Wagtoring – AANLYN BIBLIOTEEK
Wagtoring
AANLYN BIBLIOTEEK
Afrikaans
  • BYBEL
  • PUBLIKASIES
  • VERGADERINGE
  • g93 12/8 bl. 8-10
  • ’n Wêreld sonder siekte

Video nie beskikbaar nie.

Jammer, die video kon nie laai nie.

  • ’n Wêreld sonder siekte
  • Ontwaak!—1993
  • Onderhofies
  • Soortgelyke materiaal
  • Die oorsprong van siekte
  • Die ware oplossing
  • Hoe liggaamsgebreke tot ’n einde gaan kom
    Die Wagtoring kondig Jehovah se Koninkryk aan—2002
  • ’n Lewe sonder pyn is op hande!
    Ontwaak!—1994
  • Wat “die enigste ware God” belowe
    Ontwaak!—2005
  • Waarom is “geneesbare” siektes terug?
    Ontwaak!—1993
Sien nog
Ontwaak!—1993
g93 12/8 bl. 8-10

’n Wêreld sonder siekte

“Malaria is baie meer kompleks as wat enigiemand ooit gedink het”, sê die immunoloog dr. Dan Gordon. “Ons probeer steeds ’n antwoord daarop vind.”

“ONS weet steeds nie genoeg van die [tuberkulose bakterie] se metabolisme nie”, sê Barry Bloom van die Howard Hughes- Mediese Instituut. “Ons weet nie werklik hoe enige geneesmiddel werk nie. Ons weet net eenvoudig nie.”

“Kennis lei nie noodwendig tot ’n verandering in gedrag nie”, sê ’n woordvoerder vir die Sentrums vir Siektebeheer aangaande die mislukking van “veilige seks”-veldtogte om die verspreiding van sifilis te beperk. Soos daar uit hierdie stellings afgelei kan word, was die stryd teen malaria, tuberkulose en sifilis tot dusver baie frustrerend. Sal daar in die toekoms beter geneesmiddels teen hierdie siektes wees?

Miskien. Maar hoewel die mens sekere kwale kan oorwin en ander draagliker kan maak, is daar ’n basiese rede waarom hy nie die stryd teen siekte heeltemal kan wen nie.

Die oorsprong van siekte

Die stryd teen siekte is meer as bloot ’n stryd teen parasiete en kieme. Die Bybel verduidelik dat siektes die gevolg is van sonde wat ons van ons eerste mensevader geërf het (Romeine 5:12). Sonde het nie alleen die mens se verhouding met sy Skepper benadeel nie, maar het ook daartoe gelei dat hy verstandelik, emosioneel en liggaamlik agteruitgaan. Pleks van in volmaaktheid op ’n paradysaarde te woon, het mense dus onvolmaak geword en agteruitgegaan totdat die dood hulle oorval het.—Genesis 3:17-19.

Selfs met die beste medisyne kan die mens nie sy sondige toestand of die gevolge daarvan ongedaan maak nie. Weens hierdie dilemma is die menseras “aan ydelheid onderworpe [“so beperk”, Phillips]” (Romeine 8:20, NW). En dit is die geval met betrekking tot die oorwinning van siekte. Dit is dikwels so dat lewensreddende vooruitgang op die gebied van medisyne nie vir die lewensgevaarlike verbrokkeling van die gemeenskap vergoed nie.

“Ons bevind onsself in ’n verknorsing”, skryf Jerold M. Lowenstein in die tydskrif Discover. “Hoe meer welslae ons behaal in ons stryd teen siektes en om mense langer te laat lewe, hoe groter word die moontlikheid dat ons ons eie uitwissing bespoedig” vanweë oorbevolking en die agteruitgang van die omgewing.

Die ware oplossing

Die ware oplossing vir siekte lê nie by die mens nie, maar by die Skepper. Dit is waarom die psalmis gesê het: “Vertrou nie op prinse, op die mensekind, by wie geen heil is nie.” Die Bybel sê verder: “Welgeluksalig is hy . . . wie se hoop is op die HERE sy God, wat hemel en aarde gemaak het” (Psalm 146:3, 5, 6). Slegs God het die mag om siekte in wese uit te roei. En volgens die Bybel is hy van voorneme om dit te doen. Daardie tyd is nou op hande.

Jesus Christus het voorspel dat “pessiektes” een van baie bewyse sal wees dat ons in die voleinding van die huidige stelsel van dinge en net voor die koms van ’n nuwe wêreld leef. Hy het ook ’n toename voorspel in die einste toestande wat siektes vererger, soos oorlog, hongersnood en ongeregtigheid.—Lukas 21:11; Mattheüs 24:3, 7, 12; 2 Timotheüs 3:1-5, 13.

Toe hy op die aarde was, het Jesus siek mense wonderdadig genees, en sodoende het hierdie profesie in vervulling begin gaan: “Hy het ons lyding op hom geneem, ons siektes het hy gedra” (Jesaja 53:4, NAV; Mattheüs 8:17, NAV). Sodoende het hy op ’n klein skaal getoon wat God van voorneme is om binnekort op ’n wêreldwye skaal te doen. Die Bybel sê aangaande Jesus: “En ondertussen kom daar groot menigtes na Hom met kreupeles, blindes, stommes, gebreklikes en baie ander by hulle, en hulle het dié by die voete van Jesus neergesit, en Hy het hulle gesond gemaak, sodat die skare verbaas was om te sien dat stommes praat, gebreklikes gesond word, kreupeles loop en blindes sien.”—Mattheüs 15:30, 31.

Die mense wat daardie wonderwerke gesien het, het God verheerlik omdat hulle begryp het dat dit hy was wat Jesus die krag gegee het om daardie wonderwerke te verrig. Die krag waartoe Jesus toegang gehad het, was dieselfde krag wat gebruik is om ons ontsagwekkende heelal te skep. Dit was God se heilige gees, sy werkende krag.—Genesis 1:1, 2; Openbaring 4:11.

Die profeet Jesaja het van ’n tyd geskryf wanneer “geen inwoner sal sê: Ek is siek nie” (Jesaja 33:24). En Openbaring 21:4, 5 sê: “God sal al die trane van hulle oë afvee, en daar sal geen dood meer wees nie; ook droefheid en geween en moeite sal daar nie meer wees nie, want die eerste dinge het verbygegaan. En Hy wat op die troon sit, het gesê: Kyk, Ek maak alles nuut.”

Die Bybel toon dat ons in ’n oorgangstydperk leef (1 Johannes 2:15-17). Binnekort sal hierdie wêreld, met sy siekte, droefheid, misdaad, geweld en die dood, iets van die verlede wees. God sal hierdie wêreld en al sy ellendes uit die weg ruim om die weg te baan vir ’n nuwe wêreld hier op die aarde, ‘waarin geregtigheid sal woon’ (2 Petrus 3:11-13). Jesus het na hierdie komende nuwe wêreld as “die Paradys” verwys, aangesien dit soos die oorspronklike Paradys sal wees wat in die tuin van Eden was, maar op ’n wêreldwye skaal.—Lukas 23:43; Genesis 2:7, 8.

Christene hoop dus, nie op ’n bloot tydelike kuur nie, maar op ’n blywende bevryding van onvolmaaktheid, siekte en die dood. Hulle sien uit na die volkome vervulling van God se belofte: “Ek is [Jehovah] wat jou gesond maak.” “Ek sal siektes uit jou midde verwyder.”—Exodus 15:26; 23:25.

[Prente op bladsy 9]

God het Jesus die krag gegee om die dooies op te wek en die siekes te genees

    Afrikaanse publikasies (1975-2025)
    Meld af
    Meld aan
    • Afrikaans
    • Deel
    • Voorkeure
    • Copyright © 2025 Watch Tower Bible and Tract Society of Pennsylvania
    • Gebruiksvoorwaardes
    • Privaatheidsbeleid
    • Privaatheidsinstellings
    • JW.ORG
    • Meld aan
    Deel