Van ons lesers

Die stryd teen siekte Ek wil graag my waardering uitspreek vir Hans Augustin se verhaal in die artikel “My stryd om te lewe” (22 April 1992). My gesondheid is sleg, maar ek het nog nooit sulke groot probleme soos hy gehad nie. Dit herinner my aan die verhaal van ’n man wat gedink het dat hy sleg daaraan toe was omdat hy geen skoene gehad het nie—totdat hy ’n man sonder voete gesien het! In ieder geval, die verhaal van Hans Augustin se beproewing was vir my uiters geloofversterkend, en ek bid vir hom.

A. M. M., Verenigde State

Ek ly aan hoofpyne, gevoelloosheid in my regterhand en -voet, verswakkende gesigsvermoë en voortdurende duiseligheid. Ek het [rekenaartomografiese] aftasting ondergaan, maar dit het geen wanfunksie aan die lig gebring nie. Omdat ek nie meer veel in God se diens kon doen nie, het ek neerslagtig geword. Ek het ook met wanhoop aan my toekoms gedink. Hans Augustin het lesers egter aangemoedig om hulle op geestelike waardes toe te spits, en ek wil sy positiewe gesindheid navolg. Ek moet binnekort verdere toetse ondergaan, maar hoe die toetse ook al afloop, ek is gehelp om vooruit te kyk en teen die siekte te stry.

K. T., Japan

Wêreldhandel ’n Kort briefie om my waardering uit te spreek vir die reeks “Die opkoms en ondergang van wêreldhandel” (8 Januarie–22 Maart 1992). Ek het verwag dat dit moeilik sou wees om te lees, maar omdat dit so knap geskryf is, het ek dit maklik gesnap. Ek het die reeks terdeë geniet.

D. H., Verenigde State

Eetversteurings Baie, baie dankie dat julle die artikel “Hoe om diegene met eetversteurings te help” (22 Februarie 1992) gepubliseer het. Dit het my gehelp om eindelik te erken dat ek aan ’n eetversteuring ly. Vir die eerste keer verstaan ek dat my probleem niks met kos te doen het nie, maar wel met ander kwessies, soos my gesinslewe. My versteuring het soveel aspekte van my lewe, asook my loopbaan in die bediening bemoeilik. Sedert ek die artikel gelees het, het ek begin om baie navorsing te doen, en ek begryp dat daar ’n lang, swaar pad na herstel vir my voorlê. Maar die wete dat Jehovah geduldig en liefdevol is, help my baie.

J. S., Verenigde State

Ek is 15 jaar oud en ly nou al ’n paar jaar aan ’n eetversteuring. Vandat my ma die artikel gelees het, het sy op die regte manier soveel begrypender en meer ondersteunend geword. Nou voel ek waarlik in beheer van my lewe, en ek moet sê dat ek julle artikels baie waardeer. Hulle is altyd net wat ek nodig het.

M. G., Verenigde State

Maagdelikheid Dankie vir die artikel “Jongmense vra . . . Waarom moet ek ’n maagd bly?” (22 April 1992). Ek het gehuil toe ek die woorde lees van ’n 14-jarige meisie wat haar maagdelikheid weens hoerery verloor het. Trouens, ek het ook. Al stort ek al die trane in die wêreld, sal dit nie genoeg wees om te toon hoe innig jammer ek is dat ek as Christen gefaal het om my maagdelikheid te behou nie. Toe my vader dit uitgevind het, was dit die eerste keer dat ek hom sien huil het. Al vergewe God goedgunstig, vind ek dat die herinneringe my af en toe te binne skiet, en dan loop die trane weer. Hoe wonderlik is dit tog nie om jou maagdelikheid te behou eerder as om die slegte gevolge te maai deur iemand se speelbal te wees nie.

I. M., Japan

’n Meisie op skool het my verskeie kere gevra om seks met haar te hê, maar ek het elke keer geweier. Gevolglik het sy my van homoseksualiteit beskuldig. Julle artikel het my oortuiging versterk dat dit goed is dat ek my maagdelikheid behou. Daarom het ek ’n beter kans op ’n suksesvolle huwelik as iemand wat ’n losbandige lewe lei.

D. L., Verenigde State