Van ons lesers

Egskeiding Julle artikels oor “Die hoë prys van egskeiding” (8 Februarie 1992) het my aangespoor om te skryf. Ek is in 1988 ná vier jaar van getroude lewe van my hoërskoolliefde geskei. As ek toe geweet het wat ek nou weet, sou ek my huwelik probeer red het. ’n Egskeiding ruïneer jou finansieel. En terwyl getroude mans geskeide vrouens uitbuit, stel ongetroude mans nie in vrouens met kinders belang nie. Hulle maak dalk afsprake met jou, maar hulle sal nie ’n ernstige verhouding met jou aanknoop nie. Ek hoop van harte dat hierdie artikel ten minste een huwelik sal red; ek kon myne nie red nie.

T. R., Verenigde State

Julle punt dat egskeiding pynlike gevolge kan hê, selfs wanneer daar grondige redes is, is baie waar. Dit voel soms asof ek in ’n see van emosies swem. Die verloop van tyd, ’n roetine van geestelike bedrywighede en Jehovah se tere barmhartigheid het die gereeldheid en intensiteit waarmee ek hierdie moeilike emosies ervaar, verminder.

M. H., Verenigde State

Jongmense vra Dankie vir die artikel “Jongmense vra . . . Is dit normaal om ’n maagd te wees?” (22 Maart 1992). Ek het al begin twyfel of ek my maagdelikheid moet behou omdat baie my daaroor uitlag en bespot. Maar hierdie artikel het my oë laat oopgaan. Ek het besluit om my liggaamlike en emosionele welsyn en die allerbelangrikste, my goeie verhouding met God, te behou.

A. R., Brasilië

Ek het die artikel “Jongmense vra . . . Waarom pas ek nie in nie?” (22 Oktober 1991) waardeer. Dit het op ’n tydstip verskyn toe ek baie terneergedruk was oor die feit dat ek nie by die klieke inpas nie. Ek verstaan presies wat die jong man bedoel het toe hy gesê het: ‘As jy nie die regte tennisskoene dra nie, pas jy nie in nie’, omdat ek nie die geld het om al die klere wat “in” is, te koop nie. Julle artikel het my gehelp om te sien dat ek nie die enigste een is nie.

K. M. S., Verenigde State

Dankie vir die artikel “Jongmense vra . . . Wat moet ek doen as my gesin arm is?” (22 Januarie 1992). Hoewel ek nie ’n jongmens is of werklik arm is nie, het hierdie artikel my gehelp. Ek en my man het die afgelope tyd finansiële probleme ondervind. Alles het so hopeloos gelyk dat ek gevoel het asof my hande afgekap is. Die inligting het my gehelp om te besef dat my negatiewe denke sake net vererger het. Nou kan ek die situasie beter verwerk.

K. J., Verenigde State

Inkas Ek het so pas die artikel “’n Kykie in die goue era van die Inkas” gelees (22 Januarie 1992). Ek is 15 jaar oud en ek het dit nog altyd geniet om oor die voor-Columbiaanse beskawings van Suid-Amerika te leer. Julle artikel was baie interessant, objektief en het verskil van ander wat ek al gelees het. Hierdie soort artikels help ons om ons kennis oor ’n verskeidenheid onderwerpe op ’n praktiese en onderhoudende wyse te verbreed.

D. A. S., Argentinië

Eetversteurings Dankie vir die artikel “Hoe om diegene met eetversteurings te help” (22 Februarie 1992). My beste vriendin kla altyd oor haar gewig. Sy weeg maar omtrent [45 kilogram] en ek weeg twee keer soveel! Dit maak my dus baie skaam dat ek so oorgewig is. Ek het al baie diëte probeer, maar dit help nie. Ek het baie min selfrespek gehad omdat ek so groot is. Julle artikel het my gehelp om my selfrespek so ’n bietjie meer op te bou.

P. M., Verenigde State

Ek is nou al byna twee jaar uit die ystergreep van bulimie. Die feit dat my man gereeld na my vordering gevra het, sowel as voortdurende gebed tot Jehovah het my gehelp om te herstel. Nog iets wat gehelp het, was om gesonde kos soos vrugte en groente in my kombuis te hê, pleks van kafkos. Dit is verbasend hoe soet ’n perske kan proe wanneer jy nie meer kafkos eet nie!

S. G., Verenigde State