Van ons lesers

Internasionale byeenkomste Ek wil julle graag bedank vir die artikels “Wat sal die wêreld verenig?” (22 Desember 1993). Ek het die gedeelte oor die internasionale byeenkomste van Jehovah se Getuies in Oos-Europa werklik geniet. Dit was bemoedigend om te hoor dat sommige Christene uit oorloggeteisterde gebiede dit kon bywoon.

E. R., Verenigde State

Ek en my man is albei voltydse bedienaars; dus het ons begroting ons ongelukkig nie toegelaat om afgevaardigdes by ’n internasionale byeenkoms te wees nie. Maar toe ek julle artikels gelees het, het dit my die stemming van die byeenkoms laat ervaar. Ek kon selfs in my verbeelding met die Christensusters in die prent op bladsy 9 hartlik saamsing. Die artikel het my aangemoedig om te volhard.

I. F., Frankryk

Kommunikasie Nadat ek die artikels oor “Kommunikasie in die huwelik” (22 Januarie 1994) gelees het, het ek besef dat ek gedurende die 28 jaar wat ek getroud is nie vir my vrou die liefde gegee het waaraan sy behoefte het nie. Elke keer wanneer sy in daardie rigting gepraat het, het ek dit sonder meer as onvolwassenheid afgemaak. Hierdie artikels het my gehelp om te verstaan presies hoe God die vrou gemaak het. In die toekoms sal ek probeer om my vrou die liefde te gee wat sy nodig het. Dankie vir hierdie juiste kennis.

Y. K., Japan

Ek kan julle net nie vertel hoeveel ek dié artikels geniet het nie. Die noukeurige ondersoek van die emosionele en sielkundige verskille tussen mans en vroue het my getref. Ek kon myself ondersoek en myself beter verstaan. Ek is ongetroud, maar ek dink hierdie artikels sal my help om ander mense se sienswyses beter te verstaan.

D. R., Italië

Julle sê dat onafhanklikheid iets kosbaars vir mans is. Maar ek ken heelparty vroue wat ook waarde aan onafhanklikheid heg. Dit ontstel my dat julle die gedagtes, gevoelens en begeertes van mans uitbeeld asof dit hemelsbreed van dié van vroue verskil.

U. B., Duitsland

Die artikel het erken dat “dit onmoontlik is om enige eienskap as uitsluitlik manlik of streng vroulik te klassifiseer” en het gesê “die raaiselagtige ‘tipies man’ of ‘tipies vrou’ bestaan dalk net in sielkundeboeke”. Die karaktertrekke van die paartjie “Jerry” en “Pam” is slegs gebruik om te illustreer hoe individuele mans en vroue op verskillende maniere kan kommunikeer.—RED.

Speelgoed in Afrika Die artikel “Tuisgemaakte speelgoed in Afrika” (22 Maart 1993) was soos ’n baie mooi aandenking van my kinderjare. In ons dorpies in Afrika was daar nie speelgoed vir al die kinders nie. Ons het dus ons tyd daaraan bestee om ons eie speelgoed te maak sodat dit soos dié van die ryker wit kinders kon wees. Maar hulle het nie veel van ons tuisgemaakte speelgoed gedink nie. In elk geval, die artikel het my groot vreugde verskaf.

A. A., Kameroen

Los probleme op Ek skryf om my waardering uit te spreek vir die talle goeie “Jongmense vra . . .”-artikels wat julle aan ons voorsien. Wanneer ek die jongste nommer van die Ontwaak! ontvang, blaai ek eerste na dié reeks. Ek het veral die artikel waardeer oor “Wie kan my help om my probleme op te los?” (8 Desember 1993). Ek is ’n senior hoërskoolleerling, en om besluite te neem wat my toekoms raak, is vir my iets ontsagliks, om dit maar saggies te stel. Ek en my ouers het nog altyd vryelik gekommunikeer; tog is daar tye wat ek steeds dink hulle verstaan my nie. Hierdie artikel het my gehelp om te besef hoe belangrik dit is dat ek hulle raad vra en met hulle oor my gevoelens en bekommernisse gesels.

H. L., Verenigde State