Van ons lesers
Kinderopvoeding Die reeks “Jou kinders—Doen wat die beste vir hulle is” (22 September 1992) het my my tekortkominge as ’n ouer laat besef. Ek het my aandag op persoonlike sake en gemeentelike bedrywighede toegespits—tot die verwaarlosing van my driejarige seuntjie. Hy het ’n baie rustelose kind geword. Ek is ook geneig om opvlieënd en ongeduldig te wees en skaam om my liefde te betoon. Pleks dat ek my kind drukkies gegee het, het ek te ver gegaan om streng te probeer wees. Aangesien Jehovah oorvloedige liefde aan ons almal betoon, gaan ek nou probeer om baie liefde te betoon aan die erfdeel wat ek van Jehovah ontvang het.
T. T., Japan
Hoewel ek nie ’n ouer is nie, is ek lief vir kinders, en hierdie nommer het my hart geraak. Ek het gehuil toe ek uitvind met watter droewige probleme vandag se kinders te kampe het. Julle artikel was ook baie insiggewend deur te toon hoe hierdie probleme op ’n baie vroeë ouderdom aangepak kan word sodat verskriklike probleme later in die lewe voorkom kan word.
L. B., Verenigde State
Die artikels het my beweeg om myself as ’n vader te ondersoek. Ek was baie jonk toe ek getroud is en wou eerder by my vriende as by my gesin wees. Deur hierdie artikels te lees, het ek besef dat ek nie genoeg van my tyd aan my dogter afgestaan het nie. Mag hierdie artikels ouers beweeg om te doen wat die beste vir hulle kinders is.
A. V., Italië
Diereverhale Dankie vir die artikel “Die kapibara—Skeppingsfout of skeppingswonder?” (22 September 1992). Ek lees dikwels vir my kind artikels oor diere. Met mnr. Kapibara wat self die praatwerk doen, het my kind die artikel baie geniet!
C. T., Japan
’n Verfrissende alternatief vir die kafkos wat baie tydskrifte aanbied! Ek en my kinders lees dit saam. Dit is pret om van nuwe en verskillende diere te leer!
C. H., Verenigde State
Dankie vir die artikel “Daardie verbasende buideldiere van Australië” (22 Julie 1992). Die manier waarop hierdie diere geboorte gee en verskillende soort melk produseer, was vir my veral interessant. Dit het my laat dink aan hoe duidelik Jehovah se mag uit sy skeppingswerke gesien kan word!
N. S., Italië
Ek is 14 en het die artikel “Die Arabiese kameel—Afrika se meerdoelige vervoermiddel” (8 Junie 1992) geniet. Die manier waarop julle dinge gestel het, het die inligting op ’n baie amusante wyse oorgedra.
G. C., Argentinië
Openbare redevoering Die artikel “Jy kan voor ’n gehoor praat!” (22 Julie 1992) het my gehelp om ’n werk te kry. Ek het dit eers gelees met die doel om dit in die Christenbediening toe te pas. Maar nadat ek gehoor het dat ek moontlik ’n werk kon kry, het ek die artikel weer gelees en baie van die punte toegepas wat daarin genoem word, soos die oefening wat jou senuwees kalmeer. Daarna het ek gebid en vir die onderhoud gegaan. Ek het die werk gekry en is dankbaar dat julle hierdie artikel op die regte tyd voorsien het.
K. B., Verenigde State
Ruimteverkenning As iemand wat graag wetenskapfiksie lees, het die reeks oor ruimteverkenning (8 September 1992) my eenvoudig geboei. Dit het my ’n gebalanseerde beskouing van hierdie baie opwindende onderwerp gegee. Dit was ook bemoedigend om te sien dat God nie net vir hierdie planeet nie, maar vir die hele heelal ’n wonderlike voorneme het.
A. C., Verenigde State