Ons beskou die wêreld
Wie wil die kinders hê?
“Jy kan die kinders kry skat, ek sal die kontant neem.” Hierdie opskrif in die Mainichi Daily News was ’n opsomming van talle Japannese vrouens se antwoord op ’n vraag oor wat hulle sal wil hou as hulle ooit sou skei. Volgens ’n onlangse opname deur Hakoehodo, ’n reklamemaatskappy, is spaargeld in die bank, kontant en vakansiehuise die drie dinge wat die hoogste voorkeur geniet. Seuns was vierde, gevolg deur dogters, dan huise, televisies, kunswerke en handsakke. Pa’s het ook min tyd vir hulle kinders. ’n Afsonderlike opname deur Tokai-bank het bevind dat 69 persent van die Japannese pa’s sê dat hulle só besig met hulle werk is dat hulle nie tyd het om met hulle kinders te gesels nie. Trouens, 22 persent sê dat hulle in elk geval niks met hulle kinders gemeen het om oor te gesels nie.
Katolieke okkultiste
Beheptheid met die paranormale steek blykbaar kop uit onder al hoe meer Katolieke. Katolieke geestelikes vra dat die “kerklike verbod op die beoefening van spiritisme” herroep word, sê die Katolieke weekblad Il Sabato. Party Katolieke leiers en hulle volgelinge staan weens hulle belangstelling in die okkulte as “Katoliek-okkultiste” bekend. Hulle is oortuig dat hulle met die dooies in aanraking kan kom, hulle met ’n televisiekamera kan afneem en hulle stem met ’n bandopnemer kan opneem. Die akademie van een pouslike universiteit het reeds ’n baie gewilde kursus in paranormale studies aangebied. Maar nie almal keur dit goed nie. ’n Jesuïet wat by ’n ander pouslike universiteit onderwys gee, het gesê: “Daar is ’n veiliger en edeler manier om met die dooies te praat: gebed.” Die Bybel verduidelik egter dat die dooies van niks bewus is nie en dat dit onmoontlik is om met hulle te kommunikeer, watter metode ook al gebruik word.—Prediker 9:5.
Vetter kinders—Waarom?
“Die kinders van vandag is vetter en minder aktief as ooit tevore”, berig The Toronto Star. “Swaarlywigheid onder kinders het gedurende die afgelope 20 jaar nogal opvallend toegeneem”, sê dr. Oded Bar-Or, hoof van kindervoeding by die Chedoke-McMaster-hospitale in Hamilton, Kanada. Studies dui daarop dat dit aan ’n gebrek aan oefening en aan ’n ongebalanseerde dieet toegeskryf kan word. Dokters vrees dat kinders se fiksheidsvlak skerp sal daal as die neiging voortduur. Volgens die Star het dokters reeds “’n gebrek aan oefening as ’n risikofaktor vir . . . koronêre hartkwaal, hoë bloeddruk, suikersiekte en osteoporose geïdentifiseer”. Dr. Bar-Or kom tot die gevolgtrekking dat “’n onaktiewe kind waarskynlik ’n gesette volwassene sal word”. Hy beveel ’n aktiewe lewenstyl aan.
Las van kwaai hoofpyne
Deskundiges skat dat sowat 15 miljoen mense in die Duitse Bondsrepubliek aan verskillende soorte kwaai hoofpyne ly. Een van die algemeenste soorte is migraine, en vier keer meer vroue as mans ly daaraan. ’n Migraine-aanval duur ongeveer 18 uur en daar word algemeen aanvaar dat daar geen genesing vir hierdie kwaal is nie. Die koerant Süddeutsche Zeitung berig boonop dat “ten minste 1,5 miljoen Duitsers las het van aanhoudende hoofpyne wat deur pynstillers veroorsaak word”. Die probleem ontstaan wanneer iemand oor ’n tydperk van jare gereeld pynstillers neem om hoofpyne te verlig. Die koerant het bygevoeg dat die enigste doeltreffende terapie vir hierdie soort hoofpyn is om nie meer die pynstillers te neem nie.
’n Geneesmiddel vir melaatsheid
Moet melaatses vermy of werk geweier word? Nie volgens ’n artikel in die Suid-Afrikaanse tydskrif Farmer’s Weekly nie. Okkie Kruger van die Melaatsheidsending het gesê: “Binne ’n paar uur nadat daar met hulle behandeling begin is, kan hulle ’n mens nie meer aansteek nie en kan hulle saam met hulle gesin ’n normale lewe lei.” Die slagoffers sal ook nie permanent vermink wees as hulle vroeg genoeg behandeling kry nie, aangesien “aansienlike vooruitgang gedurende die afgelope dekade gemaak is in die behandeling van die siekte” met ’n terapie wat uit verskeie geneesmiddels bestaan. Farmer’s Weekly het gesê dat daar volgens die Wêreldgesondheidsorganisasie tussen 10 miljoen en 15 miljoen melaatses in die wêreld is.
Rookbesoedeling
Verbeter die rook van sigarette ’n mens se denkvermoë? Baie rokers sê ja. Maar onlangse navorsing in die Verenigde State dui presies die teenoorgestelde aan. As ’n mens rook, verminder dit jou konsentrasievermoë en verswak dit jou langtermyngeheue, sê die Guardian Weekly in ’n verslag oor ’n studie wat by die Washington-kollege in Maryland gedoen is. Daar is ook bevind dat die rookgewoonte ’n mens se reaksietyd vertraag. Tydens ’n ryvernuftoets is daar vasgestel dat rokers ’n 3,5 keer groter kans as nie-rokers staan om ongelukke te maak. Waarom? Dokters vermoed dat langtermynrokery moontlik ’n uitwerking het op die bloedtoevoer na dele van die brein wat inligting verwerk.
Hulle faal in die eerlikheidstoets
’n Pantservragmotor wat sakke geld vanaf ’n bank in die stad New York vervoer het, het twee van die sakke per ongeluk op een van die besigste hoofweë in die stad laat val. Die verkeer het skielik tot stilstand gekom. Die sakke “het oopgebars en dollarnote etlike minute lank op motoriste laat reën”, berig Newsday. Van die meer as $300 000 (R885-000) wat in die sakke was, is slegs sowat $3500 (R10 325) teruggekry. In New York is dit gewoonlik onwettig om geld wat ’n mens optel, te hou as dit meer as $20 (R59) is. Een amptenaar het die voorval beskryf deur te sê: “Dit was asof ’n mens ’n stuk vleis vir haaie gegooi het. Mense het die geld eenvoudig by mekaar gegryp.” Iemand het vir ’n polisiewoordvoerder gesê dat ’n spesiale telefoonnommer gegee moet word vir diegene wat die geld wou teruggee. Die woordvoerder het glo “vir ’n oomblik stom gestaan en toe gelag”.
Dodelike kieme keer terug
Wetenskaplikes het blykbaar die herstellingsvermoë onderskat van party mikrobes wat siektes veroorsaak. Ná jare van roemryke oorwinnings oor gevaarlike kieme “sê dokters nou dat hulle al hoe meer probleme ondervind in die behandeling van ’n verskeidenheid infeksies”, sê die U.S.News & World Report. Volgens die tydskrif volg party mikrobes “slim genetiese strategieë waardeur hulle die ontwikkeling van nuwe antibiotikums kan oortref”. Hospitale, crèches en skuilings vir die dakloses word ’n teelaarde vir siektes soos harsingvliesontsteking en tuberkulose. Een rede vir die toename in kiembedrywigheid is dat mense so vinnig na voorheen ongerepte lande stroom. “Namate mense versprei het en meer as ander diere geword het, het hulle aanlokliker teikens geword”, het die U.S.News & World Report gesê. Een deskundige sê dat “mense nou by voorkeur die gashere van parasiete en siektekieme is”.
Televisie se aantrekkingskrag
Sal jy, as jy eenmiljoen rand aangebied word om nooit in jou lewe weer televisie te kyk nie, daardie aanbod aanvaar? Dit is interessant dat 1 uit elke 4 Amerikaners volgens die International Herald Tribune dit nie sal doen nie. Volgens ’n opname wat deur die tydskrif TV Guide van stapel gestuur is, het die helfte van dié wat ondervra is, gesê hulle sal TV nie vir minder as ’n miljoen rand opgee nie. In teenstelling hiermee het 1 uit 4 gesê hy sal TV vir slegs R25 000 vir die res van sy lewe opgee. Die meeste mense het gesê hulle kyk minder TV as twee jaar gelede, maar net 1 uit 8 mense het skuldig gevoel omdat hulle te veel televisie kyk.
Geld en die kerk
Volgens La Maga, ’n Argentynse tydskrif, woon ’n skrale 3 persent van die Argentynse Katolieke die Mis by. Tog is Argentinië steeds die enigste land ter wêreld met ’n grondwetartikel wat bepaal dat die regering die Katolieke Kerk finansieel moet ondersteun. Wette is uitgevaardig waarvolgens hoë salarisse vir Argentynse biskoppe en ander Katolieke ampsdraers vasgestel is. Wanneer die kontant, kwytskeldings, subsidies en ander toegestane voorregte bymekaargetel word, kom die staatshulp altesaam op ’n jaarlikse minimum van 246 miljoen peso’s (R722 750 000) te staan. Waar kom die geld vandaan? Van die regering af. Maar die regering kry dit by “al die Argentyne—ongeag wat hulle godsdiensopvatting is”, sê La Maga.
Die stryd teen motordiewe
Versteekte seintoestelle wat klein genoeg is om in jou hand te hou, help die polisie nou volgens die International Herald Tribune om gesteelde motors op te spoor. Een maatskappy in die Verenigde State, wat sowat 150 000 motors met die seintoestel ter waarde van R1770 toegerus het, sê dat 95 persent van die 3500 motors wat met die seintoestel toegerus is en sedert 1986 gesteel is, teruggevind is. In ’n poging om nie gevang te word nie, ry party diewe nou slegs ’n paar kilometer met ’n gesteelde motor en laat dit dan daar staan. As dit nie binne ’n paar dae opgespoor word nie, neem die diewe aan dat dit nie ’n seintoestel in het nie.
Moeders sterf ook weens aborsies
Na raming “sterf een vrou elke minuut as gevolg van swangerskap en ’n bevalling”, sê die tydskrif Choices. Die tydskrif voeg by dat “meer as ’n halfmiljoen moeders elke jaar weens swangerskapverwante oorsake sterf. En vir elke vrou wat sterf, word honderd ander siek of doen gebreke op.” In Latyns-Amerika sterf ongeveer 1 uit elke 73 vroue weens swangerskapkomplikasies. In Asië sterf sowat 1 uit elke 54 vroue; en in Afrika 1 uit 21. Hierdie syfers is baie hoog in vergelyking met die verhouding van 1 uit elke 10000 in Wes-Europa. Een van die redes vir swangerskapverwante sterftes is “aborsie, wat op sigself verantwoordelik is vir meer as 200-000 van die 500 000 sterftes onder moeders wat jaarliks wêreldwyd plaasvind”, het Choices gesê.