’n Gesellige manier om te onthaal

NAGEREG? . . . NAGEREG! . . . Het jy al ’n ete vir gaste beplan en dan gewonder: ‘Wat gaan ek vir nagereg bedien?’ Miskien het hierdie algemene dilemma daartoe gelei dat jy jou resepte en al jou kookboeke gefynkam het op soek na die ideale nagereg vir jou geselligheid.

Waarom probeer jy nie ’n fondue nie? Dit is nie net iets wat mense gesellig laat verkeer nie, maar dit kan ook gou en maklik voorberei word. Wat is ’n fondue? Dit is eenvoudig ’n mengsel van sekere bestanddele wat in ’n pot gesmelt word. Ander kossoorte, wat ons “doophappies” sal noem, word dan in hierdie mengsel gedoop en geëet. Die woord fondue kom van die Franse woord fondre, wat “om te smelt” beteken. In die geval van ’n sjokoladefondue is die mengsel byvoorbeeld hoofsaaklik

gesmelte sjokolade, en die doophappies bestaan uit gebak en vars vrugte.

Sjokoladefondue as nagereg

Links is ’n sjokoladefondueresep. As jy dit nog nooit probeer het nie, wag daar ’n aangename verrassing op jou!

Smelt die sjokolade in ’n kastrol. Voeg die oorblywende bestanddeel/bestanddele by. Roer die mengsel tot dit dik word. Gooi die mengsel in ’n fonduepot en hou dit warm oor lae hitte.

Voordat jy die fondue opdien, kan jy 10 ml kitskoffie of 1ml kaneel daarin roer. Sprinkel die vrugtedoophappies met suurlemoensap wat met water gemeng is om te keer dat dit bruin word. As die sjokolademengsel te dun is, kan nog sjokolade bygevoeg word. As dit te dik is, kan dit met melk verdun word.

Indien jy ’n elektriese fonduepot gebruik of ’n fonduepot wat op ’n stoofplaat geplaas kan word, kan jy die fondue in dieselfde pot voorberei en bedien. Plaas die fonduepot in die middel van die tafel waar almal dit maklik kan bykom. Een pot is genoeg vir ses tot agt mense.

As daar van die sous oorbly, kan dit met welslae in die yskas gehou en as ’n heerlike sous oor roomys gebruik word.

Switserse kaasfondue

Wil jy graag ’n kaasfondue probeer? Regs is ’n resep vir ’n voorgereg of ’n hoofgereg.

Vryf die binnekant van ’n kastrol uit met die gesnyde kant van ’n knoffelhuisie en gooi die knoffel dan weg. Gooi die wyn en suurlemoensap in die kastrol en verhit dit oor matige hitte. Borreltjies sal verskyn en die oppervlak bedek. Moenie dat die wyn kook nie.

Meng die meelblom of meel in ’n bak met die gerasperde kaas en roer.

Voeg ’n handvol kaas by, terwyl jy die wynmengsel deurentyd roer. Nadat die kaas gesmelt het, voeg nog ’n handvol kaas by en roer tot gesmelt. Hou so aan totdat al die kaas gesmelt is. Jy kan die mengsel ook met wit peper en neut of paprika en naeltjies geur.

Gooi die mengsel in die fonduepot en plaas dit oor lae tot matige hitte. Elkeen het sy eie langsteelfonduevurk, bord en eetvurk. Steek eenvoudig een van die doophappies met die fonduevurk en roer dit deur die fondue in ’n sirkelbeweging of in die vorm van die syfer agt. Plaas die doophappie op jou bord en eet dit met jou eetvurk.

As die fondue te dun is, kan jy nog kaas byvoeg. As dit te dik word, gooi ’n bietjie verhitte wyn by en roer. As die mengsel skei, verhit dit oor hoë hitte, klits en verlaag dan die hitte. As jy die mengsel elke keer met jou doophappie roer, behoort dit nie te skei nie.

As jy ’n nie-alkoholiese fondue verkies, kan jy ’n gewone kaassousresep volg. Meng 60 ml botter en 60 ml meel. Laat die mengsel oor lae hitte prut. Voeg 500 ml koue melk by, laat dit stadig tot kookpunt kom en laat die mengsel twee minute kook. Voeg 375 ml skerp gegeurde kaas (gerasper) geleidelik by en roer tot gesmelt. Geur met sout en peper. Doop net soos hierbo verduidelik.

’n Soet einde

Wanneer die nageregdilemma jou die volgende keer in die gesig staar, besluit jy miskien om sjokoladefondue te probeer. Of miskien wil jy bieffondue as hoofmaal bedien.

Hierdie smeltpot van heerlike geure sal ongetwyfeld lank ’n gunsteling by jou en jou vriende wees. Die bekoring daarvan spruit voort uit die gemeenskaplike pot. Elkeen dra tot die maaltyd by, wat ’n hartlike atmosfeer van vriendskap skep wat die hoofbestanddeel is van hierdie gesellige manier om te onthaal!—Bygedra.

[Venster op bladsy 22]

Resep vir sjokoladefondue

170 g onversoete sjokolade

375 ml suiker

250 ml dun room

125 ml margarien of botter

’n knippie sout

of andersins:

340 g halfsoet-sjokoladestukkies of soet kooksjokolade

60 ml room

60 ml volroommelk

Gebakte doophappies:

Vrugteslaaikoek, sponsbeskuitjies, oliebolle en pondkoek in blokkies gesny

Vrugtedoophappies, enige of almal:

Appels, piesangs, kersies, dadels, druiwe, lemoene, spanspek, papaja, perskes, pere, pynappelstukke, aarbeie

[Venster op bladsy 23]

Resep vir Switserse kaasfondue

1 knoffelhuisie, in die helfte gesny

375 ml droë wit wyn

15 ml suurlemoensap

25-30 ml mielieblom of meelblom

435 g gerasperde Switserse kaas (of ’n mengsel van Switserse en Gruyère-kaas)

30-45 ml kersiebrandewyn (opsioneel)

Witpeper en neut of paprika en naeltjies, indien verkies

Doophappies:

2 bros Franse brode (of Italiaanse brood of bros broodrolletjies) in blokkies van 3 cm gesny, elk met ’n korsie

Gekookte hoender, ham, garnale

Rou of gekookte groente

[Venster op bladsy 24]

Doopsouse:

Peperwortelsous

45 ml voorbereide peperwortel

250 ml suiwelsuurroom

5 ml suurlemoensap

’n knippie paprika

Meng bestanddele

Mayonnaise en Kerriesous

125 ml mayonnaise

125 ml suiwelsuurroom

5 ml suurlemoensap

5 ml kerriepoeier

Meng bestanddele

Voeg sout en peper na smaak by

Mosterdsous

15 ml voorbereide mosterd

30 ml gekapte ui

250 ml suiwelsuurroom

Meng bestanddele

Voeg sout en peper na smaak by

Resep vir bieffondue

1 kg maer bief, bieffilet of beenlose lendestuk

plantolie

Let wel: Die fonduepot moet van gietyster, koper of staal gemaak wees. Dit is nie veilig om keramiekpotte vir ’n oliefondue te gebruik nie. Die olie is te warm en die pot sal breek

[Prent op bladsy 23]

Sjokoladefondue

[Prent op bladsy 24]

Switserse kaasfondue