Ons beskou die wêreld
Lag is goed vir jou
“Wetenskaplikes het uitgewerk dat slegs ’n halfminuut van vreugdevolle gelag gelykstaande is aan 45 minute van algehele rus”, berig die Poolse weekblad Przyjaciółka. “’n Spontane lagbui kan vergelyk word met drie minute van aërobiese oefeninge, terwyl tien hartlike glimlagte gelyk is aan tien minute van intensiewe roei-oefeninge.” Ander voordele van lag sluit in ’n drievoudige toename in die hoeveelheid lug wat in die longe ingetrek word, sowel as verbeterde sirkulasie, spysvertering, metabolisme, breinwerking en verwydering van skadelike stowwe. Die tydskrif stel voor dat jy soggens heel eerste vir jouself, jou huweliksmaat en jou kinders glimlag om jou in die regte gemoedstemming te kry. “Leer om vir jouself te lag”, voeg dit by. “Probeer om selfs in moeilike omstandighede die positiewe sy van sake te sien.”
Sonniger middae—stiller nagte
’n Onlangse studie van die slaappatrone van 56 gesonde babas, wat in die Journal of Sleep Research gepubliseer is, het aan die lig gebring dat “babas wat snags goed geslaap het, in die vroeë middag aan heelwat meer lig blootgestel is”. Blootstelling aan lig in die oggend en laatmiddag het egter geen verskil in slaapgehalte meegebring nie. Die samesteller van die studie, dr. Yvonne Harrison van Brittanje se John Moores-universiteit in Liverpool—wat self ’n ma is—het besluit om die uitwerking van lig op babas se slaap te bestudeer omdat vroeëre navorsing getoon het dat meer blootstelling aan sonlig bejaardes beter laat slaap het.
Chagassiekte versprei
Chagassiekte kom van ’n parasiet wat deur ’n bloedsuiende insek, ’n soort roofwants, se ontlasting oorgedra word. Die siekte is endemies in landelike gebiede van Mexiko tot Argentinië. The Herald van Mexiko berig dat ongeveer een en ’n half tot tweemiljoen Mexikane met die parasiet besmet is. Maar Chagassiekte versprei nou na ander wêrelddele. Dit gebeur onder andere weens bloedoortappings. Die Mexikaanse bioloog Bert Kohlmann verduidelik: “Ons het reeds verslae van infeksies weens bloedoortappings uit Australië, Europa, die Verenigde State en Kanada gekry. Emigrante van die Amerikas wat gewoonlik gesond is, skenk bloed, en niemand in daardie ander lande dink eens daaraan om dit vir Chagassiekte te toets nie.” Die Wêreldgesondheidsorganisasie skat dat 16 tot 18 miljoen mense in die Westelike Halfrond met die siekte besmet is en dat nog 100 miljoen die risiko loop om besmet te word. Chagassiekte, wat dikwels dodelik is, is tans ongeneeslik.
Belastinggaarders slaan toe
Die Reuters-nuusdiens berig dat stadsamptenare in Rajahmundry, Indië, aangebied het om geen boetes en rente te eis nie om plaaslike inwoners aan te moedig om hulle agterstallige eiendomsbelasting van R7,52 miljoen te betaal. Toe daardie benadering misluk het, het die amptenare 20 spanne tromspelers gehuur om buite die huise van nalatige belastingbetalers te speel. Die tromspelers “skop ’n kabaal buite die huise van wanbetalers op, lok hulle na buite en verduidelik aan hulle wat hulle skuld en dat dit so gou moontlik gedelg moet word”, het die munisipale kommissaris T.S.R. Anjaneyulu gesê. “Hulle hou nie op voordat die mense instem om hulle skuld te betaal nie.” Hierdie ongewone metode het vrugte afgewerp. Nadat die tromspelers net ’n week lank onophoudelik gespeel het, het die stad 18 persent van sy agterstallige eiendomsbelasting ingevorder.
Godsdiens in Rusland
In die verlede is daar gedink dat die mense in Rusland wat aan ’n godsdiens behoort, oor die algemeen vroue, bejaardes en diegene is wat nie hulle hoërskoolloopbaan voltooi het nie. Maar nou toon gegewens dat al hoe meer jongmense, mans en dié met hoër geleerdheid ’n godsdiensverband het, berig die Russiese koerant Rossijskaja Gazeta. Tussen 1989 en 1991 het slegs 30 persent van die bevolking hulle as Ortodokse Christene geïdentifiseer. Maar ná 1999 het hierdie syfer meer as 50 persent bereik. Russiese sosioloë het onlangs gevind dat 30 persent van Russe glo in lewe ná die dood, 24 persent in ’n hemel en hel en 28 persent in godsdienswonderwerke. Amper ’n derde van diegene met wie daar ’n onderhoud gevoer is, het saamgestem met die stelling: “Ek glo dat God bestaan en het geen twyfel daaromtrent nie.” Terselfdertyd “glo 30 persent van Russe in astrologie, en 50 tot 55 persent glo in profetiese drome en voortekens”, sê die berig.
Griekse kerk probeer moderne Grieks gebruik
Omdat die aartsbiskop van Griekeland besorg was oor die feit dat talle Griekse kerkgangers nie die Bybelverse kan verstaan wat tydens kerkdienste gelees word nie, het hy beveel dat Atene se kerke ook moderne Grieks gebruik. “Die Nuwe Testament is gewoonlik gelees in die oorspronklike Hellenistiese ‘Koine’, of omgangstaal, ’n vorm van Grieks wat van die einde van die vierde eeu voor Christus tot die vyfde eeu ná Christus in gebruik was”, het die koerant Kathimerini verduidelik. Maar die aartsbiskop was “bekommerd dat veral jongmense nie hierdie vorm van Grieks verstaan nie en nie die dienste kan volg nie”, het die berig gesê. In ’n proefprogram wat volgens Kathimerini “’n groot stap was vir ’n Kerk wat aan sy tradisies vasklou”, is Bybelverse eers in Koine-Grieks en toe in moderne Grieks gelees. Maar minder as ’n jaar later het die koerant berig dat die kerk hierdie poging “om voorlesing uit die Nuwe Testament meer toeganklik te maak, . . . laat vaar”.
Opsporingswebwerwe laat egskeidingsyfer styg
Webwerwe wat ou skoolmaats herenig, “laat huweliksverbrokkeling toeneem omdat verveelde mans en vrouens ou liefdes opspoor”, berig Brittanje se Guardian Weekly. Christine Northam, woordvoerster vir die huweliksberadingsliggaam Relate, het kommentaar gelewer oor hoe hierdie gebruik Brittanje se egskeidingsyfer raak, wat in 2004 die hoogste in sewe jaar was: “Baie mense het aangename herinneringe van die eerste verhouding wat hulle op skool of kollege gehad het. As hulle ongelukkig met hulle maat voel, begin hulle wonder hoe dit sou gewees het as hulle nog saam met hulle ou liefde was.” Dit is nou makliker as ooit tevore vir ongelukkige huweliksmaats om “op die Internet na romanse te soek”, sê die koerant, “pleks van die emosionele probleme van die huwelik te probeer oplos”.
Trappe is gevaarlik
Trappe “veroorsaak meer nienoodlottige beserings per jaar as motorongelukke”, sê die Amerikaanse tydskrif The Week. Die berig sê verder: “Elke jaar sterf daar ongeveer 1 091 Amerikaanse trapklimmers, en 769 400 word beseer.” Wat veroorsaak dat mense skeef trap en val? “Oor die algemeen skat mense die afstand verkeerd en sit hulle een van hulle voete verkeerd neer”, sê The Week.