Geen deel van die wêreld nie?
DEUR ONTWAAK!-MEDEWERKER IN DUITSLAND
“HULLE behoort nie tot die wêreld nie, net soos Ek ook nie tot die wêreld behoort nie” (Johannes 17:16). Met hierdie woorde het Jesus die absolute neutraliteit van sy volgelinge ten opsigte van politieke aangeleenthede beskryf. Voldoen verklaarde Christene vandag aan hierdie standaard?
Beskou die volgende perskommentare aangaande die Christendom se betrokkenheid in die voormalige Duitse Demokratiese Republiek (DDR), wat deur ’n Kommunistiese regime regeer is totdat dit in 1990 ontbind is.
• “Noudat die Lutherse Kerk in die DDR ’n rukkie lank roem as die moeder van die vreedsame revolusie geniet het, lyk dit of die kerk se gewildheid onder die publiek vinnig afneem. Dit lyk vir baie asof dit eerder ’n steunpilaar van die regime en ’n speelplek vir die Stasi (Staatsveiligheidsdiens) was.”—Die Zeit, November 1991.
• “Verskeie provinsiale Lutherse Kerke . . . het hulle verbystering uitgespreek oor die betrokkenheid van kerkarbeiders en gemeentelede by die Stasi.”—Evangelische Kommentare, Januarie 1991.
• “[Lutherse] Kerkleiers ontvang klagtes dat priesters nie meer vir hulle mense sorg soos vroeër nie, aangesien hulle in die politiek bedrywig is.”—Süddeutsche Zeitung, Februarie 1990.
• “Weizsäcker [voormalige president van die Bondsrepubliek Duitsland] het gesê dat die [Lutherse] Kerk altyd ’n nuttige rol in die politieke verhouding van die twee Duitse State gespeel het.”—Wetterauer Zeitung, Februarie 1992.
Politieke inmenging was geensins tot die Lutherse Kerk beperk nie. “Feitlik elke [Protestantse] kerkgroep is deur Stasi-agente geïnfiltreer”, het The European berig. Manfred Stolpe, wat deur The European as “die protestantse kerk se vernaamste onderhandelaar met die kommunistiese owerhede” bestempel is, het verdedigend gesê: “Ek sou met die Duiwel hand geskud het as dit ons doel sou bevorder.”
Die Guardian van Londen het oor die hegte verhouding tussen die geestelikes en die Mafia in Italië berig. Dit het gesê: “Die Kerk en Cosa Nostra het so lank vreedsaam met mekaar verkeer dat die kerk dikwels van medepligtigheid beskuldig is.”
Die Toronto Star het ’n artikel geplaas oor die medewerking tussen sommige Russies-Ortodokse priesters en die voormalige KGB. Die berig sê: “Die blootlegging van die kerk se samewerking met die kommunistiese regime is die vernietigendste slag. . . . Gegewens uit die KGB-argief . . . dui daarop dat senior kerkamptenare nie net hulle eie beginsels verraai het nie, maar ook bereid was om godsdiensleiers in die buiteland daarby te betrek.”
Terwyl die kerke van die Christendom voortgaan om in die politiek in te meng, bly die ware Christelike geloof getrou aan Jesus se opdrag om nie van die wêreld te wees nie.