Deel 6

Die wetenskap—die mensdom se voortdurende soeke na waarheid

Kan dit die uitdagings van die 21ste eeu die hoof bied?

NEGE, agt, sewe, . . . ! Is dit die aftelling vir die lansering van ’n vuurpyl? Nee, dit is eerder die aftelling van die aantal jare wat nog oor is voordat die mens voor die onsekerhede van die 21ste eeu te staan kom.a

Na aanleiding van die wetenskaplike prestasies van die vorige eeu glo talle dalk in alle opregtheid dat die wetenskap enige uitdaging wat die 21ste eeu moontlik inhou die hoof kan bied.b Hulle voel dalk soos ’n Franse skrywer aan die begin van die 20ste eeu gevoel het. “Die wetenskap is vandag daarvoor bestem om die wêreld te regeer”, het hy geskryf. “Van nou af behoort wêreldheerskappy nie aan die godheid nie, maar aan die wetenskap, aan die wetenskap as die volk se weldoener en die mens se bevryder.”

As die wetenskap aan hierdie verwagtinge moet voldoen, sal dit baie van die probleme moet oplos wat dit help skep het.

Die vernietiging van die omgewing waarvoor die wetenskap verantwoordelik is, is verskriklik. Die boek 5000 Days to Save the Planet sê: “As ons aanhou om die omgewing so uit te put, is die vraag nie of die hedendaagse gemeenskap die volgende eeu sal oorleef nie, maar of dit met ’n ontploffing of net stilweg sal verdwyn.”

Dit lyk beslis nie na ’n aanvaarbare keuse nie.

Die beperkinge van die wetenskap

“Baie wetenskaplikes van die 19de eeu . . . het gedink dat hulle eendag absolute waarheid en algehele begrip sou verkry”, sê die boek The Scientist. “Hulle opvolgers”, sê die boek vervolgens, “praat net van ‘gedeeltelike begrip’ wat verkry sal word, van waarheid waarna daar gedurig gesoek word, maar wat nooit ten volle begryp sal word nie.” Hierdie gebrek aan absolute kennis stel ernstige beperkinge op wat die wetenskap kan doen.

Wetenskaplike feite het nooit deur die jare heen verander nie, terwyl wetenskaplike teorieë wel verander het—en dít herhaaldelik. Trouens, teorieë het met tye van die een uiterste na die ander oorgeslaan. Mediese wetenskaplikes het byvoorbeeld vroeër geglo dat dit wetenskaplik reg was om iemand wat ernstig siek was se bloed af te tap. Later het hulle geglo dat die toediening van bloed die antwoord was. Nou begin party die wysheid daarvan besef om nie een van die twee te doen nie en om na ander minder gevaarlike behandelings te soek.

Wat wetenskaplikes weet, is klaarblyklik veel minder as wat hulle nie weet nie. The World Book Encyclopedia sê: “Plantkundiges weet nog steeds nie presies hoe fotosintese werk nie. Bioloë en biochemici het nog nie die antwoord gevind op die vraag oor hoe lewe ontstaan het nie. Sterrekundiges het nog nie ’n bevredigende verklaring vir die oorsprong van die heelal gekry nie. Mediese wetenskaplikes en fisioloë weet nie wat die oorsaak van kanker is of hoe om dit of die verskeie virussiektes te genees nie. . . . Sielkundiges ken nie al die oorsake van geestesiektes nie.”

Die wetenskap is ook beperk in die sin dat dit niks beters as die mense, die wetenskaplikes, kan wees nie. ’n Wetenskaplike se gebrek aan kennis word met ander woorde deur sy onvolmaaktheid vererger. Die skrywers van 5000 Days to Save the Planet het uitgevind dat “eendoelorganisasies keer op keer . . . navorsing gemanipuleer, kostevoordeelanalises verdraai en inligting verswyg het om skadelike produkte te verkoop of bedrywighede voort te sit wat nadelig is vir die omgewing”.

Selfs al is die meeste wetenskaplikes eerlik, is dit steeds nie ’n rede om hulle of hulle werksaamhede op ’n voetstuk te plaas nie. “Hulle is net soos enigiemand anders”, sê Britsgebore Edward Bowen, self ’n wetenskaplike. “Hulle het almal hulle tekortkominge. Party is toegewyd, party is gewetenloos, party is so slim soos die houtjie van die galg, ander is morsdood vervelend. Ek het ’n paar van die groot name in die wetenskap geken, manne wat vreeslik baie vir die wêreld beteken het. En hoewel ek geen wetenskaplike geken het wat in die tronk was nie, het ek ’n paar geken wat dubbel en dwars verdien het om daar te wees.”

Dit is duidelik dat die hedendaagse wetenskap vanweë sy talle beperkinge nie in staat is om die uitdagings van die 21ste eeu die hoof te bied nie. Dit het veral nie die omgewing bewaar nie, en pleks dat dit gehelp het om die aarde van oorlog te bevry, het dit gehelp om wapens vir massa-uitwissing te vervaardig.

Dringende optrede is nodig

Almal stem saam dat iets binnekort gedoen moet word. Verlede November het ’n groep van 1575 wetenskaplikes, onder andere 99 Nobelpryswenners, ’n verklaring uitgereik met die titel “Wêreldwetenskaplikes se waarskuwing aan die mens” waarin hulle geskryf het: “Daar is nog net een of ’n paar dekades oor voordat die kans verlore sal wees om die bedreigings af te weer waarmee ons nou te kampe het en die mens se vooruitsigte veel slegter sal wees.” Hulle het gesê: “Die mens en die sigbare wêreld stuur op ’n botsing af.”

Soortgelyke waarskuwings is al vantevore gegee. Trouens, in 1952 het Bertrand Russell, ’n 20ste-eeuse Britse filosoof en self ’n voorstander van die wetenskap, gesê: “As die menslike lewe tog ten spyte van die wetenskap voortbestaan, sal die mens ’n dissipline van die emosies moet aanleer wat nie in die verlede nodig was nie. Mense sal hulle aan die wet moet onderwerp, selfs wanneer hulle dink dat die wet onregverdig en onbillik is. . . . As dit nie gebeur nie, sal die mensdom tot niet gaan, en dit sal as gevolg van die wetenskap tot niet gaan. ’n Duidelike keuse sal binne vyftig jaar gemaak moet word, die keuse tussen Redelikheid en die Dood. En met ‘Redelikheid’ bedoel ek ’n bereidwilligheid om hulle aan die wet te onderwerp soos dit deur ’n internasionale gesag ingestel word. Ek is bevrees dat die mensdom waarskynlik die Dood sal kies. Ek hoop ek is verkeerd.”

Om die waarheid te sê, min mense is deesdae bereid om hulle aan regverdige standaarde te onderwerp. Die gewese leier op die gebied van burgerlike regte, Martin Luther King, het tereg gesê: “Ons wetenskaplike krag het die grense van ons geestelike krag oorskry. Ons het projektiele gelei en mense mislei.” Maar Bertrand Russell het in werklikheid onwetend die oplossing vir die wêreld se probleme gevind toe hy gesê het dat mense hulle ‘aan die wet sal moet onderwerp soos dit deur ’n internasionale gesag ingestel word’.

Wie kan die probleem oplos?

Bertrand Russell het weliswaar nie na ’n Goddelike gesag verwys toe hy van die wet gepraat het wat deur ’n internasionale gesag ingestel word nie. Maar gehoorsaamheid aan die wette van so ’n gesag is presies wat nodig is. Mensewette en -gesag is beslis nie die antwoord nie. Dit sal nooit die wêreld kan verander en sodoende ’n ramp voorkom nie. Die droewige geskiedkundige rekord toon dat mense Goddelike heerskappy nodig het.c

Ja, net die almagtige God, wie se naam Jehovah is, kan ’n internasionale gesag voorsien wat die krag en vermoë het om die uitdagings van die 21ste eeu die hoof te bied (Psalm 83:18, NW). Die gesag waaraan almal hulle moet onderwerp as hulle lewe wil ontvang, is God se Koninkryk, wat ’n hemelse wêreldregering is wat deur die Skepper, Jehovah God, opgerig is.

Lank gelede het die Bybel aangaande hierdie regering voorspel: “Want vir ons is ’n kind gebore, aan ons is ’n seun gegee: en die regering sal op sy skouer wees: en hy sal genoem word . . . Vredevors. Daar sal geen einde wees aan die uitbreiding van sy regering en aan vrede nie” (Jesaja 9:6, 7, King James Version). Hierdie voorspelde kindjie, Jesus Christus, is op wonderdadige wyse in die maagd Maria verwek en te Bethlehem in Judea gebore.—Lukas 1:30-33.

Terwyl Jesus op aarde was, het hy sy volgelinge geleer om vir God se regering te bid toe hy gesê het: “Só moet julle dan bid: . . . Laat u koninkryk kom; laat u wil geskied, soos in die hemel net so ook op die aarde” (Mattheüs 6:9, 10). Net Jehovah God se kragtige heilige gees, of werkende krag, kan gewillige mense help om in ooreenstemming met die regverdige wette van sy regering die nodige veranderinge in hulle lewe aan te bring. Die wetenskap kan nie. Duisende jare van verdeeldheid en verwarring bewys dat dit nie kan nie.

Jehovah God, wat oor onbeperkte, akkurate wetenskaplike kennis beskik, sal toesien dat Paradystoestande op die aarde heers, net soos in die tuin van Eden toe hy die eerste mensepaar geskep het. Hy het toe aan hulle die opdrag gegee: ‘Wees vrugbaar en vermeerder en vul die aarde en onderwerp dit’ (Genesis 1:28). Hoewel hulle ongehoorsaam was en nie daardie opdrag uitgevoer het nie, sal Jehovah God toesien dat sy oorspronklike voorneme dat hierdie aarde ’n paradys sal wees, vervul word. “Soos Ek dit gespreek het, sal Ek dit ook laat kom”, sê hy (Jesaja 46:11). Maar wanneer sal God se oorspronklike voorneme vir die aarde vervul word?

Jesus Christus en sy apostels het die toestande beskryf wat tydens “die laaste dae” op die aarde sal bestaan, net voordat God se Koninkryk alle menseregerings vervang (2 Timotheüs 3:1-5; Mattheüs 24:3-14, 37-39; 2 Petrus 3:3, 4). Wanneer ’n mens die Bybelprofesieë lees wat hier genoem word en hulle met wêreldgebeure vergelyk, word dit duidelik dat ons in die tyd leef wanneer God se Koninkryk dít sal doen wat in die Bybel in Daniël 2:44 beskryf word: “In die dae van dié konings [die menseregerings wat nou regeer] sal die God van die hemel ’n koninkryk verwek wat in ewigheid nie vernietig sal word nie, en die heerskappy daarvan sal aan geen ander volk oorgelaat word nie; dit sal al daardie koninkryke verbrysel en daar ’n einde aan maak, maar self sal dit vir ewig bestaan.”

Die lewe in die nabye toekoms

Dink net wat dit vir die nabye toekoms sal beteken! Watter wonderlike dinge wag op die mensdom gedurende die komende eeu, indien nie selfs vroeër nie! Die slegte gevolge van duisende jare se onvolmaakte menslike bewind, huigelagtige godsdiens, hebsugtige handel en die wetenskap van hierdie wêreld sal deur Goddelike heerskappy vervang word, wat vir mense seëninge sal inhou wat hulle beste verwagtinge sal oortref.

Dit is hoe die Bybel die gebeure beskryf wat beslis in God se regverdige nuwe wêreld sal plaasvind: “Kyk, die tabernakel van God is by die mense, en Hy sal by hulle woon, en hulle sal sy volk wees; en God self sal by hulle wees as hulle God. En God sal al die trane van hulle oë afvee, en daar sal geen dood meer wees nie; ook droefheid en geween en moeite sal daar nie meer wees nie, want die eerste dinge het verbygegaan.”—Openbaring 21:3, 4.

Dit is dus vir jou van die grootste belang om bewus te wees van die aftelling wat binnekort sal eindig met die vernietiging van hierdie wêreldstelsel wat onder die beheer van die magtige, onsigbare wêreldheerser, Satan die Duiwel, is (Johannes 12:31; 2 Korinthiërs 4:3, 4). Dit is lewensbelangrik dat jy leer wat God se wil is en dit doen, want die Bybel belowe: “Die wêreld gaan verby en sy begeerlikheid, maar hy wat die wil van God doen, bly vir ewig.”—1 Johannes 2:17.

Mag jy dus, solank die tyd dit toelaat, wyslik van Jehovah se voorsienings vir oorlewing gebruik maak. Dan sal jy bevoorreg wees om die lewe in die toekoms te geniet, ja, gedurende die komende 21ste eeu—asook gedurende die 22ste, 23ste en tallose ander eeue daarna.

[Voetnote]

[Venster op bladsy 23]

Goeie nuus te midde van slegte nuus

Ondanks wetenskaplike vooruitgang is daar steeds ’n menigte uitgehongerde kinders en uitgeteerde volwassenes. Maar binnekort, onder God se Messiaanse Koninkryk, sal “daar volheid van koring wees in die land, op die top van die berge”.—Psalm 72:16.

Ondanks wetenskaplike vooruitgang gaan miljoene steeds gebuk onder verdrukking en geweld. Maar binnekort sal die Koning van God se Messiaanse Koninkryk “die behoeftige red wat daar roep om hulp, en die ellendige en wie geen helper het nie. . . . Hy sal hulle siel verlos van verdrukking en geweld.”—Psalm 72:12-14.

Ondanks mediese vooruitgang neem die aantal haweloses, wat nie huisvesting en genoeg kos het nie, steeds toe oor die hele wêreld. Maar binnekort, onder God se Messiaanse Koninkryk, sal mense “huise bou en bewoon . . . hulle sal nie bou dat ’n ander dit bewoon nie; hulle sal nie plant dat ’n ander dit eet nie”.—Jesaja 65:21, 22.

Ondanks mediese vooruitgang sterf miljoene steeds aan voorkombare siektes. Maar binnekort, onder God se Messiaanse Koninkryk, ‘sal geen inwoner sê: Ek is siek nie’.—Jesaja 33:24.

[Prent op bladsy 24]

Oral op die aarde sal die lewe ’n genot wees

[Erkenning]

Courtesy Hartebeespoortdam Snake and Animal Park