Is dit ontwerp?
Spinnekopsy
◼ Dit is ligter as katoen, tog is dit gram vir gram sterker as staal. Wetenskaplikes bestudeer al dekades lank die sy wat wielwebspinners spin. Ankerdraad—die sterkste van die sewe soorte sy wat hierdie spinnekoppe kan spin— het die meeste aandag getrek. Dit is sterker en meer waterbestand as die sydraad van sywurms, wat dikwels as kledingstof gebruik word.
Dink hieraan: Die vervaardiging van industriële vesels soos Kevlar vereis hoë temperature en die gebruik van organiese oplosmiddels. In teenstelling hiermee spin spinnekoppe hulle sy teen kamertemperatuur en gebruik hulle water as oplosmiddel. Wat meer is, die ankerdraad van ’n web is sterker as Kevlar. As ’n web van ankerdraad tot die grootte van ’n sokkerveld vergroot sou word, sou dit ’n makrostraler in vlug kon stop!
Dit is nie verbasend dat navorsers gefassineer word deur hoe sterk ankerdraad is nie. “Wetenskaplikes sou hierdie eienskap graag wou gebruik in ’n verskeidenheid artikels, van koeëlvaste baadjies tot kabels vir hangbrûe”, skryf Aimee Cunningham in die tydskrif Science News.
Maar om ankerdraad na te maak, is nie maklik nie, aangesien die stof binne-in die spinnekop se liggaam gemaak word en die proses nog nie ten volle verstaan word nie. “Dit laat ’n mens nederig voel as jy daaraan dink dat ’n klomp baie slim mense iets probeer namaak wat die spinnekoppe in ons kelders van nature doen”, sê die bioloog Cheryl Y. Hayashi, wat in die tydskrif Chemical & Engineering News aangehaal is.
Wat dink jy? Het die spinnekop en sy sy wat so sterk soos staal is, per toeval ontstaan, of is dit die werk van ’n intelligente Skepper?
[Foto op bladsy 24]
Spinnekopsy wat afgeskei word, soos deur ’n mikroskoop gesien
[Bronerkenning]
Copyright Dennis Kunkel Microscopy, Inc.