Tydskrifte wat praktiese vertroosting bied

“EK WIL julle hartlik bedank vir die wonderlike, praktiese artikels wat julle ons gee om mee te werk, veral oor die afgelope paar jaar. Toe ek sommige van hulle ontvang het, het ek letterlik gehuil en Jehovah gedank, want so baie van ons vriende in die waarheid het sulke inligting uiters dringend nodig. Ek verwys na nommers wat probleme behandel soos kindermishandeling, wanneer ’n mens in ’n alkoholishuisgesin grootgemaak word, verkragting en gesinsgeweld.”—Linda W. S., Indiana, VSA.

Daardie woorde was die inleiding van een van die talle bemoedigende briewe wat ons in onlangse jare ontvang het aangaande die inhoud van Die Wagtoring en Ontwaak! wat deur die Wagtoringgenootskap uitgegee en wêreldwyd deur Jehovah se Getuies versprei word.

Wanneer ons in gedagte hou dat eersgenoemde ’n oplaag van meer as 16 000 000 eksemplare van elke nommer het en in 120 tale uitgegee word en dat die oplaag van laasgenoemde byna 13 000 000 in 75 tale is, kan ons begryp dat hierdie artikels ’n wêreldwye impak het. Jehovah se Getuies bied dit vir die publiek aan in hulle huis-tot-huis-bediening en tydens hulle informele getuieniswerk, wat verwys na getuieniswerk tydens informele geleenthede, soos wanneer hulle inkopies doen, brandstof by die vulstasie laat ingooi, per bus, trein of vliegtuig reis of tydens enige ander gepaste oomblik in die loop van hulle daaglikse lewe. Sommige Getuies het egter ander oorspronklike en suksesvolle maniere gevind om die tydskrifte te versprei wat jy moontlik ook wil probeer.

Professionele organisasies word besoek

’n Reisende bedienaar het soos volg oor die produktiewe bedrywighede van ’n ander Getuie geskryf: “Sy lê haar daarop toe om ouer eksemplare van sekere Ontwaak!-tydskrifte, wat ander Getuies by hulle huise opgegaar het, bymekaar te maak. Dan besoek sy instansies wat sy dink moontlik spesiale belangstelling in sommige van die onderwerpe sal toon.” Watter soort instansies het sy al besoek?

“Sy het haar toegelê op instansies vir gemeenskapsdiens, anti-aborsiesentrums, Beplande Ouerskap, psigiaters, sielkundiges, polisiedepartemente, proefkantore, sentrums vir dwelm- en alkoholmisbruik, sentrums vir die behandeling en voorkoming van kindermishandeling, welsynsdepartemente (waar sy vra om maatskaplike werkers te spreek), distriksgesondheidsdepartemente, dagsorgsentrums, skole, hospitaalstressentrums en in een geval ’n stadsburgemeester.” Watter welslae het sy behaal?

“Sedert sy haar ses maande gelede op hierdie unieke veld begin toespits het, het sy 1784 ouer nommers oor spesifieke onderwerpe versprei!”

Hoe gaan hierdie Getuie te werk om professionele mense te besoek? Sy sê: “Ek dink een van die redes waarom hierdie besoeke so geslaagd was, afgesien daarvan dat die tydskrifte kwessies aanroer waarmee hierdie mense daagliks te kampe het, is die professionele manier waarop ons ons geklee en ons aanbiedings gedoen het.” Professionele mense sal ons beslis respekteer as ons ’n vrymoedige, saaklike benadering het en as ons geskik geklee en versorg is.

Sy vertel verder: “Ons het ’n Ontwaak! oor aborsie (22 Mei 1993) aangebied, en ek het toe besluit om ’n anti-aborsiesentrum te besoek. Ek het die gesprek met ’n nuusbrokkie oor ’n verbroude aborsie begin en het dit toe by die tydskrif, tesame met Die Wagtoring, ingeskakel. Ons het so ’n aangename gesprek gehad dat ek ook die brosjure Gee God werklik vir ons om? aangebied het, wat hulle gretig aanvaar het.” Haar volgende besoek was aan ’n Beplande Ouerskap-sentrum waar sy soortgelyke welslae behaal het.a

Hierdie soort inisiatief kan tot ’n steeds groeiende leserskring lei. Uit die briewe wat ons ontvang het, weet ons dat professionele mense dikwels beïndruk is deur die navorsing wat gedoen word en die uitstekende manier waarop ons tydskrifte geskryf word. En dat dit wel die geval is, kan gesien word uit die feit dat die Ontwaak! in sommige lande, soos Suriname, in Suid-Amerika, deur studente en onderwysers as ’n hoofopvoedkundige tydskrif gebruik word. Die Getuies daar versprei tydskrifte in groot hoeveelhede en die belangstellendes wag gretig op elke nommer.

Een berig wat van Nigerië ontvang is, het vertel van ’n radiostasie wat woord vir woord uit die Ontwaak! “Vroue verdien respek” (8 Julie 1992) aangehaal het. Waarop dui dit? Dat ons die tydskrifte met welslae vir direkteurs van radio- en TV-stasies kan aanbied. Dit beteken net dat ons elke nommer moet bestudeer en moet bepaal wie die plaaslike spesialiste is wat in die onderwerp gedek word, of hulle nou regsgeleerdes, onderwysers, raadgewers, polisiemanne, verpleegsters, dokters of lede van enige ander beroep is.

’n Ander benadering is deur ’n Getuie gebruik wat haar aanbieding begin het deur te vra: “Hou jy van vasvrae? Die meeste mense hou daarvan. Hier is een in hierdie nommer van die Ontwaak! (8 Januarie 1994 of 8 September 1994) met die titel ‘Het jy al ooit gewonder?’ Waarom skryf jy nie jou antwoorde op die vrae neer nie, en dan sal ek op ’n ander dag terugkom sodat ons hulle met die Bybel se antwoorde kan vergelyk.” Sy het al baie interessante gesprekke gehad deur hierdie metode te volg en het ook etlike Bybelstudies begin.

Nog ’n praktiese wenk is om van die jongste nommers aan te bied met onderwerpe wat moontlik ingang sal vind by die beroepspersoon met wie jy praat. Linda, wat vroeër gemeld is, het die volgende ondervinding met ’n administrateur/raadgewer gehad by ’n skool met ’n alternatiewe leerprogram. “Terwyl ek die tydskrifte vir haar gewys het, het sy die een oor ‘Gespanne kinders’ gesien en gesê: ‘God het jou vandag gestuur!’ Daardie selfde dag sou sy ’n sessie hê oor hoe kinders spanning kan vermy. Toe sy die ondervinding op die agterblad van die tydskrif sien wat die boek Jou jeug—Hoe om dit ten beste te benut adverteer, het sy ’n eksemplaar gevra. Ek het toevallig vir haar ’n aanhaling uit die boek oor selfmoord gewys, waarop sy uitgeroep het: ‘Nou weet ek dat God jou hiernatoe gestuur het!’ Sy het pas ’n seun raad gegee wat nie meer wou leef nie. Nou sou sy hom nog raad kon gee.”

Hierdie ondervindinge toon dat ons met inisiatief en voorbereiding, tesame met ’n positiewe gesindheid, baie meer mense met God se Woord wat vertroosting bied, kan probeer bereik. Soos die apostel Paulus geskryf het: “Geseënd is God die Vader van onse Here Jesus Christus, die Vader van ontferminge en die God van alle vertroosting, wat ons troos in al ons verdrukking, sodat ons die wat in allerhande verdrukking is, kan troos deur die vertroosting waarmee ons self deur God getroos word.”—2 Korinthiërs 1:3, 4.

[Voetnote]

[Prent op bladsy 23]

Instansies vir gemeenskapsdiens vind dat die tydskrifte praktiese inligting bevat

[Prent op bladsy 24]

Die Wagtoring en Ontwaak! kan in baie situasies aangebied word