Van ons lesers

Egskeiding Ek was diep ontroer toe ek “Die Bybelse beskouing . . . Watter soort egskeiding haat God?” (8 Februarie 1994) gelees het. Ek het onlangs van ’n ontroue huweliksmaat geskei nadat ons 20 jaar getroud was, maar nou besef ek dat Jehovah nie my besluit om te skei, haat nie en dat ek nie skuldig hoef te voel nie. Dit is waar dat terneergedruktheid, eensaamheid en skuldgevoelens ‘onverwags kan opduik’. Maar die tyd en vertroue op Jehovah bring genesing.

B. M., Verenigde State

Terwyl ons getroud was, was my man baie daarteen gekant dat ek een van Jehovah se Getuies is. Hy het uiteindelik by sy vriendin ingetrek en ’n egskeiding aangevra. Ek het werklik gevoel dat God ‘my tot vrede geroep het’ (1 Korinthiërs 7:15). Die egskeiding was vir my kinders verpletterend, en deur die jare heen het ek Maleagi 2:16 baie keer gelees en gewonder of ek reg gehandel het. Julle artikel het my gehelp om ’n gebalanseerde beskouing van hierdie teks te verkry.

J. C., Verenigde State

Verhuising Ek kan julle nie sê hoe dankbaar ek was om julle artikels oor verhuising in die rubriek “Jongmense vra . . .” te ontvang nie (22 Februarie 1994 en 8 Maart 1994). Ek is 16 jaar oud en staan op die punt om ver weg van al my boesemvriende te trek. Ek het elke aand gehuil en gewens dat daar ’n manier was om te bly. Toe het ek julle artikels gelees. Ek het besluit om meer na die positiewe sy van verhuising te begin kyk. Hoewel ek nog hartseer is om te trek, het my gesindheid baie verbeter.

A. D., Verenigde State

Dié artikels was net wat ek nodig gehad het. Die beste raad wat gegee is, is om in dieselfde roetine voort te gaan wat geestelike sake betref. Ek moes tot die besef kom dat Jehovah altyd daar sal wees, ongeag waarheen ek verhuis. Waarom hom dan nie deur diep persoonlike studie intiem leer ken nie? Dít het my baie gehelp om gelukkiger in my nuwe tuiste te wees.

T. T., Verenigde State

Ongeletterdheid Ek wou al dikwels skryf en julle bedank nadat ek ’n interessante artikel gelees het. Maar die artikels oor “Ongeletterdheid kan oorkom word” (22 Februarie 1994) het my uiteindelik daarvan oortuig dat ek dit moet doen. Ek gaan volgende week ’n Bybelstudie begin met ’n dame wat nie kan lees of skryf nie. Ek het nie geweet hoe ek dit gaan doen nie, maar nou weet ek, danksy hierdie artikels. Hulle het op die regte tyd gekom!

M. A. C., Italië

Stede Ek is 17 jaar oud en het die eerste 14 jaar van my lewe in New York-stad gewoon. Ek het dus julle artikels oor groot stede werklik geniet (8 Januarie 1994). Ek het gehou van die interessante vasvragedeeltes daarin.

S. H., Verenigde State

Kassawe Die artikel “Kom ons eet kassawe!” (8 November 1993) was baie interessant. As ’n Nigeriër is ek een van die miljoene mense in Afrika wat kassawe baie geniet, veral foofoo en gari. Trouens, ek kan ons Skepper dank dat hy ons van kassawe voorsien het. Daarsonder sou miljoene mense in Afrika omkom.

O. N. Y. I., Nigerië

Moedige sendeling Ek was werklik ontroer deur die verhaal van Annama Abraham in “Ek het die uitdagings van die lewe in Suid-Asië die hoof gebied” (22 Januarie 1994). Sy het haar geliefde man aan die dood afgestaan, maar hou aan om Jehovah met onkreukbaarheid te dien. Ek wil graag vir haar sê hoeveel haar lewensverhaal my aangemoedig het.

I. I. C. S., Brasilië