Evolusie en jy

GEDURENDE die 19de eeu het The Origin of Species menigtes oortuig dat die mens sonder Goddelike ingryping voortbestaan het en sal voortgaan om dit te doen. Betower deur wetenskaplike vooruitgang het baie gevoel dat God nie meer nodig was nie en dat die wetenskap die mensdom kon red. Die boek Age of Progress het daarop gewys dat die 19de eeu “aangevuur is deur ’n oortuiging dat mensepogings wat op ’n redelike wyse aangewend word die wêreld kan verander”.

Maar teen die einde van daardie eeu het selfs Charles Darwin se optimisme afgeneem. Volgens een geskiedkundige het Darwin gevrees dat die evolusieteorie “God doodgemaak het en dat die gevolge vir die mens se toekoms onberekenbaar was”. Alfred Russel Wallace, ’n jonger tydgenoot van Darwin, het gesê: “In my laaste gesprek met Darwin [kort voor Darwin se dood] het hy ’n baie somber beskouing oor die toekoms van die mens uitgespreek.”

Wat het mensepogings opgelewer?

Die geskiedenis van die 20ste eeu het sedertdien getoon dat daar inderdaad baie somberheid in die vooruitsig was. Die tegnologiese prestasies sedert Darwin se tyd het bloot gekamoefleer wat by verre die donkerste en gewelddadigste tydperk in die hele mensegeskiedenis was. Ons lewe te midde van wat die geskiedskrywer H. G. Wells as “’n werklike demoralisering” beskryf het.

Sedert Wells hierdie stelling gemaak het (ongeveer 75 jaar gelede), is die wêreld verder gedemoraliseer. Niks wat wetenskaplikes, ekonome, maatskaplike organisasies, menseregerings of hierdie wêreld se godsdienste probeer het, het die situasie reggestel of kon dit selfs verhoed nie. Toestande gaan steeds agteruit.

Daar moet dus in werklikheid gevra word: Wat het mensepogings opgelewer? Het die wetenskap en tegnologie ’n beter wêreld tot stand gebring? “Wanneer ons die koerant oopmaak en kyk na wat aangaan”, het die bioloog Ruth Hubbard gesê, “is die probleme nie wetenskaplik nie. Dit is probleme van sosiale organisering, van dinge wat te groot geword het, van mense wat wins najaag en menslike behoeftes ignoreer.” Ruth Hubbard het bygevoeg: “Al is daar ’n redelike aanwending van hulpbronne, dink ek nie eintlik dat die wetenskap baie, indien enige, van die probleme sal kan oplos wat die meeste mense in die wêreld raak nie.”

Watter voordeel het dit werklik as die mens na die maan kan reis maar nie die basiese probleme van die mensdom kan oplos nie? Het die uitvinding van vernietigender wapens, soos die atoombom, ’n einde gemaak aan oorloë en etniese geweld? Het die prestasies van die wetenskap gelei tot ’n aansienlike afname in misdaad, gesinsverbrokkeling, seksueel oordraagbare siektes, onsedelikheid, buite-egtelike geboortes, korrupsie onder hoë amptenare, armoede, hongersnood, haweloosheid, dwelmmisbruik, besoedeling? Nee, die wetenskap het in werklikheid party van hierdie dinge vererger. Die mensdom het God verlaat en evolusie en die wetenskap in sy plek gestel, en sodoende het hulle hulle situasie nie verbeter nie, maar dit laat versleg.

Dit is gevolglik nie verbasend nie dat baie bedenkinge het oor die teorie dat die mens van aapagtige skepsele geëvolueer het, teenoor die bestaan van ’n God wat die eerste mense geskep het. ’n Gallup-meningsopname in die Verenigde State het aan die lig gebring dat slegs 9 persent van Amerikaners glo dat die mens sonder Goddelike ingryping geëvolueer het; 47 persent aanvaar die idee dat God die mens in sy teenswoordige vorm geskep het.

Wat die Bybel voorspel het

Hoewel The Origin of Species voorspel het dat die mens tot volmaaktheid vooruitgang sou maak, het die Bybel voorspel dat die wêreld deur ’n morele krisis geskud sou word (Matteus 24:3-12; 2 Timoteus 3:1-5). Die Bybel het ook voorspel dat hierdie krisis ’n klimaks sou bereik, waarna die getroue mensdom se erfenis ’n paradys sou wees, sonder enige van vandag se probleme.—Psalm 37:10, 11, 29; Jesaja 11:6-9; 35:1-7; Openbaring 21:4, 5.

Hierdie hoop het baie beweeg om die Bybel met belangstelling te bestudeer. Kan dit werklik wees dat die doel van die lewe meer is as net ’n stryd om voortbestaan? Bevat die Bybel dalk die sleutel, nie net tot die mens se verlede nie, maar ook tot sy toekoms, joune inkluis? Dit sal werklik vir jou die moeite werd wees om ondersoek in te stel na wat die Bybel werklik leer omtrent God en sy voorneme vir hierdie aarde en sy mense. As jy meer inligting verlang, sal Jehovah se Getuies jou met graagte help.

[Venster op bladsy 9]

Miljoene is gehelp om die bewyse van ’n God wat skep te heroorweeg deur gebruik te maak van die boek Lewe—Hoe het dit hier gekom? Deur evolusie of deur die skepping?a Tot op hede is meer as 30 miljoen eksemplare in 27 tale gedruk. Ontwaak! publiseer ook steeds inligting oor wat die feite van ware wetenskap omtrent die geldigheid van die evolusieteorie toon.

[Voetnote]

[Prent op bladsy 8, 9]

In teenstelling met die evolusieteorie het die Bybel vandag se morele krisis en die oplossing daarvan voorspel —’n probleemvrye paradys

[Foto-erkenning op bladsy 8]

U.S. Coast Guard photo

[Foto-erkenning op bladsy 8]

Uitgehongerde kind: WHO photo by P. Almasy

[Foto-erkenning op bladsy 8]

Regs: U.S. National Archives photo