Van ons lesers

Onsedelikheid Dankie vir die artikel “Jongmense vra . . . Is dit werklik so verkeerd om met onsedelikheid te speel?” (8 Februarie 1994). Ek het met ’n jong man uitgegaan en hy het vir my gesê as hy my nie soen of aanraak nie, kon hy nie vir my wys hoe lief hy my het nie. Ons het te ver gegaan, en twee weke later het hy ons troue gekanselleer. Ek het so sleg—en gebruik—gevoel. Ek wens ek was nie so dwaas nie. Dankie dat julle hierdie artikels gepubliseer het wat ek uiters dringend nodig gehad het.

N. R., Verenigde State

Ek het eenkeer by vurige liefkosery betrokke geraak en ek het gedink dat dit onskuldig was omdat ek nie so ver gegaan het om hoerery te pleeg nie. Hierdie artikel het my gehelp om te besef dat ons God nie kan bespot nie en dat hy alles weet.

T. J., Nigerië

Wanneer ek ook al lede van julle geloof ontmoet, neem ek die Ontwaak! Dit was die geval met die nommer van 8 Februarie 1994. Die artikel oor onsedelikheid het my beïndruk. Die publikasies van my eie Evangelies-Lutherse Kerk bespreek nie sulke onderwerpe nie, aangesien hulle homoseksuele en lesbiërs ook probeer behaag. In julle tydskrifte roer julle onderwerpe aan wat vir ander taboe is. Ek bewonder julle moed en sterk geloof.

H. S., Duitsland

Baie dankie vir die artikel “Jongmense vra . . . Hoe ver is ‘te ver’?” (22 Oktober 1993). Ek gaan met ’n jong Christenman uit. Hoewel dit in ons gemeenskap iets algemeens is om te soen en te liefkoos, het ons reg van die begin af vir mekaar perke gestel. Dit is nie maklik om Jehovah se regverdige standaarde te volg nie, en ek is seker daarvan dat hierdie artikel talle sal help.

P. S. F., Brasilië

Hoewel ek 26 jaar oud is, is die artikels in die rubriek “Jongmense vra . . .” vir my van groot waarde. Hierdie besondere vraag het my gekwel. Ek is so bly hierdie artikel sê uitdruklik en duidelik hoe ver is te ver!

V. V., België

Moerasse Die artikel “Moerasse van die wêreld—Ekologiese skatte word aangeval” (22 Januarie 1994) het my beweeg om te skryf. Die foto’s het gehelp om ons verpligting te beklemtoon om Jehovah se skepping in al sy prag te bewaar. Ek is bly God gaan binnekort ‘die verderwers van die aarde verderf’.—Openbaring 11:18.

Z. C. B. S., Brasilië

Ek is ’n tienerseun. Ek het die artikel gelees en besef dat die natuur in baie dele van die wêreld aan uitputting onderwerp word. Ek kan nou sien dat al sê mense hulle wil verenig in hulle dade wees, kan hulle dit nie doen nie. Ek wil dus my bes doen om die Bybel te bestudeer sodat ek in God se toekomstige Paradys kan wees.

Y. K., Japan

Julle artikel was ’n goeie voorbeeld daarvan dat dit nie net ’n genot is om die Ontwaak! te lees weens sy inhoud nie, maar ook weens sy samestelling en uiteensetting: uitstekende fotografie, netjiese en ordelike uitleg. Dankie.

M. E., Kanada

Konsentrasiekamp-oorlewende Ek is baie bemoedig deur die ondervinding van Feliks Borys: “Deur geloof in God beskerm” (22 Februarie 1994). Toe ek dit lees, het ek letterlik hoendervleis geword, en ek moes sukkel om die trane te keer. Dit het my die krag gegee om tydens beproewing te volhard.

A. C., Italië

Die artikel het my gehelp om steeds groter waardering te hê vir Jehovah se krag om diegene te beskerm wat hulle vertroue in hom stel. Hoe hartroerend was dit tog om te lees van die wonderlike manier waarop Jehovah die gebede van Feliks Borys verhoor het!

E. F., Swede