’n Lewe sonder pyn is op hande!
DIE liggaam se ingewikkelde meganismes wat ons teen beserings beskerm, is beslis ’n wonderwerk. ’n Studie daarvan behoort ons te beweeg om die Skepper te loof, soos die Bybelpsalmis wat geskryf het: “Ek loof U, omdat ek so vreeslik wonderbaar is” (Psalm 139:14). Dit is ongetwyfeld net God wat ’n lewe sonder pyn moontlik kan maak! Maar hoe sal dit volbring word?
Let op dat die Bybel, net vóór die belofte van pyn en trane wat verwyder word, van “’n nuwe hemel en ’n nuwe aarde” praat, want “die eerste hemel en die eerste aarde het verdwyn” (Openbaring 21:1, 4, NAV). Die Bybel praat natuurlik nie van ons letterlike hemel en aarde wat sal verdwyn nie. Die Bybel sê eerder op bondige wyse dat ’n volkome nuwe stelsel van dinge hierdie teenswoordige een sal vervang. Ja, ’n nuwe, bomenslike regering sal dit moontlik maak om ’n pynlose lewe reg hier op aarde te geniet.
Waar die Bybel hierdie regering beskryf, sê dit dat ‘die God van die hemel ’n koninkryk [oftewel, regering] sal verwek wat al daardie koninkryke sal verbrysel en daar ’n einde aan sal maak, maar self sal dit vir ewig bestaan’ (Daniël 2:44). Toe Jesus Christus op aarde was, het hy ons geleer om vir hierdie Koninkryksregering te bid toe hy gesê het: “Só moet julle dan bid: Onse Vader wat in die hemele is, laat u Naam geheilig word; laat u koninkryk kom; laat u wil geskied, soos in die hemel net so ook op die aarde.”—Mattheüs 6:9, 10.
Maar hoe kan die vervulling van daardie gebed vir jou ’n lewe sonder pyn beteken?
’n Heerser met bomenslike krag
Die sleutel lê in die wysheid en krag van die een wat God gekies het om aan die hoof van Sy regering te staan. Daardie een is Jesus Christus self. ’n Bybelprofesie sê van hom: “Die regering sal op sy skouer wees . . . Aan die vermeerdering van sy regering en vrede sal daar geen einde wees nie.”—Jesaja 9:6, 7, King James Version.
Jesus, wat nou in die hemel is, se wysheid is baie groter as dié van al die aardse geneeshere. Hy verstaan die werking van ons fisiese liggaam ten volle, asook die liggaam se stelsels om homself teen beserings te beskerm. Toe hy meer as 1900 jaar gelede ’n mens op aarde was, was daar nie ’n siekte of kwaal wat hy nie kon genees nie. Hy het dus getoon wat hy op ’n groter skaal as Heerser van God se Koninkryk gaan doen. Die Bybel sê van een geval:
“Ondertussen kom daar groot menigtes na Hom met kreupeles, blindes, stommes, gebreklikes en baie ander by hulle, en hulle het dié by die voete van Jesus neergesit, en Hy het hulle gesond gemaak, sodat die skare verbaas was om te sien dat stommes praat, gebreklikes gesond word, kreupeles loop en blindes sien” (Mattheüs 15:30, 31). Een van die siektes wat Jesus tydens sy Koninkryksheerskappy sal genees, is daardie verskriklike chroniese pyn.
Waarlik, wat ’n wonderlike seën sal dit tog wees! En dit sal nie ten behoewe van net ’n paar volbring word nie. Die Skepper se belofte is: “Geen inwoner sal sê: Ek is siek nie” (Jesaja 33:24). Dan, onder die heerskappy van God se Koninkryk, sal die belofte vervul word dat ‘daar nie meer pyn sal wees nie’.—Openbaring 21:4, NAV.
Aangesien oorgeërfde sonde onder Christus se glorieryke Koninkryksheerskappy verwyder sal word, sal ons talle liggaamsmeganismes, ook dié wat ons teen beserings beskerm, volmaak funksioneer. Ons sal nooit weer deur ons liggaam se waarskuwingstelsel gepynig word nie. Gelukkig is ons, volgens Bybelprofesieë wat nou in vervulling gaan, reg op die drumpel van daardie nuwe wêreld waarin pyn nooit lyding sal veroorsaak nie.—Mattheüs 24:3-14, 36-39; 2 Timotheüs 3:1-5; 2 Petrus 3:11-13.
Jy kan die lewe onder God se Koninkryk geniet wanneer die soort pyn wat miljoene mense nou teister nie meer sal bestaan nie. Maar jy moet iets doen. Jesus Christus het na ’n basiese vereiste verwys toe hy in gebed tot God gesê het: “Dit is die ewige lewe, dat hulle U ken, die enige waaragtige God, en Jesus Christus wat U gestuur het.”—Johannes 17:3.
Jehovah se Getuies sal jou met graagte help om hierdie lewensbelangrike kennis op te doen. Vra net een van hulle in jou gebied of skryf aan die uitgewers van hierdie tydskrif en sê dat jy graag ’n Bybelstudie in jou huis of op enige ander plek wat vir jou gerieflik is, wil hê. Reëlings sal dan getref word sodat jy meer kan leer oor God se voorneme vir mense om ’n lewe sonder pyn te geniet.