Jong mense vra . . .

Hoe kan ek ophou om van iemand te hou?

“EK IS 20 en ’n gedoopte Getuie van Jehovah. Maar ek het met ’n 28-jarige [ongelowige] begin uitgaan. Ek was lief vir hom en het geglo dat hy my ook liefhet. My ouers het nie hiervan geweet nie, want ek het besef dat hulle dit nie sou goedkeur nie. Toe hulle dit wel uitvind, was hulle seergemaak en geskok. Hulle kon nie verstaan hoe ek ’n verhouding met ’n wêreldse man kon hê nie.”

Só skryf ’n jong Christenvrou wat ons Monique sal noem.a Hoe jammer tog dat talle jongmense hulle al in dergelike penaries bevind het—deurdat hulle verlief geraak het op ’n ongelowige, iemand wat nie dieselfde Christelike oortuiging en sedestandaarde as hulle het nie, of selfs met so iemand ’n liefdesverhouding aangeknoop het. Die vorige artikel in hierdie reeks (die Ontwaak! van 22 Mei 1994) het getoon dat so ’n verhouding nie net God mishaag nie, maar ook ’n ernstige gevaar vir ’n mens se geluk en welsyn inhou. Jong Ruth het tot dié besef gekom. “Ek het baie geheg geraak aan ’n ongelowige kêrel”, het sy erken. “Maar ek het besef dat ek die verhouding met die man moet verbreek as ek enigsins ’n verhouding met Jehovah wil hê.”

As jy ’n Christen is, kan jy waarskynlik die Bybel se woorde in Jakobus 4:4 aanhaal: “Weet julle nie dat die vriendskap van die wêreld vyandskap teen God is nie? Wie dan ’n vriend van die wêreld wil wees, word ’n vyand van God.” Maar as jy romantiese gevoelens vir ’n ongelowige koester, sal dit nie so maklik wees om hierdie woorde toe te pas nie. Trouens, die gedagte om die verhouding te beëindig, kan traumaties wees. Dit kan behoorlik voel of jou hart verskeur word. ‘Hoe kan ek ophou om van iemand te hou—of om hom lief te hê?’ kan jy vra.

Die apostel Paulus het eenkeer gesê: “Ek verlustig my in die wet van God na die innerlike mens; maar ek sien ’n ander wet in my lede wat stryd voer teen die wet van my gemoed en my gevange neem onder die wet van die sonde wat in my lede is. Ek, ellendige mens!” (Romeine 7:22-24). Jy kan net soos Paulus ’n stryd teen jou gevoelens hê. Nogtans het talle jong Christene hierdie stryd gewen en is hulle, as ’t ware, ‘uit die vuur geruk’. (Vergelyk Judas 23.) Hoe? Deur rampspoedige verhoudings te beëindig voordat dit onherstelbare skade aanrig.

Soek hulp

Mark het byvoorbeeld, toe hy slegs 14 was, “dolverlief” geraak op ’n ongelowige meisie. Hy het nie hulp gesoek nie, maar eerder sy gevoelens geheim probeer hou. Sy gevoelens vir die meisie het net al hoe sterker geword. Kort voor lank het hy haar in die geheim gebel. Toe sy hom begin terugbel het, was dit net ’n kwessie van tyd voordat sy ouers agtergekom het wat aan die gang was.

Moenie dieselfde fout begaan en die probleem op jou eie probeer oplos nie. Spreuke 28:26 sê: “Wie op sy eie hart vertrou, hy is ’n dwaas; maar hy wat in wysheid wandel, word gered.” Sou jy in die eerste plek rêrig in hierdie situasie beland het as daar niks met jou oordeelsvermoë geskort het nie? Soms word ons rede deur ons emosies oorheers en het ons die hulp nodig van iemand wat helderder en objektiewer kan dink. Jou ouers is waarskynlik in die beste posisie om jou te help, veral as hulle godvresende mense is. Hulle ken jou tog sekerlik beter as enigiemand anders. Hulle was ook eenmaal jonk en kan gehelp word om te begryp wat jy deurmaak. In Spreuke 23:26 pleit die Bybelskrywer Salomo: “My seun, gee my jou hart, en laat jou oë ’n welgevalle hê in my weë.” Waarom gee jy nie jou ouers jóú hart en laat hulle weet dat jy hulp nodig het nie?

Dit is presies wat jong Jim gedoen het. Hy was smoorverlief op ’n meisie by die skool. Hy sê: “Ek het eindelik by my ouers om hulp gaan aanklop. Dit het grootliks daartoe bygedra dat ek hierdie gevoelens te bowe kon kom. Hulle het my baie gehelp.” Noudat hy sy ouers se liefdevolle ondersteuning ervaar het, gee Jim hierdie raad: “Ek dink nie ander jong Christene moet aarsel om met hulle ouers te praat nie. Vertel hulle van jou probleem. Hulle sal verstaan.”

In ’n soortgelyke situasie het ’n jong man, Andrew, hom tot nog ’n ander bron om hulp gewend. Oor ’n plaaslike kringbyeenkoms van Jehovah se Getuies wat hy bygewoon het, sê hy: “Een van die toesprake het my diep getref. Die kringopsiener het streng gewaarsku teen die aanknoop van verhoudings met lede van die ander geslag wat nie Christene is nie. Ek het besef dat ek my denke onmiddellik moet regstel.” Wat het hy dus gedoen? Hy het eerstens met sy ma, ’n enkelouer, gepraat en baat gevind by die raad wat sy hom gegee het. Daarna het hy ook ’n ouere man in die plaaslike gemeente van Jehovah se Getuies genader wat verdere hulp aan hom kon verleen. Gemeentelike ouere manne kan in tye van nood “soos ’n toevlug teen die wind en ’n skuiling teen die stortreën” wees (Jesaja 32:2). Nader gerus een van hulle en vertel hom wat jou kwel.

Beëindig die verhouding vir eens en vir altyd

Toe Mark se ouers agterkom dat hy ’n skelm verhouding het, het hulle onmiddellik opgetree. “Hulle het my prontuit aangesê om ’n einde aan hierdie verhouding te maak”, sê Mark. “Ek was aanvanklik opstandig. Ons het ’n harde woordewisseling gehad, en ek het my in my kamer toegesluit. Maar die werklikheid het gou tot my deurgedring, en ek het besef dat ek en die meisie nie dieselfde doelwitte het nie. Dit sou nie werk nie.” Ja, as ’n mens oor die werklikhede van die situasie nadink, kan dit help om jou emosies te beheers. Vra jou af: ‘Het hierdie persoon dieselfde doelwitte, geloofsoortuiging en sedestandaarde as ek? Indien ons sou trou, sal hy of sy my ondersteun in my strewes om God te aanbid? Is hy of sy net so ywerig vir geestelike dinge soos ek? Watter eenheid kan daar werklik in so ’n verhouding wees?’—Vergelyk 2 Korinthiërs 6:14-18.

Om die verhouding vir eens en vir altyd te beëindig, sal egter nie maklik wees nie. Monique, na wie ons in die begin verwys het, erken: “Ek het by twee geleenthede die verhouding probeer beëindig, maar nie daarin geslaag nie. Ek wou nie heeltemal van hom afsien nie. Ek het vir hom probeer getuig en gehoop dat hy Jehovah sou aanneem. Hy het selfs na ’n Sondagvergadering toe gekom. Maar hy het nie werklik in Jehovah belanggestel nie. Ek het besef dat dit die regte ding was om heeltemal van hom af te sien.”

Dit laat ons dink aan Jesus se woorde in Mattheüs 5:30. Daar het hy gepraat oor dinge wat ’n mens kan verhinder om in God se Koninkryk in te gaan—dinge wat so kosbaar soos ’n regterhand kan wees. Jesus se raad was nietemin: “Kap dit af en gooi dit weg van jou af; want dit is vir jou beter dat een van jou lede vergaan en nie jou hele liggaam in [“Gehenna”, NW, ’n simbool van ewige vernieting] gewerp word nie.” In ooreenstemming met hierdie beginsel moet jy die persoon met wie jy ’n verhouding het moedig nader en “die waarheid spreek” (Efesiërs 4:25). Doen dit in ’n openbare plek—nie waar julle op julle eie is of julle in ’n romantiese situasie bevind nie—en laat die persoon baie duidelik verstaan dat jy die verhouding beëindig. Jong Sheila vertel: “Wat my gehelp het, was om beslis op te tree. Ek sou nie meer saam met hom gaan eet nie. Ons sou mekaar nie meer gedurende studieperiodes sien nie. Ek het my standpunt ondubbelsinnig aan hom verduidelik.” ’n Christenmeisie, Pam, was net so reguit: “Ek het vir hom op die ou end gesê om my uit te los, en ek het hom eenvoudig geïgnoreer.”

Om oor die hartseer te kom

Ná die verbreking van so ’n verhouding sal jy miskien voel soos die psalmis wat gesê het: “Ek is krom, heeltemal geboë; die hele dag gaan ek in die rou” (Psalm 38:7). Dit is net natuurlik dat jy ’n ruk lank sal treur. Die Bybel gee toe dat daar ‘’n tyd is om te ween’ (Prediker 3:4). Maar jy hoef nie vir altyd te treur nie. Die hartseer sal mettertyd afneem. “Ja”, erken Mark, “ek het ’n tyd lank getreur. My ouers het dit agtergekom en gesorg dat ek meer tyd in die geselskap van ander jong Christene deurbring. Dit het my baie gehelp.” Andrew, wat net so terneergedruk was nadat hy sy verhouding beëindig het, sê: “Die ouere manne het my bygestaan. Ek het ook meer aan die predikingswerk begin deelneem en het baie geheg geraak aan party van die Christenbroers met wie ek goed oor die weg gekom het.” Ja, hou jou besig met geestelike werke (1 Korinthiërs 15:58). Fisiese werk of oefening kan ook help. Moenie jou afsonder nie (Spreuke 18:1). Bedink blymoedige en opbouende dinge.—Filippense 4:8.

Onthou ook dat jy Jehovah behaag deur die moedige standpunt wat jy inneem. Jy kan hom gerus in gebed nader en hom vra om jou te help en te onderskraag (Psalm 55:23; 65:3). “Ek het baie gebid”, sê jong Sheila. Nee, dit is nie maklik om ’n skadelike verhouding te beëindig nie. Sheila erken: “Al is die verhouding iets van die verlede dink ek soms nog aan hom en wonder wat hy doen. Maar jy bly by jou besluit omdat jy weet dit dra Jehovah se goedkeuring weg.”

[Voetnoot]

[Prent op bladsy 18]

Laat die persoon baie duidelik verstaan dat jy die verhouding beëindig