Jongmense vra . . .

Hoe kan ek hierdie gevoelens laat weggaan?

“Hoewel ek homoseksualiteit nou walglik vind, vind ek soms dat ek daartoe aangetrek word. Hierdie gevoelens kwel my, soms dag en nag. Ek het al aanhoudend tot Jehovah gebid: ‘Neem hierdie vreeslike gevoelens weg!’ Sal hulle ooit weggaan?”—Dennis.a

’N AANTAL jong Christenmanne en -vroue het al soortgelyke wanhopige pleidooie om hulp gemaak. Hulle voel geneig tot homoseksualiteit, maar wil niks met die promiskuïteit, siekte en morele bankrotskap te doen hê wat daardie lewenswyse kenmerk nie. Van groter belang is die feit dat hulle God wil behaag, en in sy Woord veroordeel hy homoseksualiteit uitdruklik.—Romeine 1:26, 27; Kolossense 1:10.

Daar word dikwels beweer dat homoseksuele nie kan verander nie. Dit is egter nie waar nie. Sommige vroeë Christene het eers homoseksualiteit beoefen, maar hulle het verander (1 Korintiërs 6:9-11). Ja, in teenstelling met wat baie mense dink, mense kan verander en hulle doen dit ook. Maar al kan ’n jongmens homoseksuele dade suksesvol vermy, vind hy of sy dit dalk moeilik om heeltemal van homoseksuele begeertes ontslae te raak. ’n Jong man het erken: “Ek het probeer om my gevoelens te verander. Ek het tot Jehovah om hulp gebid. Ek het die Bybel gelees. Ek het al toesprake oor die onderwerp gehoor. Maar ek weet nie watter kant toe nie.”

Daar is geen wonderdadige of kitsoplossing nie. Dennis sê: “Ek het my gedwing om heteroseksueel promisku te wees in ’n poging om ’n ‘man’ te word. Dit was alles tevergeefs en het net meer pyn veroorsaak.” Maar as ’n mens Bybelbeginsels toepas, kan jy sulke gevoelens baasraak.

Herken verkeerde denkpatrone

Erken ten eerste dat gedagtes dade voorafgaan (Jesaja 55:6, 7; Jakobus 1:14, 15). Ja, dr. Wayne W. Dyer sê: “Jy kan nie ’n gevoel (emosie) hê sonder om eers ’n gedagte te ondervind nie.” Die kern van homoseksuele begeertes kan dus ’n patroon van verwronge denke oor jouself, die ander geslag, liefde, ensovoorts wees. Voordat ’n mens jou ‘verstand kan hervorm’ en sulke gedagtes kan verander, moet ’n mens hulle eers identifiseer (Romeine 12:2). As ’n mens dit doen, kan jy waardevolle insig verkry oor presies waarom jy tot lede van dieselfde geslag aangetrokke voel.

Hoe kan ’n mens dit doen? Een manier is om soos die psalmis te bid: “Deurgrond my, o God, en ken my hart; toets my en ken my gedagtes; en kyk of daar by my ’n weg is van smart” (Psalm 139:23, 24). Dit kan ook help as jy jou gevoelens met ’n verstandige en ryp Christen bespreek. Soos Spreuke 27:17 dit stel: “Yster slyp yster.” Een jong man het dus ’n Christen- ouer man in sy vertroue geneem wat daarvoor bekend was dat hy begrip en medelye aan die dag lê. Dit was vir hom glad nie maklik om iemand met sy geheim te vertrou nie, maar ’n waardevolle verhouding het ontwikkel. “Ek kan met hom oor enigiets praat”, sê hy. Die ouer man luister nie net nie, maar deur op ’n bekwame wyse vrae te stel, help hy die jong man om oor sy gevoelens en gedagtes te praat.—Vergelyk Spreuke 20:5.

As ’n jong man ’n vader gehad het wat hom verwerp of mishandel het, vind hy dalk dat sy aangetrokkenheid tot dieselfde geslag weinig meer is as ’n vergeefse poging om in die behoefte aan vaderlike liefde te voorsien. Omdat hy nooit ’n manlike rolmodel gehad het nie, voel hy dalk ook wat dr. Joseph Nicolosi beskryf as “’n gevoel van swakheid en onbevoegdheid wat betref daardie eienskappe wat met manlikheid geassosieer word, dit wil sê mag, gesag en krag”. As ’n mens oplet na die spesifieke eienskappe waarin jy voel jy te kort skiet, ontdek jy dalk tot jou verbasing dat hierdie eienskappe die einste dinge is wat jy in ander mans aantreklik vind.

Swaar “lesse” uit die verlede

Ander jongmense kom tot die besef dat hulle probleem met traumas uit die verlede verband hou. Een meisie sê: “Ek is aan pornografiese materiaal met homoseksuele temas blootgestel. Ek het onnatuurlike begeertes begin ontwikkel.” ’n Jong man sê: “Ek was ’n slagoffer van bloedskande deur my vader. Gevolglik was seks met ’n man vir my normaal.” Sulke pynlike ondervindinge kan slagoffers leer om ’n teësin in of selfs ’n vrees vir die ander geslag te hê of om liefde met fisiese intimiteit gelyk te stel. Een slagoffer beskryf dus haar seksuele begeertes as “’n emosionele en nie ’n fisiese behoefte nie—’n behoefte aan teerheid en begrip”.

Die oorsake van homoseksualiteit is weliswaar ingewikkeld en baie gevalle is moeilik om te verklaar.b Maar ongeag wat die verkeerde denke veroorsaak het, ’n mens kan baie dinge doen om dit reg te stel.

Hervorm jou verstand

Die beste manier is om God se Woord te gebruik. Neem byvoorbeeld ’n jong man wat vind dat hy aangetrokke voel tot mans wat die manlike eienskappe weerspieël wat hy meen hy kortkom. Of ’n jong vrou wat bang is vir die ander geslag. Een manier waarop hulle albei ’n gesonde beskouing van manlikheid kan ontwikkel, is deur die voorbeeld van Jesus te bestudeer (1 Petrus 2:21). Hy was ’n volmaakte voorbeeld van manlike krag in die regte verhouding met teerheid (Matteus 19:14; Johannes 19:5). Een jong man vind dit dus nuttig om die boek Die grootste mens wat nog geleef het te bestudeer.c “Om Jesus te leer ken, maak my beeld van hoe ’n man moet wees weer duidelik”, sê hy.

As ’n mens jou denke wil regstel, is dit ook nuttig om oor Bybeltekste te peins wat handel oor onderwerpe soos God se beskouing van seks, liefde en vriendskappe met lede van dieselfde geslag.—Genesis 1:27, 28; Rut 1:16, 17; 1 Samuel 18:1; Spreuke 5:18, 19; 1 Korintiërs 13:4-8.

Dit is ook belangrik om nie oor verkeerde gedagtes te bly dink nie. Hierdie drange is dikwels besonder sterk wanneer ’n mens alleen, terneergedruk of teleurgesteld is (Spreuke 24:10, NW). “Die enigste manier om te verander wat ons is, is om slegte gedagtes in goeies te verander”, sê een Christenvrou. Wanneer ’n onrein drang by haar opkom, herinner sy haar aan God se beskouing van homoseksualiteit. ’n Tienerseun sê: “Elke keer as ek homoseksuele drange kry, peins ek oor my geliefkoosde Bybelteks.” (Vergelyk 2 Korintiërs 10:4; Filippense 4:8.) Ander het gevind dat dit nuttig is om aan die slaap te raak met die klanke van die verskillende Bybelse oudiokassette van die Wagtoringgenootskap.

Net soos ons denke ’n uitwerking op ons dade het, kan ons dade ’n uitwerking op ons denke en gevoelens hê. ’n Mens moet dus ook gedrag en assosiasie beëindig wat verkeerde begeertes aan die gang sit of versterk (1 Korintiërs 15:33). ’n Mens moet dalk ook ‘op jou hoede bly’ vir plekke soos openbare ruskamers, strande, aantrekkamers en ander plekke wat ’n mens aan versoeking kan blootstel.—Psalm 119:9, NW.

Masturbasie is nog ’n ongesonde gewoonte wat vermy moet word. Vir baie homoseksuele mans en vroue is dit ’n onbeheerste drang. “Ek sukkel al vandat ek ses jaar oud is met masturbasie”, erken ’n jong man. “Seksuele fantasieë het my homoseksuele gevoelens versterk.” Stry teen hierdie onrein gewoonte!—Kolossense 3:5.d

Aan die ander kant is dit ook belangrik dat ’n mens gesonde gedragspatrone vorm. Party het voorgestel dat ’n jong man dalk minder tot ander mans aangetrokke sal voel as hy manlike eienskappe aankweek. Maar ’n jong man weet dalk nie hoe om dit te doen as hy as kind nooit ’n sterk manlike rolmodel gehad het nie. Hy is dalk selfs ongemaklik met sy eie liggaam en voel selfbewus of onmanlik. In hierdie verband help dit dikwels om deel te neem aan fisiese werk, matige oefening of ontspannende sportaktiwiteite. (Vergelyk 1 Timoteus 4:8.) Maar net soos die jong man Timoteus vir die apostel Paulus soos ’n seun geword het, kan ’n mens dit besonder nuttig vind om ’n gesonde verstandhouding met ’n gebalanseerde ouer Christenman aan te kweek (Filippense 2:19-22; 2 Timoteus 3:10). Deur duidelike gedragsperke te stel en openhartige kommunikasie aan te kweek, kan so ’n verhouding hartlik en vertroulik en tog vry van enige erotiese ondertoon wees.

’n Mens moet bowenal tot ’n sterk geestelike aanval oorgaan. Gereelde studie van die Bybel, gebed en om ander van jou geloof te vertel, help om ’n mens se gedagtes in ’n geestelike rigting te hou (Psalm 55:23; 119:11; Romeine 10:10). Soms kan gevoelens van onwaardigheid dit moeilik maak om saam met mede-Christene te wees, maar die Bybel waarsku ons om ons nie af te sonder nie (Spreuke 18:1). Heilsame assosiasie met Christene van albei geslagte kan ’n mens help om gebalanseerd te bly.—Hebreërs 10:24, 25.

As homoseksuele begeertes jou teister, kan hierdie wenke nuttig wees. Maar moenie te mismoedig word as hierdie slegte gevoelens voortduur nie. God verstaan jou gevoelens en het medelye met dié wat hard stry om hom te dien (1 Johannes 3:19, 20). In die nuwe wêreld sal die mensdom genees word van al die kwale wat ons vandag teister (Openbaring 21:3, 4). Vertrou intussen op God en stry teen verkeerde begeertes (Galasiërs 6:9). Met verloop van tyd en vasberade pogings kan selfs hierdie verkeerde begeertes minder word.

(Vanaf ons volgende nommer sal “Jongmense vra . . . ” een keer per maand verskyn.)

[Voetnote]

[Lokteks op bladsy 22]

Ontwikkel ’n gesonde beskouing van manlikheid deur Jesus se voorbeeld te bestudeer