Daar’s ’n blaar in die spinnerak!

DEUR ONTWAAK!-MEDEWERKER IN AUSTRALIË

SIEN jy hierdie droë en styf opgerolde blaar? Let op dat dit in ’n spinnerak vassit. Met die eerste oogopslag lyk dit dalk asof die wind dit teen die spinnerak vasgewaai het. Maar daar is iets spesiaals omtrent hierdie blaar.

Jy kyk na die unieke huis van die blaarkrulspinnekop—waarlik ’n verbasende diertjie. Sover ons weet, is dit die enigste spinnekop wat sy huis maak deur ’n blaar op te rol en dit uit te voer met sy, dieselfde stof waarmee hy sy spinnerak spin. Maar gebruik die spinnekop sommer net ’n blaar wat teen die spinnerak vasgewaai het? Dit lyk dalk so. Maar as jy dit van naderby bekyk, is dit duidelik dat doelbewuste ontwerp hierby betrokke is. Die spinnekop soek versigtig ’n blaar uit, miskien een van dié wat onder op die grond lê. Nadat die spinnekop die blaar in ’n spiraal opgerol het, maak hy dit met sydrade vas om te keer dat dit ooprol.

Hierdie spinnekoppe gebruik egter nie net ’n blaar om ’n huis mee te maak nie. In voorstedelike erwe gebruik hulle dikwels stukkies koerantpapier, dun karton of gebruikte toegangskaartjies. Dit is merkwaardig dat hulle selfs ’n leë slakdop kan gebruik. In een so ’n geval was die dop ses keer swaarder as die spinnekop wat dit na sy spinnerak opgetrek het sodat hy daarin kon bly!

Kom ons kyk of ons spinnekop nou in sy blaarhuis is. Ons tik saggies aan die blaar. Daar’s hy! Kan jy hom sien? ’n Pragtig gekleurde spinnekoppie kruip uit die blaar en sak met sy sydraadjie af grond toe. Moenie bekommerd wees nie! Ons is heeltemal veilig. Hierdie soort spinnekop is onskadelik vir die mens, hoewel hy jou dalk op jou vinger sal byt as jy aan hom vat.

Gedurende die dag rus die blaarkrulspinnekop gewoonlik in sy blaarhuis. Maar snags, wanneer daar meer insekte is, sal jy hom by die ingang van die blaar sien wag. Van hier af monitor hy sy spinnerak met een van sy pote op ’n ‘telegraaflyn’—’n spesiale sydraad wat van die blaar af tot by die middelpunt van die spinnerak gespin is. As ’n insek teen die spinnerak vasvlieg, sal die spinnekop dadelik nader hardloop, die insek verlam en hom eet.

Hierdie vindingryke bouertjie is net een van die talle fassinerende diertjies van die Australiese bosveld.