Jy kan dit veiliger maak om te vlieg
Deur Ontwaak!-medewerker in Finland
DEESDAE is vliegtuie ’n vinnige en alledaagse vervoermiddel. Dit word ook as een van die veiligstes beskou.
Hierdie veiligheid is die gevolg van doelgerigte en gesamentlike pogings deur gesaghebbendes en lugrederye om potensiële gevare uit te skakel. Veiligheid hang van verskillende faktore af. Lugrederye bevorder veiligheid deur hulle vliegtuie in ’n goeie toestand te hou deur dit gereeld na te sien en te diens. Breedvoerige laaiplanne en -instruksies word boonop sorgvuldig vir elke vlug uitgewerk. Bagasie, goedere en pos word volgens daardie instruksies in die laairuimte gepak en noukeurige gewig-en-balans-berekeninge word met betrekking tot die vlug gemaak. Het jy al ooit aan al hierdie voorbereidsels gedink wat agter die skerms getref word?
Maar is dit al wat die veiligheid op ’n vlug behels? Geensins nie! Daar is bykomende faktore waartoe jy as ’n lugrederypassasier regstreeks kan bydra. In watter opsig? Het jy geweet dat jy ’n veiligheidsrisiko kan wees sonder dat jy daarvan bewus is? Of dat jy die algemene veiligheid tydens vlugte kan bevorder deur ’n paar grondreëls van lugvaart te ken en na te kom?
Die lugrederye en jou veiligheid
Die IBLO (Internasionale Burgerlugvaartorganisasie), wat onder die toesig van die Verenigde Nasies funksioneer, werk saam met die kommersiële lugrederye om veiligheid tydens vlugte te probeer verbeter. Die ILVV (Internasionale Lugvervoervereniging) en ATA (lugvervoervereniging van Amerika) is in noue samewerking met die IBLO wat die kwessie van veiligheid betref. Hulle het reëls en voorskrifte gepubliseer en opleidingsmateriaal en inligting tot nut van hulle lede en die gewone publiek opgestel.
Die ontwikkeling van verskeie nuwe stowwe en chemiese mengsels, asook elektroniese toestelle wat deur passasiers gebruik word, het nou die risiko vergroot. Dit het weer die aantal veiligheidsmaatreëls laat toeneem en dit belangriker gemaak dat passasiers daaroor ingelig moet word.
Watter soort gevaarlike situasies kan ontstaan?
Die volgende situasies kon noodlottige gevolge gehad het:
(1) ’n Lid van ’n skispan se reistas het op die bagasievervoerband aan die brand geslaan voor dit in die vliegtuig gelaai is. Toe ondersoek ingestel is, is daar gevind dat dit ’n oplosmiddel bevat het waarmee ski-was verwyder word. Die oplosmiddel het uit die houer gelek. Daar was ook ’n aansteker in die reistas, en ’n vonk wat deur die reistas se geskud veroorsaak is, het die inhoud aan die brand laat slaan. Gelukkig het dit alles op die grond gebeur en nie in die laairuimte op ’n hoogte van 11 000 meter waar dit ’n uiters ernstige ongeluk tot gevolg kon hê nie.
(2) Gewone vuurhoutjies het op soortgelyke wyse in ’n passasier se reistas weens wrywing aan die brand geslaan.
(3) By die een lughawe het personeellede ’n houer met vloeibare gas gekry wat besig was om uit te lek. Die bottel was vinnig besig om tot ’n tydbom te ontwikkel!
(4) Suur wat uit die battery van ’n gemotoriseerde rolstoel gelek het, het verwering en aansienlike skade aan ’n vliegtuig aangerig. Die vliegtuig is etlike dae lank op die grond gehou vir skoonmaak- en herstelwerk, wat vir die lugredery ’n finansiële verlies tot gevolg gehad het.
Wat nie aan boord geneem moet word nie
Die internasionale verenigings wat vroeër genoem is, publiseer ’n reisgids wat Dangerous Goods Regulations genoem word en wat aan lugrederye en versendingsagente beskikbaar is. Baie van die voorwaardes maak deel uit van die nasionale lugvaartwette in verskeie lande. Hierdie voorwaardes sluit ’n lys van derduisende gevaarlike artikels in asook uitvoerige instruksies vir die verpakking en vervoer daarvan.
Daar is party stowwe en artikels wat jy glad nie per vliegtuig mag vervoer nie. Daar is boonop dinge wat nie as bagasie vervoer mag word nie, maar wat onder sekere voorwaardes as lugvrag goedgekeur kan word. Dan is daar dinge—hoewel dit as gevaarlik geklassifiseer word—wat jy dalk wel volgens ’n individuele lugredery se reëls in klein hoeveelhede, byvoorbeeld in jou handbagasie, saam met jou mag neem. Wanneer jy onseker is, is dit verstandig om jou lugredery vóór die vlug te raadpleeg.
Waar kan jy die nodige inligting bekom?
Die meeste lugrederye publiseer die beperkings met betrekking tot gevaarlike bagasie in hulle tydroosters. Jou kaartjie bevat ook ’n lys van artikels en goed wat beperk word. Lugrederye oor die hele wêreld het boonop by hulle konferensie wat in 1989 gehou is, besluit om die publiek se aandag op die risikofaktore te vestig wat hulle per ongeluk kan veroorsaak. Aan die begin van 1990 het die lugrederye ’n spesiale kampanje vir reisigers van stapel gestuur. Plakkate is by lughawens en reisagente opgeplak om die publiek in te lig dat gevaarlike bagasie op ’n lysie aangedui word wat hulle saam met hulle kaartjies ontvang.
Wat sluit gevaarlike goedere en artikels alles in?
Daar is talle oënskynlik onskadelike goedere en artikels wat onder sekere omstandighede gevaarlik aan boord van ’n vliegtuig kan wees. Tydens ’n vlug kan temperatuur- en lugdrukwisseling byvoorbeeld ’n lekkasie laat ontstaan. Sekere materiale lyk dalk veilig, maar sodra hulle in aanraking kom met party ander dinge wat gewoonlik onskadelik is, kan hulle ’n chemiese reaksie veroorsaak. Dit kan ’n brand laat ontstaan of giftige dampe afgee. Dit is gevolglik noodsaaklik dat jy weet wat jy in jou reistas pak.
Soos vroeër genoem is, sluit die verbode artikels gewone vuurhoutjies en sigaretaanstekers in. Jy mag dit net in jou handbagasie dra.
Die vervoer van alle soorte vlambare vloeistowwe word verbied. Verf, vernis en kleefstowwe kan ook gevaarlik wees, om nie eers te praat van oplosmiddels soos verdunners en asetoon nie.
Alle soorte vlambare gasse, soos gashouers om aanstekers of gasbottels mee op te vul, word aan boord van ’n vliegtuig verbied.
Plofstof, vuurwerk en seinfakkels word ook verbied omdat hulle gevaarlik is.
Jy het waarskynlik al daaraan gewoond geraak om talle soorte chemikalieë en industriële produkte in jou huis te gebruik. Het jy geweet dat jy moontlik nie toegelaat sal word om sekere produkte saam met jou te neem wanneer jy per vliegtuig reis nie? Die verbode dinge sluit talle aërosolkannetjies, plaagdoders, bleik- en skoonmaakmiddels in. Hulle kan verwering of oksidering veroorsaak of die vliegtuig of ander artikels rondom hulle beskadig.
Magnetiese artikels kan die werking van die vliegtuig se instrumente belemmer en radioaktiewe artikels kan weens straling skade veroorsaak.
Jy kan ’n uitwerking op die navigasiestelsel hê!
Jy het dit die afgelope paar jaar waarskynlik geniet om allerhande nuwe uitvindsels op die gebied van die elektronika te gebruik. Radio’s, klein videokamera’s, klankskyfspelers en sellulêre telefone asook afstandbeheerde speelgoed het orals gewild geraak. Jy mag gewoonlik hierdie artikels in jou bagasie pak mits jy die batterye uitgehaal het. Aangesien die reëls van lugredery tot lugredery verskil, moet jy jou reisagent raadpleeg voordat jy inpak. Dit is egter ’n algemene reël dat jy nie hierdie soort toerusting tydens die vlug mag gebruik nie, aangesien dit die vliegtuig se navigasiestelsel kan belemmer.
Elke passasier word toegelaat om ’n beperkte hoeveelheid medisyne, skoonheidsmiddels en sterk drank vir persoonlike gebruik saam te neem, en die bagasie mag gewoonlik aërosolkannetjies soos haarsproei en sweetwerende middels insluit.
Bevorder jy veiligheid aan boord?
Kom jy al hierdie regulasies na? Is jy bewus van jou verantwoordelikheid? Sit eers en lees die vervoervoorwaardes sorgvuldig, veral dié reëls met betrekking tot gevaarlike artikels, voordat jy vir jou volgende vlug inpak. Ons het die algemene regulasies in verband hiermee behandel, maar die verskillende lugrederye kan verskillende regulasies hê.
As jy onseker is oor iets moet jy nie aarsel om jou lugredery te raadpleeg net sodat jy sekerheid daaroor kan verkry nie. Sodoende sal jy nie per ongeluk die reëls oortree nie. Op dié manier sal jy ook nie jouself, jou medereisigers en die lugredery se eiendom aan gevaarlike situasies blootstel nie. Ja, jy kan dit veiliger maak om te vlieg.
[Prent op bladsy 25]
Kan jy die dinge identifiseer wat nie in jou bagasie hoort nie?