Krokodille van naderby beskou
DEUR ONTWAAK!-MEDEWERKER IN KENIA
DIE Amerikaanse toeris was ywerig besig om foto’s van seekoeie by die Mararivier te neem toe hy op die rotse gegly en ingeval het. Dit het die aandag getrek van ’n leeragtige gedierte wat toe in die son gelê en bak het, ’n krokodil. Hoewel hierdie reptiel gewoonlik vis eet, was die vooruitsig van hierdie smaaklike happie vir hom te veel om te weerstaan. Hy het onmiddellik in die water ingegly om ondersoek in te stel. Gelukkig het die toeris die krokodil sien kom en uit die rivier geklim—só vinnig dat dit gelyk het asof hy op die water loop!
Besoekers aan Afrika se riviere, mere en moerasse kry dikwels krokodille te sien, hoewel die bogenoemde verskrikte toeris waarskynlik nie graag een van heeltemal só naby wou gesien het nie. Kenia is die tuiste van die Nylkrokodil. In die plaaslike Swahili-taal staan hy eenvoudig as mamba bekend. Krokodille, wat tot sewe meter lank word, is reptiele wat op land sowel as in die water rats is. As gevolg van die afgeplatte, roeispaanagtige vorm van hulle stert kan hulle in die water baie vinnig beweeg. Hulle kan teen ’n snelheid van tot 40 kilometer per uur swem! En dit is vir hulle nie ongewoon om twee of selfs drie uur lank onder die water te bly nie. Op land kan hulle vir kort ente baie vinnig hardloop.
Dit is dus geen wonder dat die Bybel blykbaar na die krokodil verwys as ’n voorbeeld van ’n vreesinboesemende skepping van God wat Leviatan genoem word nie. Job 41:8, 10 (NW) sê: “Sit jou hand op [Leviatan]. Dink aan die stryd. Moet dit nie weer doen nie. . . . Niemand is so vermetel dat hy hom sal aanhits nie.” Uiters wyse waarskuwings! Volgens die boek The Fascination of Reptiles, deur Maurice Richardson, het krokodille selfs al buiteboordmotorbote aangeval! Job 41:16 sê gepas: “As hy hom oplig, word die magtiges bang; van verbystering raak hulle buite hulself.”
Waarom vlug mense vreesbevange wanneer hulle hierdie skubberige dier sien? Vers 5 verstrek een rede: “Die deure van sy gesig—wie het dit geopen? Rondom sy tande is verskrikking.” Elke kaak van die krokodil, die bo- sowel as die onderkaak, het tot 24 tande van verskillende groottes, wat almal voortdurend gedurende sy leeftyd vervang word. Interessant genoeg, die vierde tand van die krokodil se onderkaak pas buitekant in ’n gleuf in die bokaak en kan maklik gesien word wanneer die kake toe is. Dit help om hom te onderskei van sy neef, die alligator. Die probleem is dat as jy te naby kom terwyl jy hierdie tandondersoek doen jy dalk sal vind dat jy al die krokodil se tande van binne af ondersoek!
Dit is waarom jy miskien sal verkies om ’n veilige afstand te bewaar terwyl jy die krokodil van naderby beskou, en daar is verskeie plekke in Kenia waar jy dit kan doen. Mambadorp is byvoorbeeld ’n plek in Mombassa waar krokodille in gevangenskap geteel word.
‘Maar waarom’, vra jy, ‘sal enigiemand hoegenaamd met krokodille wil boer?’ Om hulle van uitwissing te bewaar, om maar een ding te noem. In die natuur is die sterftesyfer van krokodille in die eerste jaar van hulle lewe 99 persent. Dit lyk asof likkewane, maraboes en selfs party mense lief is om krokodileiers en klein krokodilletjies te eet. Maar die sterftesyfer van ’n krokodil wat op ’n krokodilplaas behoorlik versorg word, daal na minder as 10 persent. Jong krokodille bereik binne ’n jaar ’n lengte van 1,5 meter—beslis groot genoeg om die meeste bedreigings af te weer. In die natuur kan dit tot drie jaar duur voor jong krokodille dieselfde lengte bereik.
Krokodilplase teel ook hierdie diere vir kommersiële doeleindes. Jy kan op die internasionale mark skoene, gordels, handsakke en ander modeartikels vind wat van die sagte vel van die krokodil se pens gemaak word. Ongeveer 2000 velle word elke jaar vanuit Mambadorp na ander lande, soos Italië en Frankryk, uitgevoer vir looiery. Wat gebeur met die res van die dier? In Kenia word krokodilvleis in die toeristebedryf as ’n eksotiese lekkerny gebruik.
Oktober tot April is die krokodilpaartyd. In die natuur sal ’n wyfie van 20 tot 80 eiers lê. Gedurende daardie tyd sal wyfies in gevangenskap ongeveer 36 eiers in broeiplekke om verskillende damme lê. Die eiers word dan bymekaargemaak en in broeikaste geplaas om uit te broei. Dit duur tot drie maande.
Mambadorp bied ’n gulde geleentheid om hierdie fassinerende diere veilig waar te neem. Dit is geleë in ’n steengroef van agt hektaar wat herontwerp is om as ’n krokodilplaas, botaniese tuin, seeakwarium en vermaaklikheidskompleks te dien. Dit is die blyplek van meer as 10 000 van hierdie reptiele. Jy sal hulle natuurlik nie almal sien nie. Maar in die twee broeiplekke kan jy meer as honderd volgroeide krokodille sien, en in die ander dele is daar honderde jong krokodille in alle groeistadiums.
Met voertyd lewer die krokodille ’n besondere vertoning. Party spring selfs uit die water om vleis by te kom wat oor die dam gehang word. Hier kan jy die berugte krokodil genaamd Big Daddy sien wat mense in die omgewing van die Tanarivier geterroriseer het en ten minste vyf doodgemaak het voordat hy gevang en na die plaas geneem is. As dit jou senuweeagtig maak om krokodille van aangesig tot aangesig te sien, kan jy hulle in die videoteater goed bekyk.
Wanneer jy die krokodil van naderby beskou, kan dit jou fassineer of jou dalk bang maak. Maar jy sal beter verstaan waarom die Bybel in Job 41:25 van die krokodil gesê het: “Hy is koning oor al die trotse roofdiere.”
[Prent op bladsy 17]
Regs: ’n Oorsig oor Mambadorp
[Prent op bladsy 17]
Ver regs: ’n Krokodil wat met voertyd uit die water spring om vleis by te kom