Wagtoring – AANLYN BIBLIOTEEK
Wagtoring
AANLYN BIBLIOTEEK
Afrikaans
  • BYBEL
  • PUBLIKASIES
  • VERGADERINGE
  • g95 3/8 bl. 5-7
  • Hoe heilsame voedsel jou gesondheid kan verbeter

Video nie beskikbaar nie.

Jammer, die video kon nie laai nie.

  • Hoe heilsame voedsel jou gesondheid kan verbeter
  • Ontwaak!—1995
  • Onderhofies
  • Soortgelyke materiaal
  • ’n Verstandige belegging
  • Waarom ’n gevarieerde dieet volg?
  • ’n Gebalanseerde beskouing van voedsel en gesondheid
  • Hoe voedsaam is jou voedsel?
    Ontwaak!—1995
  • Diepgewortelde oorsake, verreikende gevolge
    Ontwaak!—2003
  • Voedsame kos binne jou bereik
    Ontwaak!—2002
  • Het jy goeie geestelike eetgewoontes?
    Die Wagtoring kondig Jehovah se Koninkryk aan—1997
Sien nog
Ontwaak!—1995
g95 3/8 bl. 5-7

Hoe heilsame voedsel jou gesondheid kan verbeter

WAT ’n vreugde is dit tog om ’n weldeurvoede kind te aanskou! Tog is ’n kind nie sommer vanself gesond nie. “Gewone, maar voedsame voedsel was altyd ’n hoë prioriteit in ons gesin, nie net in terme van ons finansiële begroting nie, maar ook in die tyd wat daaraan bestee is om dit voor te berei en saam te geniet”, sê Kate, ’n Kanadees wat in Brasilië woon. “Omdat my ma nie uitgewerk het nie, is ons elke dag ná skool verwelkom deur die heerlike geure van aandete wat voorberei word of miskien van ’n tert of koek wat sy gebak het.”

Maar pleks van deur heilsame voedsel aan die lewe gehou te word, is daar “ongeveer 780 [miljoen] mense in arm lande, een uit elke vyf van hulle bevolking, wat nie genoeg kry om te eet nie”, sê The Economist. “Tot 2 miljard mense wat genoeg kry om hulle maag vol te maak, het nietemin ’n tekort aan die vitamiene en minerale wat hulle nodig het.” Dit is nie net dat die ondervoede persoon swakker word nie, maar dat hy ook van minder nut vir ander is. Daarom word die ekonoom Eduardo Giannetti da Fonseca van Sao Paulo-universiteit, Brasilië, aangehaal waar hy aangaande ondervoede kinders sê: “Hierdie [vermorsing van mensehulpbronne] is erger as enigiets anders. . . . Ek glo dat daar onder hierdie kinders talente en vermoëns is wat op die ou end weens armoede verborge bly. Uit hulle midde kon daar, onder ander omstandighede, ’n Albert Einstein gekom het.” Die tydskrif Veja sê: “Die land verloor spierkrag wat afneem as gevolg van swak voeding en dit verkwis ’n potensiële reserwe van intelligensie, skeppingsvermoë en energie.” Daarom gee verstandige ouers, ten spyte van die hoë lewenskoste, hulle kinders ’n stewige grondslag deur in voedsame voedsel te belê.

’n Verstandige belegging

“Belê” beteken “om van gebruik te maak vir toekomstige voordele”. Hoe kan jy in voeding belê? As jy moes kies, sou jy van luukshede of statusartikels afsien en jou beperkte begroting gebruik om heilsame voedsel te koop?

“Die sintuie is nie passief totdat dit skielik by geboorte in werking tree nie; bewyse dui daarop dat die sintuiglike stelsel al lank voor geboorte funksioneer”, sê The New Encyclopædia Britannica. Die ideale manier om dus ’n kind te begin voed, is om ’n weldeurvoede ma te hê. Die volgende stap—ná geboorte—is om die baba te borsvoed, aangesien moedersmelk volledige voeding voorsien en selfs die liggaam teen algemene siektes immuniseer. Facts for Life, ’n publikasie van die Verenigde Nasies, sê: “Vir die eerste paar maande van ’n baba se lewe is moedersmelk alleen die allerbeste voedsel en drank. Babas het ander voedsel, buiten moedersmelk, nodig wanneer hulle vier tot ses maande oud is.”

Hoewel die herstelvermoë van die menseliggaam merkwaardig is, moet dit nie as vanselfsprekend aanvaar word nie. Dit is noodsaaklik om dit van kleins af met heilsame voedsel op te bou. The World Book Encyclopedia sê: “Teen die tyd dat ’n kind 6 jaar oud is, het die brein sy volle gewig van 3 pond (1,4 kilogram) bereik. Die meeste van die breinselle is by geboorte teenwoordig, en dus is die toename in gewig hoofsaaklik aan die groei van die selle te danke. Gedurende hierdie sesjaarperiode leer en kweek ’n kind nuwe gedragspatrone aan teen die vinnigste tempo in sy lewe.” Selfs al geniet die kind ’n goeie dieet ná sy sesde jaar, sal daar dus relatief min bykomende breinselle ontwikkel. Kate sê: “Heilsame, voedsame voedsel is een van die grootste gawes wat ouers hulle kinders kan gee. Selfs al kan baie van die sogenaamde lewensbenodigdhede, wat dikwels net luukshede is, nie voorsien word nie, gee ouers wat in die verstandelike en liggaamlike gesondheid van hulle kinders belê hulle van kleins af ’n begin in die lewe wat nooit vervang kan word nie.”

Waarom ’n gevarieerde dieet volg?

’n Kind het proteïenryke voedsel nodig om liggaamlik en verstandelik te groei. Swak voeding vertraag ’n kind se verstandelike ontwikkeling op skool en die kind word dalk lusteloos en afgemat sodat hy nie in staat is om behoorlik aandag te skenk of te onthou wat geleer word nie. Ten minste 25 verskillende tekortsiektes spruit voort uit ’n tekort aan een van die basiese voedingstowwe—proteïene, vitamiene, essensiële vette of voedingselemente.

Beskou die geval van Joaquim. “Ons gesin was arm”, sê hy. “Maar ons het grond gehad en het bykans alles gekweek wat ons geëet het. Tydens elke maaltyd het ons mielies en rogbrood gehad wat van volgraanprodukte gemaak is, en dit het tot goeie voeding bygedra. My ma het amper elke dag sop gemaak wat ’n verskeidenheid groente ingesluit het, bone inkluis, en dit het in baie van ons voedingsbehoeftes voorsien. Ons het nie baie vleis gehad nie, maar ons het wel vis gehad, meestal sardientjies, kabeljou en haring.” Hy voeg by: “My ma het vyf kinders gehad, en ek kan nie onthou dat enigeen van ons siek geword het behalwe weens verkoues en griep nie. Ek dink ons goed gebalanseerde maaltye het daartoe bygedra.” ’n Ma van sewe kinders verduidelik: “Ons moes voedsame voedsel teen ’n lae koste voorsien. Ons het dus ’n groentetuin gekweek wat, hoewel dit klein was, genoeg gelewer het om in ons behoeftes te voorsien.” Sy voeg by: “Ons kinders het nooit ’n ernstige siekte gehad nie en hulle het altyd baie goed gevaar in hulle skoolwerk.”

Jou liggaam het 22 van die 103 amptelik erkende chemiese elemente as voedingstowwe nodig. Hoewel dit onmoontlik is om die presiese hoeveelheid vitamiene, minerale en proteïene vas te stel wat jy as individu nodig het, sal ’n goed gebalanseerde dieet in jou behoeftes voorsien. ’n Gesaghebbende het gesê: “Die sleutel tot goeie voeding is ’n gevarieerde dieet wat elke soort voedingstof insluit.”

Sê nou jou kinders hou nie van sekere voedselsoorte soos groente met ’n bitter smaak nie? Volgens ’n ervare kok moet ouers “die hele verskeidenheid groente wat in hulle streek beskikbaar is, voorsit. Baie grootmense eet nie groente nie, omdat hulle dit nie as kinders geëet het nie. Aangesien groente ons van vesel en in baie van ons vitamienbehoeftes voorsien asook goedkoop is, moet ouers altyd sorg dat hulle kinders dit kry.” Stel dus gerus nuwe resepte op die proef wat goed gebruik maak van vars groente en vrugte, wat miskien in die vorm van ’n smaaklike soufflé of bredie bedien kan word. Wat die so genoemde leë kilojoules betref, stel hy voor: “Ouers moenie lekkernye in die huis hê behalwe tydens spesiale geleenthede nie. As [die kinders] dit nie het nie, sal hulle dit nie eet nie.”

Hoewel ’n mens die gevaar van wanvoeding verminder deur voldoende hoeveelhede regte voedsel te eet, skep mense vir hulleself probleme deur te veel te eet. Die oormatige verbruik van kilojoules wat die liggaam se behoeftes oorskry, kan tot vetsug lei, wat met diabetes en hartsiekte geassosieer word.a Aangesien nóg medisyne nóg liggaamlike bedrywigheid goeie eetgewoontes kan vervang, is dit raadsaam om die inname van vet, lekkernye, sout en alkohol te verminder. ’n Ensiklopedie sê ook dat “stappe gedoen moet word om honger, eensaamheid, depressie, verveeldheid, woede en uitputting te verminder, alles dinge wat op sigself kan veroorsaak dat ’n mens jou ooreet”.

’n Gebalanseerde beskouing van voedsel en gesondheid

Die Bybel is nie ’n handboek oor voeding nie; dit help ons egter om gebalanseerd oor gesondheidsake te wees. Die apostel Paulus het teen diegene gewaarsku wat ander beveel om “hulle te onthou van voedsel wat God geskep het om met danksegging gebruik te word deur dié wat geloof het en die waarheid noukeurig ken” (1 Timoteus 4:3). God wil hê ons moet vergenoeg wees en goed gebruik maak van wat beskikbaar is. “Liewer ’n bietjie in die vrees van die HERE, as ’n groot skat en onrus daarby” (Spreuke 15:16).

Niemand geniet vandag volmaakte gesondheid nie. Daarom moet jy redelik wees—nie onverskillig of te angstig nie. ’n Buitensporige of dweepsugtige belangstelling in voeding of gesondheidsake kan ons ons balans laat verloor.

Soos sake nou staan, word ons uiteindelik oud en sterf ons ten spyte van pogings om na ons gesondheid om te sien. Maar gelukkig gee die Bybel ons die versekering dat God se Koninkryk ’n einde aan wanvoeding en siekte gaan maak. Hoewel menseplanne om hongersnood uit die weg te ruim, misluk het, kan ons uitsien na ’n wêreld met volop voedsame voedsel vir almal.—Psalm 72:16; 85:13.

[Voetnoot]

a “Sommige deskundiges meen dat jy vet is as jy die ‘gewenste’ gewig . . . vir jou lengte, liggaamsbou en ouderdom met meer as 20 persent oorskry.”—The American Medical Association Family Medical Guide, bladsy 501. Sien ook die Ontwaak! van 8 Mei 1994 se “Jongmense vra . . . Hoe kan ek gewig verloor?” en van 22 Mei 1989 “Is gewig verloor ’n vergeefse stryd?”

[Venster op bladsy 7]

WENKE OM JOU KIND TE HELP OM GOEIE EETGEWOONTES TE HÊ

◻ Stel ’n goeie voorbeeld.

◻ Moenie kinders toelaat om net te eet wat hulle wil nie.

◻ Vermy dit om kafkos of lekkernye in die huis aan te hou.

◻ Leer kinders om verskillende voedselsoorte te geniet.

◻ Stel ’n tyd vir maaltye, onder andere ontbyt, vas.

◻ Moenie toelaat dat TV-advertensies beïnvloed wat jy eet nie.

◻ Moenie dat kinders self iets uit die koelkas neem nie.

◻ Leer kinders om met die voorbereiding van voedsel te help.

◻ Kweek dankbaarheid vir die daaglikse voorsienings.

    Afrikaanse publikasies (1975-2025)
    Meld af
    Meld aan
    • Afrikaans
    • Deel
    • Voorkeure
    • Copyright © 2025 Watch Tower Bible and Tract Society of Pennsylvania
    • Gebruiksvoorwaardes
    • Privaatheidsbeleid
    • Privaatheidsinstellings
    • JW.ORG
    • Meld aan
    Deel