Van ons lesers

Uitskellery Die reeks “Van woorde wat seermaak tot woorde wat heel” (22 Oktober 1996) is net een van talle artikels wat toon hoeveel Jehovah vir ons omgee. Die artikels oor “Hulp vir alkoholiste en hulle gesinne” (22 Mei 1992), “Vroue verdien respek” (8 Julie 1992), “Hulp vir kinders van geskeide ouers” (22 April 1991) en “Sal gesinsgeweld ooit ophou?” (8 Februarie 1993) het my almal aan die gang gehou ondanks jare van emosionele mishandeling deur ’n man wat ’n alkoholis is. Terwyl ek hierdie artikels gelees het, het ek van vreugde en hartseer gehuil. My hart loop oor van waardering vir ’n God wat ons intiemste vrese, pyn en letsels ken.

J. C., Kanada

Die artikels het my diep geraak. Dit het die situasie waarin ek met my man was presies beskryf. Ek kan heelhartig met elke sin saamstem. Julle behandel vroue baie liefdevol, en dit is vir my ’n bevestiging dat Jehovah hierdie organisasie gebruik.

P. S., Duitsland

Die artikels het my aangespoor om voortdurend teen my swakheid te stry deur my tong in toom te hou. Nou weet ek hoe ek my man behoort te behandel. Ek het gehuil toe ek die artikels gelees het.

G. I., Oostenryk

Ek is al jare lank die slagoffer van uitskellery deur my man. Ek het dit reggekry om nie wanhopig te raak nie deur die vrugte van God se gees aan te kweek en deur in die voltydse predikingswerk besig te bly. Julle artikels het my laat voel dat ek nie alleen is nie—dat iemand die probleem verstaan.

M. N., Italië

Ek het al baie van julle artikels gelees, maar hierdie artikels het iets diep binne-in my geraak. Toe ek na die foto op bladsy 9 gekyk het, was dit soos om na my moeder of my suster te kyk, wat al baie jare lank onder hulle mans ly. Ek het afskrifte van hierdie artikels gemaak en dit aan ander gestuur wat ek weet op hierdie manier ly. Ons sien uit na God se nuwe wêreld, waar daar glad nie meer skeltaal sal wees nie.

B. P., Kenia

Toe ek die tydskrif vir my oom gegee het wat sy vrou uitgeskel het, het hy dit ’n paar keer gelees. Daarna het ons opgemerk dat hy nie meer sy vrou uitskel nie en dat daar glad nie meer moleste in hulle huis is nie. Hy en sy vrou bedank my voortdurend dat ek hulle gehelp het om hulleself te verstaan. Ek wil die dank aan Ontwaak! oordra.

F. F., Nigerië

Gewese verslaafde Ek is dankbaar vir die artikel “Die waarheid het my my lewe teruggegee” (22 Oktober 1996). Ek is 19 jaar oud, en selfs al is ek ’n gewone pionier, of voltydse evangeliedienaar, het ek soms gevoel dat ek sekere dinge misloop. Dolly Horry se ondervinding het my help besef dat die aantreklikheid van die wêreld net ’n illusie is.

R. M. A., Bolivia

Ek wil vir julle vertel hoe diep hierdie artikel my geraak het. Die trane het oor my wange geloop terwyl ek die lewensverhaal van Dolly Horry gelees het. Ek bid dat hierdie artikel ander mense wat leef soos Dolly vroeër geleef het, sal beweeg om nou ’n betekenisvoller lewe te begin lei.

O. S. O., Nigerië

As een van Jehovah se Getuies voel ek geëerd om Dolly Horry as ’n Christensuster te hê. Gedurende my tienerjare het ek Jehovah tweede in my lewe gestel. My ma het egter nooit moed opgegee met my nie, en sy was oorstelp van vreugde toe ek verlede jaar gedoop is.

B. B., Australië