Fisiese onaktiwiteit kan jou dood beteken
DIT is die boodskap wat van die Amerikaanse Hartvereniging sowel as van die Hart- en Beroertevereniging van Kanada af kom. Dekades lank al word die rookgewoonte, hoë bloeddruk en hoë bloedcholesterol as die enigste groot, beheerbare risikofaktore vir hartkwale beskou. Maar in 1992 het nog ’n faktor bygekom—fisiese onaktiwiteit. Dit is miskien die maklikste een om te beheer.
“Doen dit net en doen dit gereeld”, het dr. John Duncan van Dallas, Texas, gesê. Ongelukkig doen die meeste mense nie gereeld oefeninge nie. “Daar bestaan ’n wanindruk in Amerika dat meer Amerikaners vanweë die fiksheidsgril van die afgelope drie of vier jaar fisies aktief is”, het Tom McMillen, die medevoorsitter van die Voorsittersraad van Fisiese Fiksheid en Sport, gesê. “Dit is nie die geval nie. Ongeveer 250 000 sterftes per jaar word aan onaktiwiteit toegeskryf.”
“Slegs 22 persent Amerikaners voldoen vandag aan die aanbevole fiksheidstandaard vir goeie gesondheidsvoordele”, aldus dr. Walter R. Dowdle, waarnemende direkteur van die Amerikaanse Sentrums vir Siektebeheer. “’n Nasionale poging is nodig om die hoë vlak van fisiese onaktiwiteit wat in die Verenigde State bestaan te bekamp.”
Veeleisende oefening is nie nodig nie, want soos Kanada se Medical Post berig het: “Nuwe navorsing het bevestig dat selfs ’n stadige wandeling gesondheidsvoordele kan inhou.” Dr. Anthony Graham, hoof van kardiologie by die Wellesley-hospitaal in Toronto, Kanada, het verduidelik: “Hiermee bedoel ons matige fisiese oefening, die een of ander vorm van gereelde oefening wat so matig kan wees as om gereeld verskeie kere per week in jou tuin te werk of betreklik kort entjies te gaan stap. . . . Ons sien nou dat selfs hierdie mate van oefening ’n mens se persoonlike risiko sal verminder as dit gereeld gedoen word. Dit is ’n soort ‘iets vir almal’-benadering van oefening.”
Dr. Russell Pate van die Universiteit van Suid-Carolina het saamgestem en gesê: “Ek is daarvan oortuig dat miljoene der miljoene mense daar buite die mening huldig dat hulle oefening maar moet laat vaar as hulle nie by ’n gimnasium kan aansluit en vyf uur per week daar kan deurbring nie. Ek dink ons moet die idee amptelik bekragtig dat ’n aangename, matige wandeling om die blok ná ete ’n baie gewenste ding is om te doen.”
Kan jy gereeld gaan stap of die trappe klim pleks van ’n hysbak te gebruik, aangesien selfs matige fisiese oefening voordelig vir jou gesondheid is? Waarom parkeer jy nie ’n entjie weg van jou bestemming af nie, miskien die kruidenierswinkel, en loop die res van die pad? “Enigiets is beter as niks”, het dr. Robert E. Leach, die voorsitter van ortopedie aan die Universiteit van Boston se Mediese Sentrum, gesê.