Van ons lesers

Uitbranding Dankie vir die artikels “Ly jy aan uitbranding?” (8 Januarie 1995). Hoewel ek as ’n pionier dien, voel ek al maande lank uitgeput en sonder lewenslus. Die artikel het ’n paar wenke gegee wat ek persoonlik sal toepas, veral die voorstel om dit te vermy om ander te kritiseer.

M. S., Duitsland

Hierdie artikels was vir my uitsonderlik omdat ek uiteindelik my probleem geïdentifiseer het. Ek is getroud, die moeder van vier kinders en het baie om te doen. Ongelukkig toon my gesin selde waardering vir wat ek doen. Die wete dat dit ’n algemene probleem onder sensitiewe mense is, laat my beter voel. Moet nooit ophou om sulke artikels te publiseer nie!

J. M., Italië

Ek ondervind moegheid, lusteloosheid, hulpeloosheid, wanhoop en ongesteldheid. Ná ek die artikel gelees het, verstaan ek die faktore wat tot hierdie gevoelens aanleiding gegee het. Ek wil hê julle moet weet hoe goed dit voel om verstaan te word en te weet dat Jehovah en sy organisasie genoeg omgee om bemoedigende artikels te skryf.

Z. L., Verenigde State

Uitbranding het daartoe bygedra dat ek Betheldiens en later die pionierdiens verlaat het. Ek was op die punt om te vra om nie meer as ’n ouer man te dien nie! Ek kan nou sien waar ek in die verlede versuim het om te kommunikeer. Ek het op hierdie gebied verbeter, en my gemoedstemming is baie beter.

E. R., Verenigde State

Dit was bemoedigend om uit te vind dat ander Christenbedienaars hierdie probleem deurgemaak het en dat hulle dit oorkom het.

C. L., Switserland

Ongehude moeders Dankie vir die artikel “Jongmense vra . . . Hoe kan ongehude moeders hulle omstandighede ten beste benut?” (8 Oktober 1994). Julle erken dat die swangerskap die gevolg van ’n oortreding was. Maar pleks van hierop te hamer en die meisie selfs slegter te laat voel, gee julle praktiese, nuttige riglyne.

J. D., Verenigde State

Ek het tien jaar gelede ’n enkelouer geword. Maar met die hulp van Jehovah en my Christenouers het ek goed gevaar. Nadat ek die skool verlaat het, het ek ses jaar lank as ’n voltydse bedienaar gedien en met ’n Christenman getrou wat nou as ’n ouer man dien. Ek het grootliks by Jehovah se barmhartigheid en goedhartigheid baat gevind en kan my ondervinding gebruik om ander te help.

A. M., Verenigde State

Terwyl ek die artikel gelees het, kon ek die trane nie keer nie. Ek het my in die einste situasie bevind wat julle beskryf het. Noudat ek ’n Christen is, is ek bly dat ek my dogter met insig kan grootmaak.

C. R. S., Brasilië

Snorkery Die artikel “Snork jy?” (8 September 1994) het teen die moontlike gevare van snorkery gewaarsku. Maar julle het geïmpliseer dat ’n mens slaapapnee het as jy baie snork. Dit is nie noodwendig die geval nie. Die neiging om te snork, kom voor namate ons ouer word. Dit kan ook as gevolg van allergieë en sinusprobleme voorkom. Maar as ’n mens baie snork en dit gepaardgaan met periodes waartydens jy nie asemhaal nie en dan na asem snak of proes, en as jy gedurende die dag slaperig of moeg is, is slaapapnee waarskynlik daarvoor verantwoordelik. Die algemeenste behandeling hiervoor is nie ’n operasie nie, maar toestelle wat saamgeperste lug gebruik om die lugweë oop te hou terwyl ’n mens slaap.

C. S., Verenigde State

Ons waardeer hierdie kommentare en is jammer as ons artikel enige misverstand veroorsaak het. Mediese deskundiges is dit eens dat dit nie abnormaal is om soms te snork nie. Soos dit die geval is met alle mediese probleme, is ’n ondersoek deur ’n geneesheer noodsaaklik vir die regte behandeling.—RED.