Van ons lesers
Surrogaatmoederskap In julle artikel “Surrogaatmoederskap—Is dit aanvaarbaar vir Christene?” (8 Maart 1993) sê Levitikus 18:20 volgens julle aanhaling: “Jy mag jou saaduitstorting nie aan die vrou van jou volksgenoot gee . . . nie.” Maar die King James Version sê bloot: “Jy mag nie met jou naaste se vrou vleeslike gemeenskap hê nie.” The New English Bible en New American Standard Bible sê iets soortgelyks. Julle verander die Skrif. Wat het die oorspronklike Woord van God gesê?
S. S., Verenigde State
Die meeste vertalings omskryf hierdie teks. Die “New World Translation” vertaal dit letterlik, soos “The NIV Interlinear Hebrew-English Old Testament” sowel as “The Interlinear Hebrew/Greek English Bible” dit ook doen. In laasgenoemde vertaling sê hierdie teks: “En jy sal nie jou saad van geslagsgemeenskap aan jou naaste se vrou gee nie.”—RED.
Trane Die artikel “Waarom al die trane?” (22 September 1992) het my diep ontroer. Ek wou al geruime tyd weet waarom ons huil en wat die rol van trane is. Danksy hierdie goeie artikel verstaan ek oplaas. Dit het my ontsaglik dankbaar gemaak teenoor Jehovah vir die manier waarop hy ons so wonderbaarlik geskep het.
F. G., Portugal
Tuisonderrigting Ek wil julle hartlik bedank vir die artikel “Tuisonderrigting—Is dit vir jou?” (8 April 1993). Ek onderrig tans twee van my vier kinders tuis. Ander mense het al baie keer vir my gesê dat ek my kinders te veel beskerm. Ek waardeer derhalwe julle neutrale standpunt oor hierdie saak terdeë.
B. W., Verenigde State
Lewensverhaal Die ondervinding van Marlene Pavlow, “Ek is gehelp toe ek tot God genader het” (22 Maart 1993), was seker die bemoedigendste artikel wat ek nog gelees het. Ek het van die opregte en openhartige manier gehou waarop sy haar lewe beskryf het. Aangesien ek al soortgelyke probleme gehad het, kon ek my met Marlene vereenselwig. Dankie dat julle sulke wonderlike artikels vir gewone mense soos ons skryf. Dit laat my voel dat daar hoop is as daar ander mense is wat dieselfde vreugdes en kwellinge as ons het.
R. H., Verenigde State
Ek het nog nooit ’n artikel gelees wat my só ontroer het nie. Dit beskryf my eie lewe woord vir woord. Dit was net wat ek nodig gehad het!
K. B., Nieu-Seeland
Vermaak Ek skryf om julle te prys vir die artikel “Wil jy graag jou vriende vermaak?” (22 April 1993). As ’n amateurmusikant het ek grootliks daarby baat gevind. My vriende nooi my dikwels uit om gesellighede lewendiger te maak deur te speel en te sing. Julle voorstelle om ’n repertoire op te bou en die gehoor by die aanbieding te betrek, was eenvoudig uitstekend!
P. S. S. M., Brasilië
Troeteldiere In die artikel “Wil jou kind ’n troeteldier hê?” (22 Januarie 1993) het julle gesê: “Huiskatte besmet jaarliks sowat 3300 verwagtende moeders met toksoplasmose, en dit lei tot ’n sterftesyfer van 15 persent by fetusse.” Volgens een betroubare bron is daar betreklik min gevalle van besmetting met hierdie siekte. Oordryf julle nie die gevare daarvan om ’n kat aan te hou nie?
K. T., Japan
Die stelling waarna jy verwys, is uit “U.S.News & World Report” aangehaal. Hoewel slegs ’n relatief klein getal swanger vroue deur katte besmet word, waarsku die “Wellness Letter”, wat deur die Universiteit van Kalifornië by Berkeley uitgegee word, swanger vroue nietemin teen “noue kontak met ’n kat”. Gelukkig word die siekte selde oorgedra deur bloot aan ’n kat te raak. Die “Wellness Letter” sê: “Die siekte word meestal oorgedra wanneer jy met katuitwerpsels in aanraking kom, soos wanneer die kat se sandbak skoongemaak word.”—RED.