Van ons lesers

Speelgoed in Afrika Wat ’n wonderlike artikel was “Tuisgemaakte speelgoed in Afrika” (22 Maart 1993) tog nie! As kunsonderwyseres weet ek hoe belangrik dit is om kinders se skeppingsvermoë in hierdie eeu van televisie en rekenaarspeletjies aan te wakker. Wanneer ouers tyd daaraan bestee om dinge saam met hulle kinders te maak, skep hulle ook blywende herinneringe!

D. B., Duitsland

Ek is sewe jaar oud. Ek het van die artikel gehou, en ek dink dit is oulik dat [kinders in Afrika] hulle eie speelgoed kan maak! Dit klink na pret, en ek sal dit graag self wil probeer.

M. S., Verenigde State

Verkragting Julle reeks artikels oor “Verkragting—’n Vrou se grootste vrees” was ongelooflik (8 Maart 1993). Ek is 14 jaar oud en het al van meisies jonger as ek gehoor wat verkrag is. Maar eers nadat ek julle artikel gelees het, het my oë vol trane geskiet en het ek besef dat dit ernstiger is as wat ek gedink het. Baie dankie.

S. B., Verenigde State

Gedurende my eerste jaar op hoërskool is ek deur ’n “gesinsvriend” verkrag. Ek dink al die afgelope paar jaar dat ek hoerery gepleeg het. Nou kan ek sien dat Jehovah weet dat dit nie my skuld was nie! Ek is net spyt dat ek nie vroeër hulp gekry het nie.

A. S., Verenigde State

Baie programme help mense om hulle verkragting te verwerk, maar hulle sê nie hoe om dit te voorkom nie. Dit is tog sekerlik belangriker om voorsorg as nasorg te tref! In hierdie opsig het die artikel my baie gehelp, en dit sal vroue wat potensiële slagoffers is beslis oral kan help.

J. A. M., Brasilië

Ek is buite my huis deur ’n voornemende verkragter aangeval. Ek het baklei soos nooit vantevore nie en het Jehovah se naam so hard en soveel keer geskree dat die honde begin blaf het. My aanvaller het uiteindelik moeg geword van my geskree en weggehardloop. Ek raai almal aan om julle wenke te volg. Na gelang van die omstandighede kan ons optrede ’n groot verskil maak.

S. P., Verenigde State

Ek is byna 20 jaar gelede deur ’n kennis verkrag. Maar ek het dit nooit aangemeld nie omdat ek skaam daaroor gevoel het. Ek het nooit eers daaroor gepraat nie tot drie jaar gelede tydens terapie. Eers toe het ek my man daarvan vertel. Hy kon nou my afkeer van geslagsomgang verstaan. Toe ek julle artikels klaar gelees het, het ek vir die eerste keer in 20 jaar gehuil van vreugde—nie pyn nie—en het ek Jehovah bedank.

T. P., Verenigde State

Ruimteverkenning Ek het pas die uitstekende artikels oor ruimteverkenning in die Ontwaak! van 8 September 1992 gelees. Al weet ek bitter min omtrent hierdie onderwerp, het julle duidelike uiteensetting my beïndruk. Ek is oortuig daarvan dat hierdie artikels ons sal help om Jehovah se voorneme vir ’n gehoorsame mensdom meer te waardeer.

W. D. F., Costa Rica

Ons skryf om julle vir julle harde werk in die opstelling van die artikels oor ruimteverkenning te bedank. Ná ons die laaste artikel gelees het, het ons Jehovah, die alwetende God, gedank, Hy wat die heelal op so ’n wonderlike wyse georganiseer het. Ons sien gretig uit na die nuwe stelsel wanneer hy gehoorsame mense met ’n volmaakte brein die geleentheid sal gee om die heelal beter te verstaan.

I. N. O. en J. N. O., Nigerië