Kan musiek jou werklik benadeel?
STEL jou die volgende voor: Iemand by die werk nooi jou na sy huis vir ete. Jy aanvaar die uitnodiging. In die loop van die aand vind jy ’n paar skokkende feite uit omtrent jou gasheer. Hy is sadisties, toon ’n neiging tot selfmoord, gebruik vulgêre taal en staan duiwelaanbidding voor. Sal jy nóg ’n aand in sy geselskap wil deurbring? “Nee!” antwoord jy.
En wat as hierdie persoon boonop daardie aand sy verwronge opvattings en denkwyse op band vaslê en vir jou die kasset gee? Sal jy jou daaraan blootstel deur herhaaldelik daarna te luister? Beslis nie.
Feit is egter dat miljoene hulle vandag op hierdie manier blootstel. Gevolglik aanvaar baie wat na hierdie musiek luister die denkwyse en gedrag wat daardeur aangemoedig word.
Na watter musiek verwys ons? Feitlik enige soort musiek kan ’n verderflike invloed hê. Of ’n mens nou klassieke musiek, jazz of ’n ander soort musiek verkies, dit is nodig dat jy versigtig en selektief moet wees.
Daar is egter sekere soorte musiek waarin die onheilsaamste onderwerpe eksplisiet uitgebeeld word. Dit bied ’n besondere uitdaging. U.S.News & World Report beskryf die hooftema van heavy metal-musiek as “tienernihilisme, met oorvloedige dosisse gewelddadige seks en die gedagte van selfmoord wat nou en dan voorkom daarby”. Dr. David Elkind praat van party rockgroepe wat “hulleself so te buite gaan wat onwelvoeglike taal en gedrag betref dat hulle die hele rockmusiekbedryf oneer aandoen”. In party gebiede het sekere plate en kassette selfs ’n etiket op wat waarsku dat hulle inhoud eksplisiet is.
Oorreageer mense net op musiek wat nie volgens hulle persoonlike smaak is nie, of is daar werklik rede tot kommer? Kom ons beskou van naderby sommige van die rockmusiek wat tans groot gedeeltes van die publiek deur middel van albums, musiekvideo’s op televisie, asook konserte, bereik. Let op hoe mense daardeur beïnvloed word. Besluit dan self of hierdie vermaak onskadelike pret of gif vir die verstand is. Is dit iets waarby jy of jou gesin intiem betrokke moet wees of selfs aan blootgestel moet word?