Van ons lesers
Dissiplinering van kinders Ek het die artikel “Die Bybelse beskouing . . . ‘Die tugroede’—Is dit ouderwets?” (8 September 1992) werklik waardeer. Met soveel kindermishandeling en wreedheid in die wêreld rondom ons het ons ’n artikel soos dié nodig om ons te help om gebalanseerd te bly. Ek ken kinders wat van kleins af uiters wreed behandel is. Vandag is hulle tienderjariges met ernstige emosionele probleme. Ons het sulke inligting nodig om ons te help om ons kinders op ’n liefdevolle manier te rig en te leer.
M. B., Verenigde State
Ontwerpersklere Dankie vir die artikel “Jongmense vra . . . Ontwerpersklere—Moet ék dit dra?” (8 September 1992). Toe ek ’n jaar gelede uit my werk bedank het om ’n voltydse evangeliebedienaar te word, kon ek nie meer ontwerpersklere bekostig nie. Dit het my ’n tyd lank ongelukkig gemaak. Maar nou kan ek sien dat ek die regte keuse gemaak het en dat klere as statussimbole my niks gebaat het nie.
M. J. C., Brasilië
Aralmeertragedie Baie dankie vir die artikel “Die tragedie van die Aralmeer” (22 Augustus 1992). Hierdie binnelandse meer, asook die nabygeleë Kaspiese See, bekoor my al sedert my skooldae. Deur die jare heen het ek daarin geslaag om materiaal oor die grootste van die twee mere te versamel, maar totdat julle artikel verskyn het, was besonderhede oor die Aralmeer uiters skaars.
D. H., Duitsland
Grootouers Hoewel ek en my vrou nie meer jonk is nie, het ons die “Jongmense vra . . .”-artikels oor hoe om saam met grootouers te woon baie waardeer (8 Julie en 22 Julie 1992). Ons het onlangs by my vrou se grootmoeder ingetrek, en dit het vir ons ware uitdagings ingehou. Julle goeie Bybelse raad en verstandige insig ten opsigte van bejaardes was net wat ons nodig gehad het. Twee gesinstudies oor daardie artikels en die praktiese toepassing van die raad het ons situasie beslis verbeter.
J. L., Verenigde State
Death Metal Julle artikel “Death Metal—Wat is die boodskap?” (8 Julie 1992) het by my ’n snaar aangeroer. Ek het ’n voortdurende stryd teen hierdie musiek gehad. Julle artikel het my die krag en moed gegee om van hierdie sataniese musiek ontslae te raak. Daar is nog ’n lang stryd wat vir my voorlê, maar met Jehovah se hulp sal ek dit kan oorwin.
M. D., Verenigde State
Vigs Julle artikel oor “Vigs in Afrika” (8 Augustus 1992) was baie betroubaar! Die raad aan jongmense wat aan trou dink, kan selfs hulle lewe red. Ek is ’n pas gedoopte Christen, en vanweë my vorige lewenstyl het ek my vir die HIV-infeksie laat toets. My toets was negatief. Ek wonder waarom party wat getoets moet word, aarsel om dit te laat doen. Baie getroudes wie se huweliksmaats al ontrou was, hoop eenvoudig op die beste. Maar dit raak te gevaarlik om net te wag en te hoop dat hierdie dodelike siekte nie al oorgedra is nie.
L. J., Verenigde State
Ons waardeer hierdie openhartige kommentare. Volgens die Amerikaanse Centers for Disease Control kan dit die liggaam tussen drie en ses maande ná infeksie neem om genoeg teenliggaampies te vervaardig om deur ’n HIV-toets waargeneem te word. Dit kan gevolglik raadsaam wees om weer getoets te word indien die toets kort na moontlike blootstelling aan die vigs-virus gedoen is.—RED.
Ek wil graag waardering uitspreek vir die artikel “Vigs—Gesondheidswerkers tref voorsorg!” (22 Junie 1992). Ek werk by ’n mediese sentrum vir noodgevalle. Kort nadat ek hierdie artikel gelees het, het ons ’n personeelvergadering gehou waartydens hierdie selfde voorsorg breedvoerig bespreek is. Ek kon vir die ander vertel dat ek eerste hiervan in die Ontwaak! gelees het.
T. M., Verenigde State