’n Slagtingsgedenkmuseum en Jehovah se Getuies
DIE Nazi-skrikbewind het ’n grusame slagting van miljoene slagoffers, veral Jode en Slawe, tot gevolg gehad. Maar een godsdiensgroep—Jehovah se Getuies—het gesamentlik geweier om hulle aan die Nazi-regime te onderwerp, nie weens ras of nasionaliteit nie, maar omdat hulle gewetensgetrou by Bybelbeginsels gebly het.—Johannes 17:14, 16.
Die Nazi-staat het hulle daarop toegespits om Jehovah se Getuies hewig te vervolg—’n aanval wat buite alle verhouding tot hulle getalle was. Waarom? Die Getuies het weens godsdiensredes lidmaatskap en diens aan die Duitse Vakbond geweier en het enige eed aan Hitler as die Führer verwerp. Die Nazi’s het hulle dus in April 1933 as ’n organisasie in die ban gedoen. Hulle is van burgerlike sowel as godsdienstige ongehoorsaamheid beskuldig en was een van die eerste groepe wat in konsentrasiekampe gegooi is. “Meer as 30 000 Getuies is uiteindelik deur die Nazi’s vervolg”, sê ’n museumnuusbrief.
Die Verenigde State se Slagtingsgedenkmuseum, wat in Washington, DC, geleë is, is opgerig om die verhaal uit te beeld van alle groepe wat deur die Nazi’s vervolg is, wat Jehovah se Getuies insluit. Een bron sê dat die museum “veral van belang behoort te wees vir Amerikaners en buitelandse besoekers wat Jode en Jehovah se Getuies is, wat die skyf van die volksmoord deur die Hitler-regime was”. Deur middel van artefakte, dokumente, ooggetuieverslae wat op videoband is, geskiedkundige foto’s, asook inligting wat op film is, sluit die museum se tentoonstelling, biblioteek en argief die ondervindinge in van verskeie groepe wat slagoffers tydens die oorlog was. Die museum het onderhoude met 74 Getuies van Jehovah wat slagoffers van die Nazi-bewind was op videoband opgeneem. Die museum is in April 1993 vir die publiek oopgestel.
[Foto-erkenning op bladsy 31]
Courtesy of United States Holocaust Memorial Museum