Wanneer alle rasse in vrede sal saamwoon
“IT een mens het [God] al die nasies gemaak. Hy het hulle gemaak om oor die hele aarde te woon” (Handelinge 17:26, NAV). Dit is die Bybel se eenvoudige verklaring oor die oorsprong van die mensegesin.
Dit impliseer dat die hele mensdom, ongeag waar hulle woon of watter fisiese kenmerke hulle het, van een gemeenskaplike gesin afstam. Dit beteken ook dat “al die nasies” ten spyte van al die opmerklike verskille dieselfde potensiaal het wat vermoëns en intelligensie betref. Ja, mense van elke ras of nasionaliteit is in God se oë gelyk.—Handelinge 10:34, 35.
As die Bybel se beskouing reg is, is daar hoop dat al die vooroordele en ongeregtighede wat op rasseverskille berus uit die weg geruim kan word. Indien die Bybel boonop akkuraat is oor die oorsprong van die mensegesin, sal daardie selfde boek ons logieserwys van inligting kan voorsien wat toon hoe die menseras in vrede kan saamwoon.
Wel, wat toon die feite? Word die Bybelverslag oor die mens se oorsprong deur die wetenskap gestaaf?
Wetenskaplike getuienis
Die publikasie The Races of Mankind, deur die antropoloë R. Benedict en G. Weltfish, sê: “Die Bybelverhaal van Adam en Eva, vader en moeder van die hele menseras, het eeue gelede dieselfde waarheid vertel wat die wetenskap vandag bewys: dat al die volke van die aarde een enkele gesin is en ’n gemeenskaplike oorsprong het.” Hierdie skrywers toon ook dat “die komplekse samestelling van die menseliggaam . . . onmoontlik ‘toevallig’ in alle mense dieselfde is as hulle nie ’n gemeenskaplike oorsprong gehad het nie”.
Die pamflet Race and Biology deur L. C. Dunn, professor in dierkunde aan die Columbia-universiteit, sê: “Alle mense behoort klaarblyklik tot een spesie omdat hulle basiese fisiese kenmerke dieselfde is. Lede van alle groepe kan ondertrou, en hulle doen dit ook.” Dan verduidelik dit verder: “Elke mens is nietemin uniek en verskil in mindere mate van elke ander mens. Dit is deels weens die verskillende omgewings waarin mense woon en deels weens die verskille in die gene wat hulle geërf het.”
Die wetenskaplike getuienis is oortuigend. Biologies gesproke bestaan daar nie iets soos ’n meerderwaardige of ’n minderwaardige ras, ’n suiwer of ’n ontaarde ras, nie. Kenmerke soos ’n mens se vel-, haar- of oëkleur—dinge wat sommige as belangrik in rasse beskou—is geen aanduiding van iemand se intelligensie of vermoëns nie. Dit is eerder die gevolge van genetiese oorerwing.
Rasseverskille is inderdaad gering, soos Hampton L. Carson in Heredity and Human Life skryf: “Die paradoks waarvoor ons te staan kom, is dat dit lyk asof elke groep mense uiterlik verskil, en tog is daar onder hierdie verskille basiese ooreenkomste.”
Waarom bestaan daar dan ontsaglike rasseprobleme as alle mense in werklikheid slegs een gesin uitmaak?
Waarom die probleem bestaan
Die grondrede waarom rassisme bestaan, is die slegte begin wat die eerste mense-ouers hulle nageslag gegee het. Adam en Eva het moedswillig teen God gerebelleer en dus onvolmaak, vol foute, geword. Adam se onvolmaaktheid—sy neiging tot boosheid—is gevolglik aan sy nakomelinge oorgedra (Romeine 5:12). Alle mense is dus van geboorte af geneig tot selfsugtigheid en trots, en dit het tot rassekonflik en onrus gelei.
Daar is nog ’n rede waarom rassisme bestaan. Toe Adam en Eva God se heerskappy verwerp het, het hulle onder die bewind van ’n bose geespersoon gekom wat in die Bybel Satan, of die Duiwel, genoem word. Dit was onder die invloed van hierdie geespersoon, wat “die hele wêreld verlei”, dat daar dikwels doelbewuste pogings aangewend is om mense oor die rassekwessie te mislei (Openbaring 12:9; 2 Korinthiërs 4:4). Etnosentrisme—die idee dat ’n mens se eie bevolkingsgroep verhewe is—is aangeblaas tot ’n verterende vuur, en miljoene mense is, wetend of onwetend, meegesleur, met rampspoedige gevolge.
Om doodeerlik te wees, selfsugtige, onvolmaakte mense onder Satan se beheer het al die valse leerstellings oor rasse versprei wat vir rasseprobleme verantwoordelik is.
Om ’n verenigde menseras moontlik te maak, sal almal dus oortuig moet wees dat ons werklik een mensegesin is en dat God wel ‘uit een mens al die nasies gemaak het om oor die hele aarde te woon’ (Handelinge 17:26, NAV). Daarbenewens sal Satan se invloed op menseaangeleenthede uitgeskakel moet word voordat alle rasse in vrede sal kan saamwoon. Sal hierdie dinge ooit gebeur? Is daar enige grond om dit te glo?
Rassevooroordeel word beëindig
Jesus Christus het getoon hoe rassevooroordeel uitgeskakel kan word toe hy sy navolgers beveel het om ‘mekaar lief te hê’ net soos hy hulle liefgehad het (Johannes 13:34, 35). Dit sou nie net ’n liefde vir lede van ’n sekere ras of rasse wees nie. Hoegenaamd nie! ‘Julle moet die hele gemeenskap van broers liefhê’, het een van sy dissipels ons aangespoor.—1 Petrus 2:17, NW.
Hoe word hierdie Christelike liefde betoon? Die Bybel verduidelik waar dit ons aanspoor: “Die een moet die ander voorgaan in eerbetoning” (Romeine 12:10). Dink net wat dit sal beteken wanneer dit gedoen word! Elkeen behandel ander mense, ongeag hulle ras of nasionaliteit, met ware waardigheid en respek en sien nie op hulle neer nie, maar hy ag ander in werklikheid ‘hoër as homself’ (Filippense 2:3). Wanneer daar so ’n gees van ware Christelike liefde bestaan, is die probleem van rassevooroordeel opgelos.
Dit is waar dat dit van mense wat rassevooroordeel geleer is buitengewone inspanning sal verg om hulleself te bevry van sulke idees wat deur Satan geïnspireer is. Maar dit kan gedoen word! In die eerste eeu het almal wat in die Christengemeente ingebring is ongeëwenaarde eenheid geniet. Die apostel Paulus het daarvan geskryf: “Daar is nie meer Jood of Griek nie, daar is nie meer slaaf of vryman nie, daar is nie meer man en vrou nie; want julle is almal een in Christus Jesus” (Galasiërs 3:28). Die ware navolgers van Christus het inderdaad ’n opregte broederskap geniet.
Maar sommige mense maak dalk beswaar: ‘Dit sal nooit in ons tyd gebeur nie.’ Tog het dit reeds gebeur onder Jehovah se Getuies—’n organisasie van meer as vier en ’n half miljoen mense! Dit is waar dat nie alle Getuies heeltemal bevry is van vooroordele wat hulle in hierdie goddelose stelsel geleer het nie. ’n Swart Amerikaner het realisties omtrent blanke mede-Getuies opgemerk: “Ek bespeur onder sekeres oorblywende gesindhede van rassemeerderwaardigheid, en ek het al partykeer by hulle ’n mate van ongemaklikheid gesien wanneer hulle in noue kontak met mense van ’n ander ras is.”
Tog het hierdie persoon erken: “Jehovah se Getuies het hulle van rassevooroordeel bevry in ’n mate wat deur geen ander groep mense op aarde bereik is nie. Hulle probeer mekaar liefhê sonder om op die ras te let . . . By geleentheid was my hart so diep geroer deur die opregte liefde van blanke Getuies dat ek selfs onbedwingbaar begin huil het.”
Maak die rasse-eenheid wat deur ’n paar geniet word—selfs al tel hulle in die miljoene—werklik so ’n groot verskil wanneer miljoene ander deur Sataniese idees van rassemeerderwaardigheid beïnvloed word? Nee, ons gee toe dat dit nie die rasseprobleem oplos nie. Dit is nie in die mense se vermoë om dit te doen nie. Slegs ons Skepper, Jehovah God, kan dit doen.
Gelukkig sal Jehovah binnekort deur middel van sy Koninkryk in die hande van sy Seun, Jesus Christus, die aarde bevry van alle ongeregtigheid en van almal wat selfsugtig diskriminasie en rasse- of ander haat bevorder (Daniël 2:44; Mattheüs 6:9, 10). Dan sal alle rasse waarlik verenig word deur middel van ’n volmaakte onderrigtingsprogram onder die beheer van Christus. Namate daardie onderrigting vorder, sal hulle in volmaakte harmonie woon sonder enige sweempie van rassediskriminasie. God se belofte sal dan eindelik vervul wees: “Die eerste dinge het verbygegaan. . . . Kyk, Ek maak alles nuut.”—Openbaring 21:4, 5.
Is jy iemand wat uitsien na die tyd wanneer ware broederskap sal heers, wanneer alle rasse in vrede sal saamwoon? Indien wel, nooi ons jou om na ’n Koninkryksaal te gaan waar Jehovah se Getuies gereeld byeenkom om die Bybel te bestudeer. Gaan kyk self of hulle—vir mense van alle rasse—ware Christelike liefde openbaar.
[Prent op bladsy 10]
Binnekort sal alle rasse oral in vrede saamwoon