kan laat ontstaan. En baie van die hedendaagse musiek is eenvoudig nie goed vir ’n Christen om na te luister nie. Rap- en heavy-metal-musiek is byvoorbeeld gewild, maar baie daarvan—indien nie die meeste nie—draai om geslagsonsedelikheid, opstandigheid, geweld of selfs spiritisme. Is jou musiekkeuse dieselfde as dié van die ander jongmense, of het jy die moed om selektief te wees?

Ja, dit verg moed om anders te wees. As jy weier dat vriende en klasmaats aan jou voorskryf wat jou keuse van vermaak, taal of kleredrag moet wees, sal dit beslis ’n reaksie uitlok. Jesus het gewaarsku: “Omdat julle nie van die wêreld is nie, . . . haat die wêreld julle” (Johannes 15:19). Om anders te wees, is dalk een van die moeilikste dinge wat jy ooit sal moet doen—maar dit is nie onmoontlik nie. Dit is die weg wat God se standaarde handhaaf. Dit sal jou selfrespek en ’n skoon gewete gee. Die vraag is: Wat sal jou die moed gee om anders te wees? Ons volgende nommer sal daardie vraag bespreek.

[Voetnoot]

[Prente op bladsy 18]

’n Jongmens wat nie anders as sy portuurs is nie, ondermyn sy bewering dat hy ’n Christen is