Ons beskou die wêreld
Spoorweg moet besluit terugtrek
Toe ’n groot spoorwegmaatskappy in Brasilië ’n nuwe program ingestel het om hulle wagte op te lei om vuurwapens te gebruik, het twee van hulle werkers voor ’n gewetensprobleem te staan gekom. As Jehovah se Getuies wat volgens die Bybelse voorskrif lewe om ‘nie meer te leer om oorlog te voer nie’, het hulle sterk daaroor gevoel dat dit verkeerd sou wees om in die gebruik van dodelike wapens opgelei te word (Jesaja 2:4). Hulle is summier afgedank vir hulle “weerspannigheid”. Die spoorwegmaatskappy het selfs hulle versoek geweier om hulle vorige posisies te behou en net die opleidingsprogram en die gepaardgaande bevordering te verbeur. Die Grondwet van Brasilië sê egter: “Vryheid van gewete en aanbidding is onaantasbaar, en die vrye beoefening van godsdiens word deur die wet gewaarborg.” Die streek se Arbeidshof het die spoorwegmaatskappy daaraan skuldig bevind dat hulle die mans sonder “wettige rede” afgedank het en het die maatskappy verplig om die mans die vergoeding te betaal wat hulle toekom.
Chagas-siekte en die bloedhandel
Chagas-siekte, wat deur ’n parasiet veroorsaak word en ná ’n jare lange latente periode tot hartversaking lei, besmet vandag ongeveer 18 miljoen mense in Latyns-Amerika. Dit word dikwels oorgedra deur oortappings van bloed wat nie goed getoets is nie. Die Bolivian Times het onlangs verduidelik: “Een van die redes waarom die bloed waarskynlik nie altyd getoets word nie, is die kommersialisering daarvan wat wêreldwyd plaasvind. Die toetsing en ontleding van bloed vir enige kwaal verminder die wins wat gemaak word.” Op 24 Desember 1993 het El Diario van La Paz gesê: “Vyftig persent van die bloedoortappings wat in die land gedoen word, is met die volgende siektes besmet: Chagas-siekte, malaria, hepatitis, sifilis en vigs, het die Boliviaanse Rooi Kruis gewaarsku.”
Gevare vir babas
In Japan was daar die afgelope tyd ’n opvallende toename in die aantal babas in die “kruipstadium” wat gifstowwe inneem, berig die Departement van Gesondheid en Welsyn. Sigarette was betrokke by ongeveer die helfte van alle giftige stowwe wat in 1992 deur babas ingeneem is. Sommige het mengsels van sigaretstompies en -as gedrink wat in koeldrankblikkies of asbakkies met vloeistof daarin gelos is. Ander gevaarlike stowwe wat deur babas ingeneem word, is in volgorde van voorkoms medisyne, speelgoed, muntstukke, voedselprodukte en skoonheidsmiddels. Etlike gevalle het ernstige siekte tot gevolg gehad. Die Departement waarsku dat ’n verbasende groot persentasie van hierdie ongelukke tussen 5:00 nm. en 9:00 nm. plaasvind wanneer meer gesinslede tuis is en na die kinders kan kyk.
Doop word ’n twispunt
Colorado Springs, VSA, wat een van die Christendom se vernaamste evangelisasiesentrums geword het, was onlangs in ’n geskil gewikkel oor metodes om kinders te bekeer. Volgens The Denver Post gebruik die Cornerstone-Baptistekerk ’n vloot van 16 busse om die omgewing te fynkam, op soek na kinders. Beloftes van lekkers, koeldrank en ’n karnaval maak die kinders gretig om op die bus te klim. Baie ouers laat hulle kinders gaan, maar word onaangenaam verras wanneer die kinders huis toe kom en hulle vertel dat hulle gedoop is. Hierdie “evangeliste” laat ouers gewoonlik eers ’n toestemmingsvorm teken voordat hulle die kinders doop, maar hierdie beleid is van tyd tot tyd verslap. Volgens die Post sê die predikant van die kerk oor die toestemmingsvorm: “Dit mors ons tyd.”
Buitensporige toegewydheid aan sokker
Sommige sokkerentoesiaste toon hulle toegewydheid aan sokker op ’n ongewone manier: Hulle versoek dat hulle as ná hulle dood op hulle gunstelingspan se speelveld gestrooi word. Een gewilde span ontvang elke jaar tot 25 van hierdie versoeke. Hierdie gebruik het so algemeen geword dat die Engelse Voetbalvereniging ’n waarskuwing aan sokkerklubs moes stuur oor presies hoe sulke menslike oorblyfsels uitgestrooi moet word. Volgens The Medical Post sluit hulle raad die volgende in: “Dit is nie nodig om al die as uit te strooi nie. Julle kan net ’n bietjie uitstrooi. ’n Groot hoop kan die gras laat doodgaan. . . . Vee die as met ’n besem rond om ’n ligte en egalige verspreiding te verseker.”
’n Oplewing in Taoïsme
“Die grootste in die geskiedenis.” So het die tydskrif China Today die viering van die Luotiese Groot Gebedseremonie, ’n Taoïstiese godsdiensviering, beskryf wat in September 1993 gehou is. Die seremonie is by die Wit Wolk-tempel in Beijing gehou en deelnemers het van Taoiste-tempels in Australië, Kanada, Hongkong, Taiwan en die Verenigde State gekom. “Die vernaamste oogmerk” van die seremonie was, volgens die tydskrif, “om die hemel te versoek om aan alle mense regoor die wêreld geluk te skenk”. Elf altare is opgestel, tekste is gesing-praat en gebede is aan honderde gode opgedra—onder andere aan die “reddergod” wat veronderstel is om mense van die ellende van hulle lot in die lewe te red. ’n Ab van die tempel in Hongkong het die groep vertel dat Taoïsme bo wêreldsheid verhewe is en dus niks met die politiek te doen het nie. Die hoof van ’n Taoïste-tempel in Taiwan het joernaliste vertel dat Taoïsme patriotisme en broederskap voorstaan.
Die koste om ’n ramp te verhoed
Hoeveel sal dit kos om die rampspoedige veranderinge in wêreldwye weerpatrone, wat deur baie wetenskaplikes gevrees word, te verhoed? Klaus-Peter Möller, hoof van die Eduard Pestel Instituut vir Stelselnavorsing in Hannover, Duitsland, het bereken dat dit met huidige tegnologie gedoen kan word. Volgens die Duitse koerant Süddeutsche Zeitung sou mnr. Möller se plan vereis dat die verbruik van fossielbrandstowwe soos steenkool, olie en gas met 75 persent verminder word en dat dit vervang word met alternatiewe brandstowwe wat nie koolstofdioksied vrystel nie. Wat van die koste? Volgens mnr. Möller se berekeninge sou die totale koste R81,7 biljoen beloop, of ongeveer R14 500 vir elke man, vrou en kind wat vandag leef. Die koerant se gevolgtrekking is dat die taak “van die mensdom in sy geheel ’n prestasie van ongelooflike omvang sal verg”.
Wie het hom eerste gesien?
Pous Johannes Paulus II het hom onlangs ten gunste van ’n tradisie uitgespreek wat veronderstel dat “Jesus ná die opstanding eerste aan die Madonna verskyn het, voordat hy aan enigiemand anders verskyn het, en voordat die engel dit aan die vroue aangekondig het”, sê die Corriere della Sera. Hierdie siening, wat glad nie deur die Evangelieverslae ondersteun word nie, het heelwat verwarring by sommige laat ontstaan. Die Italiaanse Katolieke skrywer Sergio Quinzio het oor die pous se menings en Maria se rol in die Katolieke tradisie gesê dat die “gewilde verering” van Maria nog altyd geneig was om Katolieke “verder as die dinge wat die Heilige Skrif aan ons oorgedra het” te lei. Hierdie onlangse “dogmatiese verklaring”, voeg hy by, “sê meer as wat in die tekste geskrywe staan”.
“Paddarokery” vervang “paddalekkery”
Dit is blykbaar al lank onder sommige dwelmgebruikers bekend dat party paddas ’n hallusinogeniese chemikalie, wat bufotenien genoem word, deur hulle vel afskei. Maar die chemikalie is ook giftig—so giftig dat dit honde wat die paddas vang en eet soms doodmaak. The Wall Street Journal sê gevolglik dat sommige dwelmgebruikers van “paddalekkery” afgeskrik is en eerder tot “paddarokery” oorgegaan het. Hulle droog die giftige paddaslym en rook dit met die gedagte dat die hitte van die gifstowwe ontslae sal raak. Hoe dit ook al sy, paddamisbruik is nou onwettig. Bufotenien is op die lys van gevaarlike en onwettige dwelms in die Verenigde State. Minstens een handelaar is al gearresteer. Die Journal sê dat daar op sy paddas beslag gelê is.
Kanker neem toe onder Franse vroue
In Frankryk rook daar nou meer vroue as ooit tevore. Onder tienerrokers is daar nou meer meisies as seuns, en die aantal vroue wat strawwe rokers is (meer as 20 sigarette per dag), het sedert 1977 meer as verdubbel. Dit is nie verbasend dat die aantal vroue wat rookverwante kanker opdoen ook nou begin toeneem nie. Die koerant Le Figaro van Parys sê dat daar elke jaar in Frankryk 20-000 nuwe gevalle van longkanker voorkom en wêreldwyd meer as 800-000. Sterftes as gevolg van brongiale kanker by vroue het in die Verenigde State en Kanada verdriedubbel en in Brittanje, Japan en Swede meer as verdubbel. By ’n onlangse vergadering in Parys oor respiratoriese kanker het dokters beklemtoon dat verreweg “die doeltreffendste wapen teen rookverwante kanker is om op te hou rook”.
Kerk gaan agteruit in Nederland
As huidige neigings voortduur, sal drie kwart van Nederlanders teen die jaar 2020 aan geen kerk behoort nie, sê die Staatscourant, die amptelike koerant van die Nederlandse regering. In ’n onlangse studie met die titel “Sekularisasie in Nederland 1966-1991” is vier hoofgroepe onder die Nederlanders gevind: 28 persent is nie godsdienstig grootgemaak nie; 33 persent is godsdienstig grootgemaak, maar het sedertdien die kerk verlaat; 28 persent is godsdienstig grootgemaak, maar woon selde of nooit kerkdienste by en net 11 persent woon die kerk gereeld by. Die Staatscourant sê dat die neiging om van die kerk af weg te dryf veral onder Rooms-Katolieke opmerklik is, en sê: “Dit lyk asof die opvattings van Rooms-Katolieke van dié van hulle geestelike leiers verskil. ’n Mens kry die indruk dat kerklidmate hulle gesag ignoreer.”