Van ons lesers

Hofsake As ’n prokureur wat met hofsake oor kindertoesig en bloedoortappings te doen het, kan ek nie sê hoeveel bemoediging ek uit die artikel “Jehovah se Getuies ‘word aan plaaslike geregshowe oorgelewer’” (22 September 1992) gekry het nie. Hierdie afgelope week het ’n paar dokters uitdruklike instruksies geïgnoreer en ’n bloedoortapping aan ’n Getuie gegee. Sulke gevoellose veronagsaming van fundamentele godsdiens- en selfbeskikkingsreg is weersinwekkend. Julle artikel het my des te meer aangespoor om met die stryd vol te hou!

P. P., Verenigde State

Vroue—Verdien respek Dankie vir die reeks “Vroue—Verdien respek” (8 Julie 1992). Dit het my gehelp om te begryp dat vroue nie net in een gemeenskap geringgeskat word nie, maar dat dit ’n probleem is wat in baie lande voorkom. Ek is ook dankbaar vir die wenke oor hoe om seksuele teistering te voorkom.

S. A., Nigerië

Ek het die openhartigheid van hierdie artikels waardeer. Danksy julle wenke sal baie mense, mans en vroue, hulle gesindheid in heroorweging neem. Dankie dat julle getoon het hoe Jehovah vroue beskou.

J. P. L., Kanada

Ek dink werklik dat vroue tot hulle regmatige plek herstel is en dat hulle op die regte manier beskou is. Ek hoop Christenmans waardeer ook hierdie artikels sodat hulle, indien nodig, hulle sienswyse van vroue in heroorweging kan neem. Ons sal hulle daarvoor des te meer opreg respekteer.

E. S., Frankryk

Danksy die artikels kan ons onsself in ’n beter lig beskou, en die artikels toon dat mans ’n verantwoordelikheid het om ons vredeliewend en eerbiedig te behandel. Ek dink hierdie artikels was baie openhartig en dit word baie waardeer.

A. H., Verenigde State

Dit het my ’n knop in my keel en trane in my oë laat kry om te weet dat ek aan ’n organisasie behoort wat so ’n besliste standpunt inneem oor hoe vroue behandel moet word. Dit is die eerste keer dat ek artikels sien wat toon dat mans geen verskoning het om vroue te slaan nie.

E. M., Verenigde State

Ek weet dat hierdie inligting aangaande mans se sienswyse van vroue nie die wêreld gaan verander nie, maar dit is baie vertroostend om woorde van waarheid, vertroosting, medelye en begrip te lees en te besef dat Jehovah werklik vir ons omgee.

H. Q., Verenigde State

Die artikels het my diep getref—nie dat ek my vrou afskeep nie, maar ek is seker daarvan dat ek meer kan doen om haar te help. Ek waardeer haar uiters baie en dink dat die artikels alle Christenmans sal help om die waarde van ons vrouens selfs meer te besef. Hulle verdien hulle man se respek, eerbied, liefde en begrip.

S. S., Brasilië

Die dood Julle nommer “Wanneer ’n geliefde sterf” (22 Julie 1992) het my diep geroer. Dieselfde dag wat ons dit ontvang het, het my 16-jarige swaer aan kanker gesterf. Die artikels was waarlik ’n bemoediging in ’n tyd van droefheid. Ons vriende en familie het ons te hulp gesnel deur kos, vertroosting en hulp met die begrafnisreëlings te voorsien. Jehovah bied werklik vertroosting deur sulke tydige artikels.

C. C., Verenigde State