Jongmense vra . . .

Hoe kan ek my klerekas verbeter?

ROBERT is desperaat! Hy moet sy suster se troue bywoon en het hoegenaamd niks om aan te trek nie. Dit is nou nie dat Robert volgens die Bybel se beskrywing in “’n naakte toestand” is nie (Jakobus 2:15, NW). Maar Robert se alledaagse uitrustings sal eenvoudig nie vir hierdie formele geleentheid geskik wees nie.

Daarenteen het jong Angela drie sosiale geleenthede om by te woon, en by elke geleentheid moet sy ’n ander soort uitrusting dra. Maar in teenstelling met Robert is dit nie vir haar moeilik om iets gepas te vind om te dra nie. Angela is nie juis ryk nie. Sy het eenvoudig vir haar ’n basiese klerekas opgebou wat haar in staat stel om in ’n verskeidenheid situasies goed geklee te wees.

’n Artikel in die tydskrif Woman’s Day het gesê: “Klere is belangrik. Dit kan baie daartoe bydra dat jy werklik goed oor jouself voel.” Wat jy aantrek, het ook ’n groot uitwerking op die manier wat ander jou beskou en behandel. Dit Bybel spoor ons dus tereg aan om met ‘goed versorgde kleredrag, met beskeidenheid en gesonde verstand’ versier te wees (1 Timotheüs 2:9, NW). As jy ’n Christen is, moet dit vir jou belangrik wees om gepaste klere te hê.

Maar kan dit wees dat jy soms voel dat jy niks het om aan te trek nie, al het jy ’n kas vol klere? Wat is die probleem, en hoe kan jy sake regstel?

Die hoë prys van modebewustheid

Dikwels is die probleem nie geld nie, maar dit is omdat die wêreld se steeds veranderende style en modes slaafs nagevolg word. Die boek Youthtrends sê dat “die sakewêreld besef hoeveel geld jongmense aan klere met ontwerpersname sal spandeer”. Weens ’n begeerte na meer geld gebruik die klerebedryf treffende advertensies in tydskrifte en op TV om jongmense te oorreed om te spandeer—en te spandeer en te spandeer! En portuurdwang dra ook nog tot die sukses van die strategie by. ’n Onderwyser kla: “Almal spandeer baie geld aan klere en die kinders wat dit nie kan bekostig nie . . . , begin na skool werk net om ontwerpersjeans te koop.”

Om ’n modeslaaf te wees, kos geld, en dit laat jou dalk met min geld om praktieser kledingstukke te koop wat jy werklik nodig het. Romeine 12:2 gee dus goeie raad wanneer dit sê: “Word nie aan hierdie wêreld gelykvormig nie, maar word verander deur die vernuwing van julle gemoed.” Dit is weliswaar nie altyd maklik om anders te wees nie. Die 16-jarige Charlene erken: “Die kinders by die skool kyk snaaks na jou as jy nie soos hulle aantrek nie.” Wanneer jy toelaat dat ander vir jou voorskryf wat om te doen, word jy dus hulle slaaf. (Vergelyk Romeine 6:16, NW.) ’n Jong vrou met die naam Johanna erken: “Ek raak geïrriteerd, want ek voel asof ek altyd aantrek om iemand anders te behaag.”

Is dit altyd verstandig? Neem byvoorbeeld die straatbende-, hip-hop- en “grunge”-klerestyl. Baie dra hierdie style bloot omdat dit gewild is. Tog is dit ’n duidelike teken van woede en opstand. Sal ander nie dalk die verkeerde indruk van jou kry as jy sulke klere dra nie? (Johannes 15:19; vergelyk 2 Korinthiërs 6:4.) Om nie eens te praat van die feit dat dit tot jou dood kan lei as jy soos ’n bendelid lyk nie. Party skole in Amerika het derhalwe die dra van bendestyle verbied. Die les? Dit het min sin om jou vriende jou klerekas te laat kies, nog minder dat hulle jou lewe beheer. Pleks van besorg te wees oor wat hulle sal behaag, moet jy ‘aanhou om seker te maak wat vir die Here aanneemlik is’!—Efesiërs 5:10, NW.

Neem jou behoeftes in aanmerking

Sodra jy jou van die tirannie van giere en modes bevry het, kan jy vir jou ’n klerekas begin opbou wat jy werklik nodig het. Jy bestee byvoorbeeld baie van jou tyd by die skool. As jou skool ’n uniform vereis of streng reëls in verband met kleredrag het, sal jou keuses beperk wees. Maar in baie skole kan jy jou eie keuse maak en is slenterdrag die norm.

In so ’n situasie is dit dalk nie verstandig om die aandag te trek deur ’n baadjie en das of ’n deftige rok te dra nie. Jy sal informeel wil lyk sonder om te modebewus of slordig te lyk. ’n Tienermeisie met die naam Millie het dit gedoen. Terwyl sy op skool was, het sy mode-uiterstes vermy. As jy in ’n soortgelyke situasie is, het jy dalk ook ’n paar informele slenterbroeke, hemde of bloese in jou klerekas nodig. As geld skaars is, sal net ’n paar van hierdie kledingstukke voldoende wees.—Vergelyk Lukas 10:42, NW.

As jy nie te veel skoolklere in jou kas het nie, sal jy dalk genoeg geld oorhê om na ander behoeftes om te sien. Het jy byvoorbeeld ’n sekulêre werk of takies om in die huis te verrig? Dan het jy duursame, sterk klere nodig. Jy het dalk ook geskikte klere nodig vir sport en ander vermaak. Hoewel dit dalk in die mode is om ontwerperskortbroeke, -hemde en -tekkies te dra, sal jy vind dat party goedkoper kledingstukke net so bruikbaar is.

Indien jy ’n Getuie van Jehovah is, wil jy ook in ag neem dat jy gepaste klere vir Christelike vergaderinge nodig het, aangesien informele klere nie vir aanbidding gepas is nie. In lande waar Westerse klerestyle gedra word, dra jong mans gewoonlik ’n deftige langbroek, ’n deftige hemp, ’n das en ’n baadjie. Jong vroue dra gewoonlik ’n rok of ’n romp en ’n bloes. Soortgelyke klere word ook in die predikingswerk van huis tot huis gedra. Jou begroting sal bepaal hoeveel van hierdie uitrustings jy kan koop. Gelukkig hoef jou klere nie baie of volgens die nuutste mode te wees nie. Dit moet netjies en skoon wees.

Jesus Christus het ’n troue bygewoon, en jy word dalk ook gevra om sekere sosiale geleenthede by te woon (Johannes 2:1, 2). As dit gebruiklik is om deftig vir sulke geleenthede aan te trek, maak dit sin om ’n paar gepaste kledingstukke te hê. “Ek was al in situasies waar ek nie gepas vir die geleentheid aangetrek was nie, en dit was nie aangenaam nie”, sê Johanna. As jy ten minste een formele uitrusting besit, kan jy jou ook die druk en onkoste spaar om iets op die nippertjie te koop.

Stel ’n lys op

Jy wil dalk doen wat die skrywer Jean Patton ’n kasoudit noem (Color to Color). Sorteer jou klere, ook dit wat weggepak is. Jy kry dalk klere waarvan jy al vergeet het. Jy kan terselfdertyd klere waarvoor jy te groot is of waarvan jy nie meer hou nie weggooi.

Stel nou ’n lys op deur dit miskien te rangskik in deftige kledingstukke (jasse, pakke, rokke, sportbaadjies), addisionele kledingstukke (bloese, truie, formele hemde) en bykomstighede (serpe, belde, handskoene, hoede, skoene, handsakke, dasse). So ’n lys help jou om te bepaal wat jy nog in jou klerekas nodig het.

Koop oordeelkundig

In party lande is nuwe klere ’n luukse. Jongmense doen moeite om die klere wat hulle wel besit, te versorg en dit redelik netjies en skoon te hou. Maar gestel jy kan nuwe klere koop? In haar boek Working Wardrobe sê Janet Wallach dat “’n vrou tyd en geld kan spaar as sy haar klere koop met ’n spesifieke idee en doel in gedagte”. Dit geld ook vir jong mans. Jy het waarskynlik ’n beperkte begroting, en daarom moet jy die koste bereken van enigiets wat jy koop. (Vergelyk Lukas 14:28.) Dit beteken dalk dat jy jou inkopielys moet inkort en by die belangriker dinge moet bly. ’n Goeie praktiese reël is om die meeste geld aan klere te bestee wat jy die meeste gaan dra.

The Better Business Bureau A to Z Buying Guide gee hierdie raad: “Jou klerekas moet uit een basiese kleurgroep bestaan, soos vlootblou en grys of maroen en swart. Kies deftige kledingstukke in hierdie kleure, en los helder aanvullende skakerings vir hemde, bloese en bykomstighede.” Kledingstukke met neutrale kleure sal langer in die mode bly. As jy by basiese kleure bly, kan jy baie makliker eksperimenteer en nuwe uitrustings skep.

Spreuke 14:15 sê: “Die skrandere let op sy voetstappe”, en as jy presies weet wat jy wil koop, kan dit jou help om duur impulskopery te vermy. “Ek neem altyd my inkopielys saam met my wanneer ek inkopies doen”, sê een jong vrou. Onthou ook dat dit op die lange duur die moeite werd is om eerder kwaliteit as kwantiteit te koop. ’n Kwaliteitskledingstuk kan jare lank hou. “Ek het nog steeds truie wat ek as ’n tiener gedra het”, sê een jong vrou. ’n Handelsmerk waarborg egter nie noodwendig die kwaliteit nie; dit word die beste bepaal deur die kledingstuk sorgvuldig te ondersoek.a

Wees aan die konserwatiewe kant wat styl betref. ’n Rok of manspak in die klassieke styl sal omtrent altyd in die mode wees. Modieuse style se gewildheid neem gou af. In haar boek Conservative Chic sê Amelia Fatt: “Konserwatiewe klere kan makliker met bykomstighede aangevul word, daar kan volgende jaar makliker iets daarby gevoeg word en dit is ’n beter belegging.”

Moenie vergeet nie dat jou ouers jare se ondervinding het wat die aankoop van klere betref. Sommige van julle voorkeure is dalk ’n geslag uitmekaar, maar oor die basiese dinge stem julle dalk meer saam as wat jy besef. “My ma het my en my suster gehelp om ’n goeie smaak vir klere te ontwikkel”, sê Angela. Met tyd en geduld kan jy ook ’n gepaste, bruikbare klerekas hê. Miskien sal jy nooit weer hoef te sê: ‘Ek het niks om aan te trek nie!’

[Voetnoot]

[Prent op bladsy 19]

Stel eers ’n lys op van wat jy reeds besit