Ons beskou die wêreld

Voedoesentrums in openbare begraafplase

Die stadsraad en die burgemeester van São Paulo, Brasilië, het dit onlangs goedgekeur dat spasie by munisipale begraafplase gratis gebruik kan word as “voedoesentrums”, volgens Jornal da Tarde. Teenstanders het teen hierdie sentrums geprotesteer en gesê dat Afro-Brasiliaanse sektes die begraafplase sal gebruik om afgryslike diereoffers te bring. Voorbeelde van diere wat mishandel, vermink of doodgemaak is, het hondjies wat lewend in groter diere begrawe is, ingesluit, asook katte en honde met uitgesteekte oë. Een regeringsamptenaar het gesê dat die sektes nie vrywillig na Brasilië gekom het nie, maar dat slawe wat hierdie gebruike beoefen het met geweld van Afrika af gebring is. Daarom, glo hy, moet voedoesektes gerespekteer word.

Die slagting duur voort

Volgens JAMA (Journal of the American Medical Association) word daar geskat dat nie meer as 19 persent van diegene wat gedurende die Eerste Wêreldoorlog weens oorlogvoering dood is burgerlikes was nie. Met die uitbreek van die Tweede Wêreldoorlog was ongeveer 50 persent van diegene wat gesterf het burgerlikes. Sedertdien is ongeveer 150 oorloë oor die aarde gevoer. “Daar word geskat”, sê JAMA, “dat meer as 80 persent van die 20 miljoen wat gesterf het en van die 60 miljoen wat gewond is burgerlikes was en baie van hulle was kinders. In die laaste dekade alleen was oorlog volgens skatting verantwoordelik vir die dood van 1,5 miljoen kinders en die verminking van meer as 4 miljoen kinders.”

Siektes en die dood

Wêreldwyd sterf daar jaarliks ongeveer 50 miljoen mense. Volgens die WGO (Wêreldgesondheidsorganisasie) hou 46,5 miljoen van hierdie sterftes direk verband met siektes. Aansteeklike en parasitiese siektes veroorsaak jaarliks die dood van 17,5 miljoen mense. Kardiovaskulêre siektes veroorsaak die dood van ongeveer 12 miljoen. Kanker veroorsaak die dood van meer as vyfmiljoen. Hirosji Nakajima, direkteur-generaal van die WGO, het gesê: “Die tragedie is dat ten minste 20 miljoen sterftes jaarliks voorkom kan word deur verbeterde gesondheidsorg, toegang tot noodsaaklike geneesmiddels en entstowwe, ’n gesonder lewenstyl en opvoeding.”

Katte en voëls

Navorsers skat dat huiskatte in Wisconsin, VSA, alleen meer as 19 miljoen voëls per jaar kan doodmaak. ’n Studie in Brittanje toon dat 5 miljoen huiskatte jaarliks ongeveer 20 miljoen voëls doodmaak. In Sherbrooke Shire in Australië het dorpsamptenare wat probeer om die slagting van seldsame voëls te keer inwoners beveel om troeteldiere saans binne te hou, en as hierdie bevel veronagsaam word, kan dit ’n boete van R290 beteken. In die Verenigde State word daar daagliks sowat 35-000 katte gebore. Maar soos die tydskrif National Wildlife berig, het die “Wisconsin-studie bevind dat 94 persent van die kateienaars sangvoëls op hulle eiendom wil hê en dat 83 persent wilde voëls wil hê, maar dat net 42 persent gewillig is om die aantal katte tot nut van hierdie wilde spesies te verminder”.

Sport en gesondheid

Kenners waarsku dat jy siek kan word as jy jou liggaam dwing om ’n ongewoon hoë prestasievlak te handhaaf. The European het gesê: “Navorsing deur mediese wetenskaplikes het getoon dat topatlete baie vatbaarder vir virusinfeksies soos verkoues, seerkele en sere as ander mense is.” Klaus Braumann, ’n mediese raadgewer vir die Duitse Olimpiese span, het ’n onderhoud met 481 Duitse topatlete gevoer. Volgens die dagblad Süddeutsche Zeitung het hy bevind dat hulle “vier keer meer koorsblare op hulle lippe [herpes simplex] as die gemiddelde bevolking kry”. Hoewel daar geskat word dat ongeveer 10 persent van die bevolking in Duitsland af en toe hierdie koorsblare kry, kom dit onder ongeveer 50 persent van die topatlete voor. “Alle fisiese inspanning wat ’n sekere beperking oorskry, kan die immuunstelsel verswak”, het Heinz Liesen, ’n kenner op die gebied van geneesmiddels in sport, gesê.

“Die paradoks van oorvloed”

By ’n onlangse vergadering in Geneve, Switserland, het twee van die Verenigde Nasies se organisasies aangekondig dat hulle sal saamspan in “een van die grootste pogings wat nóg aangewend is om wêreldwye ondervoeding die hoof te bied”. Le Monde, ’n Paryse dagblad, berig dat die Voedsel- en Landbou-organisasie en die Wêreldgesondheidsorganisasie gesê het dat hulle stappe gaan doen om wat hulle “die paradoks van oorvloed” noem, te bowe te kom. Hoewel die aarde genoeg voedsel voortbring om in die voedingsbehoeftes van die hele mensdom te voorsien, word die voorraad nie verdeel op ’n manier wat met hierdie behoeftes ooreenstem nie. In Afrika bedreig hongersnood elke dag die lewe van 40 miljoen mense. Ondervoeding raak 192 miljoen kinders en 40 000 van hulle sterf daagliks.

Onwillekeurige indoktrinering

“As ouers rook, sal hulle kinders waarskynlik hulle voorbeeld volg”, sê Le Figaro, die Paryse koerant. ’n Onlangse studie waarby meer as 10-000 Franse jongmense van 11 tot 18 jaar betrokke was, het getoon dat byna ’n kwart van hulle gereeld tabak gebruik—wat beteken dat hulle ten minste een keer per dag rook. Die studie het getoon dat meer as 50 persent van die jongmense wat tabak rook se vaders rook. Dit het ook getoon dat byna 72 persent van die jongmense wat gereeld rook, wens dat hulle dit kan opgee.

Minder respek vir die bejaardes

Die bejaarde deel van die bevolking in Asië neem aansienlik toe. In Japan verwag party dat die aantal mense wat 65 en ouer is binne die volgende 30 jaar van die teenswoordige 15,5 miljoen tot 32 miljoen sal toeneem. Volgens Asiaweek sal 1 uit elke 4 Japannese teen die jaar 2020 bejaard wees. “Meer as 9% van alle Singapoereane is al 60 jaar oud. En teen die jaar 2000 sal sowat 1,5 miljoen Maleisiërs as senior burgers kwalifiseer”, het Asiaweek voorts gesê. Hierdie vermeerdering vind plaas op ’n tydstip dat daar min van die ou tradisies van sorg en respek vir die bejaardes oor is. Henry Lim, ’n kampvegter vir senior burgers in Singapoer, het gesê: “Daar is ’n tendens dat ouer mense minder respek betoon word.” Hy het voorts gesê dat jonger mense dikwels “meer tyd vir die poedel as vir hulle ouers het”.

’n Winsgewende bedryf

In Argentinië is mense bekommerd as gevolg van berigte van diere- en menseoffers. Volgens Clarín is daar 5000 sektes in Argentinië, waarvan baie betrokke is by spiritisme, Satanisme en ander vorme van okkultisme. Die gebruik van beelde kom onder baie van hierdie sektes voor. In Buenos Aires is winkels wat beelde van Jesus Christus en Katolieke “heiliges” én beelde van demone op dieselfde rakke uitstal iets algemeens. Een gewilde beeld staan bekend as “Lucifer, die Groot Kaptein en die verskriklikste van alle bose gode”. Clarín sê dat die verskaffers van hierdie sataniese beelde ook Katolieke beelde verkoop. Een winkeleienaar het erken dat die verkoop van Katolieke beelde en sataniese beelde ’n “winsgewende bedryf” is.

Bang vir pasiënte

Volgens The New York Times het die vrees van gesondheidswerkers dat hulle siektes deur hulle pasiënte kan opdoen moontlik ’n ernstige uitwerking op hulle optrede. Baie dokters is bang dat hulle vigs of hepatitis kan opdoen deur hulle vel per ongeluk met mediese instrumente te prik of te sny terwyl hulle pasiënte behandel. Hierdie vrees is klaarblyklik nie ongegrond nie. ’n Studie wat in ’n hospitaal in die stad New York gedoen is, het getoon dat ongeveer 60 persent van die dokters wat gereeld pasiënte met tuberkulose behandel self met daardie siekte besmet is. Boonop doen ongeveer 12000 gesondheidswerkers elke jaar hepatitis deur hulle pasiënte op. Sedert die begin van die vigs-epidemie is ongeveer 47 gesondheidsorgwerkers in die Verenigde State deur hulle pasiënte met die siekte besmet.

Betelneut en kanker

“Om te kou of nie te kou nie . . . dit is die vraag.” Die vraag, wat oor die kou van betelneut handel, is in die Post-Courier, ’n koerant in Papoea-Nieu-Guinee, geopper. Dr. Barrie Milroy, ’n spesialis-chirurg met ondervinding in die behandeling van betelneutkouers, het gesê dit “lyk asof endemiese malaria en intra-orale kanker—laasgenoemde probleem hou direk verband met die kou van betelneut—twee groot probleme in Papoea-Nieu-Guinee is”. Selfs jong kinders kou gereeld betelneut. ‘As jy betelneut kou, is die vraag nie of jy kanker sal kry nie, maar wanneer jy dit gaan kry’, het dr. Milroy gesê. Hy het voorts gesê dat as betelneutkouers nie daarmee ophou nie “daar medies nie veel vir hulle gedoen kan word nie”.

Slim namaaksels

“Dit is een ding as nagemaakte geld ongemerk by ’n niksvermoedende winkelier of selfs ’n bankkassier verbygaan. Dit is ’n heel ander saak as dit moderne geldhanteringstoerusting by die Federale Reserwebank flous”, sê The Wall Street Journal. Maar iemand het Amerikaanse $100-note vervaardig wat juis dit doen. Die nagemaakte geld word “besonder goed” genoem en het skielik regoor die wêreld begin verskyn. Die ingewikkelde drukstyl met hoogdruk, die linnepapier wat uit kenmerkende rooi en blou veselstowwe bestaan en die kenmerkende magnetiese ink is alles meesterlik nagemaak. Die namaaksels is so goed dat die Amerikaanse regering die verlies aanvaar pleks van die gewone prosedure te volg deur die banke vir die nagemaakte note te laat betaal wat hulle laat deurgaan. Party amptenare vrees dat die vals note die werk van ’n terroristegroep of ’n vyandige buitelandse regering is.

Asmasterftes neem toe

“Die aantal mense wat weens asma-aanvalle [in Duitsland] sterf, het kwaai toegeneem”, het die dagblad Süddeutsche Zeitung gesê. Volgens die Duitse Asemhalingskanaalorganisasie het meer as 5000 mense in daardie land gedurende 1991 as gevolg van asemhalingsiektes gesterf. In die middel-sewentigerjare was die ooreenstemmende syfer ongeveer 2000 per jaar. Sowat 20 miljoen inwoners van Duitsland ly aan allergieë en 1 uit 3 van hulle aan asemhalingsallergieë.