Leer by die spinnekop

DEINS jy terug wanneer jy ’n spinnekop sien? Selfs dié van ons wat dit wel doen, het ons al teen ons sin verwonder oor die sierlike simmetrie van ’n spinnerak. Die meeste van ons het ook al gehoor dat die spinnerak ’n ontwerpswonder is. Maar wat van die stof waarvan die spinnerak gemaak is—die sy?

Die sy wat party spinnekoppe, sywurms en vlieë spin, is al lank vir wetenskaplikes en ingenieurs ’n raaisel. Christopher Viney, ’n assistentprofessor in bio-ingenieurswese en ’n metallurg aan die Universiteit van Washington, VSA, het ’n besondere studie van die wawielwebspinnekop gemaak. Volgens die koerant The Globe and Mail van Toronto, Kanada, het hy gevind dat een van die vyf soorte sy wat die spinnekop spin sterker is as staal—om die waarheid te sê, tien maal sterker as Kevlar, ’n kunsmatige vesel wat in koeëlvaste klere, bootrompe en gepantserde voertuie gebruik word!

Wetenskaplikes in die Amerikaanse leër het dit reggekry om die chemiese samestelling van fibroïen, die proteïen waarvan hierdie sy gemaak word, te dupliseer. Die wetenskaplikes het egter gevind dat dit nie alleen die sy se chemiese samestelling is wat vir sy merkwaardige eienskappe verantwoordelik is nie; dit is ook die manier waarop die spinnekop hierdie stof spin. In die spinnekop se spinkliere neem die sy ’n vloeibare kristalvorm aan. Die molekules rangskik hulleself in lang kettings wat polimere genoem word en wat groot trekvastheid het. Professor Viney is nogtans daarvan oortuig dat wetenskaplikes uiteindelik, met spesiale veselverwerkingstoerusting, sal leer hoe om ook hierdie proses na te doen.

“Spinnekoppe het nog ’n voorsprong op ons”, het professor Viney vir The Globe and Mail gesê, maar hy het bygevoeg: “Wie weet? Miskien kan ons op hulle verbeter.” Miskien; miskien nie. Hoe dit ook al sy, die eer vir die oorspronklike ontwerp sal altyd aan net een Bron gegee word—aan die Een wat alles geskep het, Jehovah.—Openbaring 4:11.