Wenke vir reisigers van ’n ervare vlieënier
EK WAS nog altyd lief vir vlieg. Dit gee ’n mens nie net die vryheid om vinnig van een plek na ’n ander te reis nie, maar dit gee ’n mens ook die geleentheid om op ’n bewolkte dag deur die wolke te sny en in die sonlig hoog in die lug te sweef. Ek het sedert my eerste vlug as ’n jong seun in 1956 die opwinding geniet om te vlieg. Weens my liefde vir vlieg, het ek ’n professionele vlieënier geword, maar ek het ook ’n ruk lank as ’n vliegongelukondersoeker gewerk.
Hoe veilig is dit om te vlieg? En watter voorsorgmaatreëls moet jy tref wanneer jy die geleentheid het om te vlieg?
Hoe om vlieg selfs veiliger te maak
Elke jaar is daar byna 18 000 vliegtuie wat wêreldwyd gereeld by duisende lughawens land en opstyg terwyl hulle meer as 1,6 miljard passasiers na hulle bestemmings neem—en dit alles met baie min ongelukke. Trouens, Lloyd’s van Londen, die bekende versekeringsmaatskappy, skat dat dit 25 keer veiliger is om te vlieg as om met ’n motor te ry. Volgens hierdie statistiek is die gevaarlikste deel van jou reis dus die rit na en van die lughawe. Nietemin kan ’n paar oordeelkundige voorsorgmaatreëls help om vlieg, wat ’n betreklik veilige vorm van vervoer is, selfs veiliger te maak.
● Kies jou lugredery versigtig: Nie alle lugrederye het dieselfde veiligheidsrekord nie. Gevestigde lugrederye is oor die algemeen veiliger. Hulle het moderne vliegtuie en ’n goeie reputasie weens hulle veiligheids- en instandhoudingsrekord.
● Kies jou klere sorgvuldig: Mense wat in ’n vliegtuigongeluk is, kom voor die gevaar van vuur en rook te staan. Langmouklere en ’n langbroek of lang romp sal jou vel dus die beste beskerm teen vlamme en hitte. Klere wat van natuurlike materiaal gemaak is, bied goeie beskerming, maar sintetiese materiaal smelt of krimp dikwels wanneer dit aan hitte blootgestel word, wat ernstiger brandwonde kan veroorsaak. Klere wat van leer gemaak is, kan ook krimp en word nie aanbeveel nie. Verskeie lae klere voorsien beter beskerming as net een laag en ligte kleure weerkaats hitte beter as donker kleure. Daar is ’n beter kans dat plat skoene, verkieslik met veters, aan jou voete sal bly en jou sal beskerm teen snye en brandwonde, en wolkouse is beter as sintetiese kouse.
● Luister na die veiligheidsinstruksies: Die vliegpersoneel sal volledige veiligheidsinstruksies voorsien voor julle opstyg. In die onwaarskynlike geval van ’n ongeluk sal jy hierdie inligting dalk moet gebruik om uit die vliegtuig te kom. Luister dus aandagtig na die veiligheidsinstruksies. Een opname onder Kanadese lugreisigers het getoon dat net 29 persent van die passasiers op ’n vlug die veiligheidskaart gelees of daarna gekyk het. Neem tyd om die veiligheidsinstruksies te lees, veral dié wat wys hoe om die uitgange oop te maak, aangesien jy moontlik eerste daar sal wees. Dink oor hoe jy die uitgang sal vind indien dit donker is of rook jou sig belemmer. Een maklike manier is om te tel hoeveel rye sitplekke tussen jou sitplek en die uitgange is. Sodoende sal jy selfs in die donker die nooduitgang kan vind en oopmaak.
● Beperk jou handbagasie: “Iets wat dikwels [vir passasiers] ’n gevaar inhou, is artikels wat tydens normale vlug uit oorhoofse bagasieruimtes val wat nie behoorlik toegemaak is nie of wat in die vlug deur passasiers oopgemaak word, wat ernstige kopbeserings en selfs die dood kan veroorsaak”, sê die tydskrif Flight International. Onthou dus dat swaar handbagasie ’n veiligheidsrisiko kan wees. Laat derhalwe AL jou bagasie in ’n noodsituasie agter. Red jouself! Jou bagasie kan later vervang word.
In ’n noodgeval
Die gevaarlikste ontruimingsituasie is wanneer daar vuur, rook en dampe teenwoordig is. Een ongeluksverslag het gesê: “Toe die vliegtuig geland het, kon jy [weens die rook] feitlik niks hoër as ’n voet [dertig sentimeter] bo die vloer sien nie. Die oorlewendes het gesê dat hulle so swak en verbysterd was dat hulle byna nie die uitgange kon vind nie.” Hulle moes vinnig uit die vliegtuig kom om te oorleef.
Die vliegpersoneel is opgelei om die passasiers te help om die vliegtuig vinnig en veilig te ontruim. Volg dus dadelik hulle instruksies. Dinge verloop egter nie altyd volgens plan nie. Probleme met die luidsprekerstelsel, beseerde vliegpersoneel, verwarring en geraas, hitte en rook kan die vliegpersoneel se beste pogings in die wiele ry. Die lugredery gebruik dalk nie jou moedertaal nie, wat goeie kommunikasie tussen jou en die vliegpersoneel kan belemmer.
Ontledings van ongelukke toon dat jou eie vasbeslotenheid om te oorleef ’n belangrike rol speel in jou kanse om lewendig uit ’n noodgeval te kom. Jy het ’n duidelike plan van aksie nodig en moet bereid wees om vir jou eie oorlewing verantwoordelikheid te neem. Diegene wat saam met jou reis, veral kinders en ouer mense, en ook die stappe om tydens die ontruiming bymekaar te bly, moet deel van jou plan wees. Die tydskrif Flying Safety beveel aan: “Hou aan mekaar vas as julle deur rook moet ontruim. As hulle aan jou gordel vashou, kan hulle na veiligheid gelei word.” Sê vir jou reismaat(s) wat jou plan van aksie in ’n noodgeval sal wees.
Alle vorme van vervoer hou ’n sekere risiko in, maar moderne passasiersvliegtuie help ons om baie gevare te vermy en stel ons in staat om uitgerus en gereed vir werk of ontspanning te wees wanneer ons by ons bestemming aankom. Wees voorbereid maar nie angstig nie. Ontspan en geniet jou vlug—ek geniet dit altyd.—Bygedra.
[Prent op bladsy 13]
Opleiding vir ’n noodontruiming
[Prent op bladsy 13]
Luister na die veiligheidsinstruksies