Van ons lesers

Getroue jongmense Ek is ontroer deur die artikels “Jongmense wat God eerste gestel het” (22 Mei 1994). Toe ek ’n tiener was, het ek ’n breingewas gehad. As een van Jehovah se Getuies het ek vir die dokters gesê: “Ek wil nie ’n bloedoortapping hê nie.” Hoewel ’n hofbevel verkry is om bloed op my af te dwing, het die operasie goed verloop daarsonder. Terwyl ek van hierdie getroue jong knegte van God gelees het, het ek trane in my oë gehad. Hulle het dieselfde ondervinding as ek deurgemaak! Hulle ondervindinge het my hart geraak en my liefde vir God versterk.

M. P., Verenigde State

Ek is 17 jaar oud en was bang dat ek my eendag in so ’n situasie sal bevind. Ek vrees nie die dood nie, maar wel om Jehovah se wette te verontagsaam. Dit sou verskriklik wees om onder druk in te gee. Die artikel het my baie versterk.

C. K., Duitsland

Toe ek die artikels gelees het, kon ek nie my trane keer nie. Ek het agterna die brosjure Hoe kan bloed jou lewe red? (wat deur die Wagtoringgenootskap uitgegee word) noukeurig gelees. Ek weet nou hoe om op te tree indien ek ooit in ’n soortgelyke situasie sou beland.

Y. G., Duitsland

Aangesien ek aan ’n ongeneeslike vorm van leukemie ly, was die ondervindinge van jongmense wat hulle toegewydheid aan Jehovah bewys het vir my as ’n volwassene taamlik aanmoedigend. Baie dankie.

H. K., Oostenryk

Ek is 18 jaar oud. Ek was verheug en ontroer toe ek gister die artikels gelees het. Toe ek besef dat hierdie getroue kinders gesterf het, kon ek nie ophou huil nie. Hulle geloof het my laat wonder of ek my onkreukbaarheid onder sulke omstandighede sou kon handhaaf.

E. A. O., Nigerië

Ek is werklik getref deur die onbuigbare standvastigheid van al die jongmense wat genoem is. Ná ek die artikels gelees het, het ek baie gehuil en Jehovah gedank dat hy hulle die krag gegee het om sulke beproewinge tot hulle dood te verduur. Ek kan werklik sê dat my tienerprobleme niks in vergelyking daarmee is nie.

R. C., Italië

Hierdie roerende artikels sal alle jongmense wat hulle lees ongetwyfeld bemoedig. Hierdie jongmense was almal onwrikbaar in hulle weiering van bloed; terselfdertyd kon hulle vir hulleself dink en hulle standpunt duidelik stel. Dit was aanmoedigend om te sien dat Jehovah ons die krag en die nodige hulp sal gee, ongeag die druk en toetse waarvoor ons te staan kom.

R. T., Japan

Ongeletterdheid Ek het die artikels “Ongeletterdheid kan oorkom word” (22 Februarie 1994) waardeer. Toe ek in die vyftigerjare van China na Suid-Afrika gevlug het, kon ek nie enige van die plaaslike tale praat nie. Jehovah se Getuies het my egter geduldig gehelp om die Bybel in Engels te verstaan. Ek het ook hulle vergaderinge bygewoon, onder andere die Teokratiese Bedieningskool. My Engels het geleidelik verbeter, en ek neem nou met vrymoedigheid aan die huis-tot-huis-bediening deel.

W. W., Suid-Afrika

Reïnkarnasie Hoewel ek ’n Moslem is, is ek ’n gereelde leser van die Ontwaak! Ek wil graag my opregte dank uitspreek vir julle onlangse artikels “Het jy voorheen gelewe? Sal jy weer lewe?” (8 Junie 1994). Ek het dit baie leersaam gevind. Ek soek al lank na inligting wat gebruik kan word om party van my vriende reg te help wat daarop aandring dat daar so iets soos reïnkarnasie bestaan. Met hierdie inligting dink ek dat hulle sekerlik sal saamstem dat daar nie reïnkarnasie kan wees nie, aangesien daar ’n opstanding is.

K. S., Nigerië