Hoe om verkragting te voorkom

Eric was lank en aansienlik, en sy ouers was welgesteld. Lori was 19 en is op ’n dubbelafspraak saam met Eric en sy kamermaat genooi. Sy het by die braaivleis aangekom wat by Eric-hulle se huis gehou is, maar die ander paartjie het die afspraak gekanselleer sonder dat sy daarvan geweet het. Die ander gaste het spoedig begin vertrek.

“Ek het begin dink: ‘Hier is fout, iets is aan die gang’, maar ek het dit geïgnoreer”, het sy gesê.

Toe Eric eers alleen saam met Lori was, het hy haar verkrag. Lori het nooit die verkragting by die polisie aangemeld nie, en later het sy na ’n plek 240 kilometer daarvandaan verhuis sodat sy Eric nie weer sou sien nie. ’n Jaar later was sy steeds bang om met mans uit te gaan.

VERKRAGTING is ’n toenemende bedreiging, en ’n vrou se beste beskerming is om ingelig en voorbereid te wees. Nie elke verkragtingsituasie kan voorsien word nie, maar as jy weet hoe verkragters dink en hulle aanranding beplan, kan dit jou help om waarskuwingstekens te herken.a ’n Ou gesegde lui: “Verstandige mense sal moeilikheid sien kom en dit vermy, maar ’n onbesonne mens sal hom met oop oë daarin begewe en later spyt wees.”—Spreuke 27:12, Today’s English Version.

Die beste manier om ’n verkragtingsituasie te vermy, is om verkragters te vermy. Jy moet bewus wees van ’n gedragspatroon in ’n man—selfs een wat jy goed ken—wat hom as ’n moontlike verkragter kan identifiseer. (Sien venster, bladsy 7.) Party mans sal ’n vrou se kleredrag of haar bereidwilligheid om alleen saam met hom te wees as ’n verskoning gebruik om haar te verkrag. Hoewel ’n vrou nie daarvoor verantwoordelik is as ’n man so ’n verwronge beskouing huldig nie, sal sy verstandig wees om na so ’n neiging op te let.

Moenie toelaat dat jy alleen saam met ’n man is wat jy nie goed ken nie. (Lê goeie oordeel aan die dag selfs met iemand wat jy goed ken.) ’n Onbekende verkragter kan na jou huis toe kom en voorgee dat hy iets kom herstel. Vra om bevestiging. ’n Kennisverkragter sorg dikwels dat hy alleen saam met slagoffers is deur iets uit te dink wat vereis dat hulle gou by sy huis aangaan of deur ’n leuen te vertel en te sê dat daar ’n groep mense by ’n saamkomplek sal wees. Moenie sy storie sluk nie.

Gaan in groepe of saam met ’n chaperone uit om probleme tydens ’n afspraak te voorkom. Sorg dat jy die persoon met wie jy uitgaan goed ken, en stel definitiewe beperkinge op hoeveel fisiese intimiteit, indien enige, jy sal toelaat. Wees versigtig om enige sterk drank te drink! Jy kan nie op jou hoede wees vir gevaar as jou denkvermoë aangetas is nie. (Vergelyk Spreuke 23:29-35.) Vertrou op jou intuïsie. As jy ongemaklik in iemand se geselskap voel, moet jy hom nie die voordeel van die twyfel gee nie. Sorg dat jy wegkom.

Veral ouers met tienderjariges moet met hulle kinders bespreek hoe verkragting voorkom kan word en spesifiek verwys na gevaarlike situasies, aangesien die meeste verkragters en verkragtingslagoffers jonk is.

Tree vinnig op

Nie alle verkragtingsituasies kan voorsien word nie. Jy kan dalk onverwags alleen te staan kom voor ’n man wat sterker as jy is en wat daarop uit is om jou te dwing om geslagsomgang te hê. Wat dan?

Tree vinnig op, en onthou jou doel: om weg te kom. ’n Verkragter stel dikwels sy slagoffer op die proef voordat hy besluit om haar aan te rand, dus is dit belangrik om sy planne so gou moontlik in die wiele te ry voor hy genoeg selfvertroue bymekaarskraap om op te tree. Verkragtingdeskundiges sê daar is twee dinge wat gedoen kan word: passiewe weerstand of aktiewe weerstand. Jy kan eers probeer om passiewe weerstand te bied en, as dit misluk, kan jy tot aktiewe weerstand oorgaan.

Passiewe weerstand kan beteken dat jy óf tyd wen deur met die verkragter te praat óf voorgee dat jy ’n seksueel oordraagbare siekte het óf oor jou aanrander opbring. (Vergelyk 1 Samuel 21:12, 13.) “Taktiek word net deur ’n mens se verbeelding aan bande gelê”, het Gerard Whittemore geskryf in sy boek Street Wisdom for Women: A Handbook for Urban Survival.

Passiewe taktiek—wat alles behalwe ’n fisiese bakleiery met die verkragter insluit—verg helder denke en moet daarop gemik wees om die aanrander se aandag af te lei of hom te kalmeer. As jou weerstand jou aanrander kwater en gewelddadiger maak, moet jy iets anders probeer. Moet egter nie toelaat dat jy in ’n meer afgesonderde plek ingedwing word terwyl jy aan iets probeer dink nie. En onthou een van die doeltreffendste vorme van passiewe weerstand—om te skreeu.—Vergelyk Deuteronomium 22:23-27.

Nog iets wat jy kan doen, is om negatief en kragdadig op te tree. Jy moet jou aanrander duidelik laat verstaan dat jy nie aan sy wense sal toegee nie. Wanneer iemand jou tydens ’n afspraak probeer verkrag, kan jy die skoktaktiek probeer deur die aanranding op sy naam te noem. As jy skreeu: “Dit is verkragting! Ek gaan die polisie bel!”, sal jou voornemende verkragter dalk huiwerig wees om jou te dwing om verder te gaan.

Bied fisies weerstand

As dit nie help om met hom te praat nie, moet jy nie bang wees om fisies weerstand te bied nie. Dit beteken nie die kanse is groter dat jy seer- of doodgemaak sal word nie; inwilliging waarborg ook nie jou veiligheid nie. Daarom raai die meeste verkragtingdeskundiges aan dat jy fisies weerstand bied.

Vroue kan dit moeilik vind om fisies weerstand te bied omdat hulle hulle lewe lank gekondisioneer word om beleef, passief en onderdanig te wees selfs wanneer hulle met fisiese geweld gedreig word. Daarom moet jy voor die tyd besluit dat jy weerstand sal bied sodat jy nie kosbare tyd verloor deur tydens ’n aanranding te aarsel nie.

Jy moet woedend wees omdat enigeen dit waag om jou te dreig of druk op jou uit te oefen. Jy moet besef dat dit ’n voorbedagte aanranding is, en die verkragter maak daarop staat dat jy sal toegee. Raak kwaad, nie bang nie. “Jou vrees is ’n aanrander se belangrikste wapen”, sê die navorser Linda Ledray. Moenie bang wees dat jy oorreageer of dat jy dalk verspot lyk nie. “Liewer onbeskof as verkrag”, volgens een deskundige. Vroue wat met welslae weerstand teen verkragters gebied het, het gewoonlik aktief weerstand gebied en het meer as een taktiek probeer deur onder andere te byt, te skop en te skreeu.

As jy nie die verkragting kan afweer nie, moet jy daarop konsentreer om jou aanrander later te kan identifiseer. Indien moontlik, sal dit help om hom te krap of sy klere te skeur omdat dit bloed en ander bewyse sal agterlaat. Maar op hierdie tydstip kan jy dalk net nie meer weerstand bied nie. In daardie geval “moet jy jouself nie verwyt deur te dink dat jy ‘toegelaat’ het dat hy jou verkrag nie”, het Robin Warshaw in I Never Called It Rape gesê. “Jy hoef nie beseer of doodgemaak te word om te ‘bewys’ dat jy verkrag is nie.”

[Voetnoot]

[Venster op bladsy 7]

Karakterskets van ’n potensiële verkragter

□ Mishandel jou emosioneel deur jou te beledig, jou sienswyse te ignoreer of kwaad te raak of hom te vererg wanneer jy ’n voorstel maak.

□ Probeer sekere aspekte van jou lewe reël, soos die manier waarop jy aantrek en wie jy as vriende het. Wil al die besluite tydens ’n afspraak neem, soos waar om te eet of watter rolprent om te sien.

□ Raak sonder enige rede jaloers.

□ Praat oor die algemeen minagtend van vroue.

□ Raak dronk of bedwelmd en probeer jou oorhaal om dieselfde te doen.

□ Dwing jou om alleen met hom te wees of om geslagsomgang te hê.

□ Weier dat julle onkoste tydens ’n afspraak deel en raak kwaad as jy aanbied om te betaal.

□ Is selfs op subtiele maniere fisies gewelddadig, soos deur te gryp of te stoot.

□ Intimideer jou deur te na aan jou te sit, te keer dat jy by hom verbykom, aan jou te raak wanneer jy gesê het hy moenie of te praat asof hy jou beter ken as wat werklik die geval is.

□ Kan nie frustrasie verwerk sonder om kwaad te raak nie.

□ Beskou jou nie as ’n gelyke nie.

□ Hou van wapens en hou daarvan om wreed te wees teenoor diere, kinders of mense wat hy kan afknou.

Uit I Never Called It Rape deur Robin Warshaw.

[Prent op bladsy 7]

Vroue wat met welslae weerstand teen verkragters gebied het, het gewoonlik aktief weerstand gebied en het meer as een taktiek probeer