Van ons lesers
Borskanker Baie dankie dat julle die artikels “Borskanker—elke vrou se vrees” (8 April 1994) gepubliseer het. Ek het myself van tyd tot tyd ondersoek en het net gedink dat my kliere hard is. Omdat ek baie onseker was, het ek niks daaromtrent gedoen nie. Maar nadat ek die artikel gelees het, het ek hospitaal toe gegaan en uitgevind dat ek kanker het. Daar is gereël dat ek ’n operasie ondergaan. Ek sê hartlik dankie.
T. Y., Japan
Sedert my operasie kan ek niks oor kanker lees nie. Toe die tydskrif dus verskyn het, was ek nie te opgewonde daaroor nie. Maar ek lees gewoonlik alle nommers van die Ontwaak! van voor tot agter, en daardie aand het ek besluit om ’n bietjie te lees en op te hou as ek bang word. Wel, ek kon nie ophou lees nie. Die artikels was so goed geskryf, so leersaam en so liefdevol.
G. K., Verenigde State
Die artikel het my gehelp om te sien dat Jehovah begrip het vir ons vrees om voor ’n lewensgevaarlike siekte te staan te kom. Ek het altyd gedink dat mense swak is of ’n gebrek aan geloof het as hulle so voel. Dit het my werklik gehelp om Jehovah se diep medelye te sien.
K. G., Verenigde State
As daar nou ooit ’n tydskrif was wat vir iemand bedoel was, was daardie nommer beslis vir my bedoel. Ek en my man het op die rusbank gesit met ons mediese rekeninge vir my borskankeroperasie om ons uitgesprei. Terwyl ons die een tjek na die ander uitgeskryf het, het die posbode hierdie nommer van die Ontwaak! afgelewer. Ek het die artikel daardie selfde dag met meer as die gewone belangstelling gelees. Ek wil julle namens al die vroue bedank wat deur hierdie artikels bemoedig gaan word.
E. J., Verenigde State
Stede Ek is 16 jaar oud en was verheug om die reeks oor stede te lees. In my aardrykskundeklas is ons gevra om ’n kort voordrag oor ’n onderwerp van ons keuse te hou. Ek het myne op die artikel “Die stad wat vol mense was” (22 Januarie 1994) gebaseer. Nadat ek dit hardop in die klas gelees het, het almal hande geklap. Dankie dat julle my gehelp het om my begrip van aardrykskunde te verbeter.
T. R., Duitsland
In die artikel “Laat ons vir ons ’n stad bou” het julle gesê dat “Londen in 1900 die enigste stad in die hele wêreld was wat ’n bevolking van eenmiljoen gehad het” (8 Januarie 1994). Maar in die volgende nommer het julle gesê: “Teen die middel-1800’s het dit [Edo, wat nou Tokio genoem word] ’n bevolking van heelwat meer as ’n miljoen mense gehad.” Watter een is reg?
S. T., Japan
Die stelling oor Londen was blykbaar foutief. Dit was op die 1985-uitgawe van die “Illustrated Atlas of the World” (Rand McNally and Company) gebaseer. Dit lyk egter asof “The World Almanac and Book of Facts 1993” reg is wanneer dit sê dat etlike stede teen 1900 ’n bevolking van meer as ’n miljoen gehad het. Jammer oor die verwarring.—RED.
Die najaging van rykdom As ’n jong leser van die Ontwaak! was ek werklik getref deur die artikels “Die najaging van rykdom—Waar sal dit eindig?” (22 Maart 1994). Dit lyk vir my asof my portuurs net een doel het: om hulle beursies vol te maak. Dit is egter baie eervoller om Jehovah se leringe te volg as om verganklike dinge te aanbid.
K. R., Frankryk
Sport Dankie vir die artikel “Kies God kant in sport?” (8 Februarie 1994). Ek het al die fout gemaak om te bid dat ek ’n baanresies sal wen; ek het ook gebid dat my mededingers verloor. Nou weet ek dat Jehovah se wil niks met sport te doen het nie. Ek wil my lewe aan Jehovah toewy, en ek voel meer gerus omdat ek weet dat hy werklik na my gebede luister.
J. T., Verenigde State